សហជីប​​ចោទ​អាជ្ញាធរ​ថា​ឲ្យ​«ភ្លើងខៀវ» ក្នុង​ការ​បង្ក្រាប​បាតុកម្ម​នៅ​ណាហ្គាវើល

ថ្នាក់ដឹកនាំសហជីព និងសកម្មជនសិទ្ធិមនុស្ស ចំនួនដប់ប្រាំបួន(១៩)នាក់ ត្រូវបានចាប់ខ្លួន ក្នុងចំណោមបាតុករសរុប ជាងមួយពាន់(១០០០)នាក់ ដែលក្នុងនោះប៉ែតសិបភាគរយ(៨០%)ជាស្រ្តី។ បាតុករដែលបានចាប់ខ្លួន ក្នុងបាតុកម្មអហឹង្សាមួយ នៅមុខកាស៊ីណូណាហ្គាវើល បានបញ្ជូនខ្លួនទៅស្នងការរាជធានីនៅវេលាម៉ោងបីដប់ប្រាំនាទី ហើយក៏ត្រូវបានដោះលែងមកវិញ នៅវេលាម៉ោងប្រាំមួយដប់ប្រាំនាទីរសៀលថ្ងៃដដែល ដោយមានការអន្តរាគមពីឧត្តមស្នងការអង្គការសហប្រជាជាតិ ទទួលបន្ទុកសិទ្ធិមនុស្សនៅកម្ពុជា។ ការចាប់ខ្លួននេះ ក៏មានវត្តមានលោក ឃួង ស្រេង អភិបាលរងរាជធានីភ្នំពេញ អមដោយព្រះរាជអាជ្ញារងរាជធានីភ្នំពេញ ចំនួនពីរនាក់ផងដែរ។
Loading...
  • ដោយ: អ៊ុម វ៉ារី
  • កែប្រែចុងក្រោយ: June 19, 2013
  • ប្រធានបទ:
  • អត្ថបទ: មានបញ្ហា?
  • មតិ-យោបល់

ភ្នំពេញ៖ ថ្នាក់ដឹកនាំសហជីព និងសកម្មជនសិទ្ធិមនុស្ស ចំនួនដប់ប្រាំបួន(១៩)នាក់ ត្រូវបានចាប់ខ្លួន ក្នុងចំណោមបាតុករ​សរុប ជាងមួយពាន់(១០០០)នាក់ ដែលក្នុងនោះប៉ែតសិបភាគរយ(៨០%)ជាស្រ្តី។


សណ្ឋាគារ មជ្ឈមណ្ឌលកំសាន្ដ ណាហ្គាវើល នៅមាត់ទន្លេនៃរាជធានីភ្នំពេញ។

បាតុករដែលបានចាប់ខ្លួន ក្នុងបាតុកម្មអហឹង្សាមួយ នៅមុខកាស៊ីណូណាហ្គាវើល បានបញ្ជូនខ្លួនទៅស្នងការរាជធានី​នៅ​វេលាម៉ោងបីដប់ប្រាំនាទី ហើយក៏ត្រូវបានដោះលែងមកវិញ នៅវេលាម៉ោងប្រាំមួយដប់ប្រាំនាទីរសៀលថ្ងៃដដែល ដោយ​មានការអន្តរាគមពីឧត្តមស្នងការអង្គការសហប្រជាជាតិ ទទួលបន្ទុកសិទ្ធិមនុស្សនៅកម្ពុជា។ ការចាប់ខ្លួននេះ ក៏មាន​វត្តមានលោក ឃួង ស្រេង អភិបាលរងរាជធានីភ្នំពេញ អមដោយព្រះរាជអាជ្ញារងរាជធានីភ្នំពេញ ចំនួនពីរនាក់ផងដែរ។

លោក ឌឿ ដារ៉ូ ជាលេខាផ្ទាល់ប្រធានស្តីទីសហព័ន្ធសហជីព វិស័យទេសចរណ៍សេវាកម្ពុជា (C.T.S.W.S.) បានប្រាប់​មនោរម្យព័ងអាំងហ្វូតាមទូរសព្ទ័ថា ការចាប់ខ្លួនថ្នាក់ដឹកនាំសហជីពនេះ ធ្វើឡើងដោយប្រធានសន្តិសុខណាហ្គាវើល​ដោយផ្ទាល់ម្នាក់ ឈ្មោះ ស៊ឹម សារ៉ាវុធ។ គាត់បានចាប់អ្នកណាដែលលេចមុខជាងគេ ក្នុងការធ្វើបាតុកម្មនេះ រុញចូល​ឡាន រួមទាំងទាំងប្រមួលសម្ភារមួយចំនួន ដូចជាឃោសសព្ទ័ បដាជាដើម ប្រមូលដាក់ក្នុងឡាននោះដែរ។

លេខារូបនេះបន្តថា ក្រោយការចាប់ខ្លួននោះ លោក ឃួង ស្រេង អភិបាលរងរាជធានីភ្នំពេញ អមដោយព្រះរាជអាជ្ញារង​រាជធានីភ្នំពេញចំនួនពីរនាក់ បានមកបញ្ជាក់ប្រាប់ក្រុមបាតុករថា ឲ្យធ្វើការផ្អាកបាតុកម្មនេះ និងកំណត់ពេលជួបគ្នា​ដោះស្រាយ បើមិនដូចនេះទេអ្នកដែលចាប់ទៅនោះនឹងមិនដោះលែងទេ ហើយលោកនឹងបន្តរចាប់ទៅទៀត។ លោកដារ៉ូ​បានធ្វើការសន្និដ្ឋានថា «លោក ស៊ឹម សារ៉ាវុធ ប្រធានសន្តិសុខណាហ្គាវើល មិនហ៊ានធ្វើការចាប់លើកមនុស្ស បោះចូល​ឡាននោះទេ បើមិនមានភ្លើងខៀវ ពីខាងសាលារាជធានីភ្នំពេញនោះ»។

ឯអភិបាលរងរាជធានីភ្នំពេញលោកឃួង ស្រេង ក៏បានឲ្យដឹងថា ការចាប់មេដឹកនាំសហជីព និងបុគ្គលិកកាស៊ីណូណាហ្គា​នេះ ព្រោះតែការធ្វើបាតុកម្ម«ខុសច្បាប់» និងយកទីលានសួនសាធារណៈធ្វើទីតាំងតវ៉ា។ បាតុកម្មនេះមិនស្របច្បាប់ ដូច្នេះ​អាជ្ញាធរបាន ហាមឃាត់ឲ្យបញ្ឈប់ធ្វើការតវ៉ា នៅលើសួនសាធារណៈដោយធ្វើនៅទីលានប្រជាធិបតេយ្យ ដែលជាកន្លែង​ដ៏​សមស្របមួយសម្រាប់ការធ្វើបាតុកម្ម។ លោកបន្តរថា លោកនឹងរង់ចាំទទួលសំណើ ដើម្បីពិភាក្សាការចរចាគ្នារវាងកម្មករ បុគ្គលិកជាមួយក្រុមហ៊ុនដើម្បីដោះស្រាយតាមផ្លូវច្បាប់។

ឆ្លើយតបទៅនឹងការលើកឡើងរបស់លោកអភិបាលរង កញ្ញា ឈឹម ស៊ីថរ អនុប្រធានសហជីពប្រចាំណាហ្គាវើល ក៏បាន​ប្រាប់មនោរម្យព័ងអាំងហ្វូថា សមត្ថកិច្ចថា «បាតុកម្មនេះមិនស្របច្បាប់ ដោយគ្មានការសុំច្បាប់ជាមុន»។ ករណីនេះកញ្ញា​បង្ហាញថា ពួកគាត់បានដាល់លិខិត ទៅក្រុមហ៊ុនណាហ្គាវើលនេះរួចហើយ ហើយក៏បានជូនដំណឹងទៅ​សាលារាជធានី​ដែរ។ «តាមច្បាប់មិនមានកំណត់ ឲ្យមានការសុំច្បាប់នោះទេ គ្រាន់តែជាការជូនដំណឹងប៉ុណ្ណោះ ខាងសាលារាជធានី ក៏​មិនបានចេញលិខិតអ្វីឆ្លើយតបដែរ»។

កញ្ញាលើកឡើងថា ការធ្វើបាតុកម្មអហិង្សានេះ ក្រោយពេលដល់កំណត់បីខែ ដែលក្រុមហ៊ុនណាហ្គាវើលបានសន្យាថា នឹងឆ្លើយតបនូវសំណូមពរបីចំណុចទាក់ទង ទៅហ្នឹងសិទ្ធិក្នុងការបំពេញការងារ ការទទួលបានអត្ថប្រយោជន៍ផ្សេងៗ និងការតំឡើងប្រាក់ខែយ៉ាងតិចបំផុត១៥០ដុល្លារក្នុង១ខែ មានការខកខានក្នុងរហូតមកដល់ពេលនេះ ហើយ​«រាល់ការ​ចចារ ពុំទទួលបានដំណោះស្រាយសមស្របទេ»។

ផ្ទុយទៅវិញ មេធាវីការពាររបស់ក្រុមហ៊ុនណាហ្គាវើលអ្នកស្រី ម៉ៅ សុំវុទ្ធារី មិនបាននិយាយអ្វីច្រើនទេ ដោយគ្រាន់តែ​បញ្ជាក់ថា ភាគីក្រុមហ៊ុនបានយល់ព្រម តាមការស្នើររបស់បុគ្គលិកទាំងអស់ ប៉ុន្តែបុគ្គលិកទាំងនោះ​នៅតែមិនព្រមទទួល​យក។

សូមរម្លឹកថា បាតុកម្មនេះបានចាប់ផ្តើមធ្វើ តាំងពីឆ្នាំ២០០៧ មកម្ល៉េះក្រោយពីបុគ្គលិកទាំងអស់ មិនត្រូវបានក្រុមហ៊ុន​តំឡើងប្រាក់ឈ្នួលឲ្យ ស្របទៅនឹងស្ថានភាពអតិផរណានៃប្រទេសកម្ពុជា។ មកដល់ថ្ងៃទី២២ ខែកុម្ភៈ ឆ្នាំ២០១៣ ក៏បាន​ធ្ចើការទាមទារនូវលក្ខខណ្ឌការងារចំនួនប្រាំមួយចំណុច។

លក្ខខណ្ឌទាំងនោះរួមមាន៖ ទីមួយនិងទីពីរ ទាមទារឱ្យក្រុមហ៊ុនទទួលយកបុគ្គលិក ដែលវបានបញ្ឈប់ឲ្យចូលបម្រើការងារ​នៅកន្លែងដើមវិញ ព្រមទាំងទូទាត់ប្រាក់រំលឹក។ ទីបីទាមទារឱ្យក្រុមហ៊ុនគោរពទៅតាមសេចក្ដីបង្គាប់ របស់ក្រុមប្រឹក្សា​អាជ្ញាកណ្ដាល។ ទីបួនទាមទារឱ្យក្រុមហ៊ុនផ្ដល់ប្រាក់ឈ្នួលទាបបំផុត ចំនួន១៥០ដុល្លារ រួមទាំងកាំប្រាក់ម្ភៃភាគរយ​ដល់​បុគ្គលិកទាំងអស់។ ទីប្រាំផ្ដល់ប្រាក់រង្វាន់ចំនួនមួយខែដល់បុគ្គលិកទាំងអស់ ដែលកំពុងបម្រើការងារនៅ​ក្រុមហ៊ុន​ណាហ្គាវើលនេះ និងទីប្រាំមួយសុំឱ្យក្រុមហ៊ុនពិចារណាពីវត្តមាន និងអត្តចរិតនៃថ្នាក់គ្រប់គ្រងសណ្ឋាគារ Habibur Rehman (EAM-Hotel)។ នាយកផ្នែក VIP Fanny Yong និងនាយកធនធានមនុស្ស ផ្នែកទំនាក់ទំនងបុគ្គលិកឈ្មោះ Jeremy chea រងការចោទប្រកាន់ថា កំពុងបង្កបញ្ហាជាមួយបុគ្គលិក។

នេះជាការបង្ក្រាបថ្មីមួយទៀត ទៅលើបាតុកម្មអហឹង្សានៃបុគ្គលិកកម្មករនយោជិក ក្នុងរយៈពេលមិនដល់មួយខែផងនេះ។ កាលពីចុងខែមុន និងដើមខែ​មិថុនាកន្លងមក ការបង្ក្រាបដ៏ហឹង្សាមួយទៀតរបស់អាជ្ញាធរ នៅក្នុងខេត្តកំពង់ស្ពឺ បានធ្វើទៅ​លើកម្មកររោងចក្រ​សាប្រ៊ីណា បង្កឲ្យមនុស្សជាច្រើននាក់រងរបួស ក្នុងនោះស្ត្រីម្នាក់បានរលូតកូន។ អំពើទាំងនេះ សម្ដែង​ឲ្យ​ឃើញថា អាជ្ញាធរបានប្រើកម្លាំង និងតាមរយៈតុលាការ ដើម្បីសំពងយ៉ាងចាស់ដៃ ទៅលើជនណាក៏ដោយ ដែលនាំគ្នា​ងើបតវ៉ា ទាមទារឲ្យមានការគោរព ពីសិទ្ធិការងាររបស់ខ្លួន៕

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី១៩ មិថុនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...