ភ្នំពេញ៖ ដូចការគ្រោងទុក បាតុកម្មអហឹង្សា ដឹកនាំដោយលោក ជុំ ម៉ី តំណាងអតីតជនរងគ្រោះនៃគុកទួលស្លែង និងជន​រងគ្រោះក្រោមរបបខ្មែរក្រហម ចាប់ផ្តើមនៅថ្ងៃអាទិត្យទី៩ខែមិថុនានេះ នៅទីលានប្រជាធិបតេយ្យ ធ្វើការប្រឆាំងនឹង​ការ​លើកឡើងរបស់លោក កឹម សុខា ប្រធានស្តីទីគណបក្សសង្គ្រោះជាតិទាក់ទងនឹង «គុកទួលស្លែងជាគុកសិប្បនិម្មិត រៀបចំ​ឡើងដោយវៀតណាម»។

រូបថតរបស់គណបក្ស ដែលបានផ្ញើរមកមនោរម្យព័ងអាំងហ្វូ បញ្ជាក់ពីវត្តមានលោកកឹម សុខា នៅស្រុកពពាក្រែក ក្នុងខេត្ត​កំពង់ចាម កាលពីថ្ងៃទី១៨ខែឧសភា មិនមែននៅខេត្តតាកែវ ឬនៅខេត្តព្រៃវែងនោះទេ។

ឆ្លើយតបនឹងសំណើររបស់លោក ជុំ ម៉ី ក្នុងការជួបជុំធ្វើបាតុកម្មរបស់បណ្ដាជននេះ ក្រសួងមហាផ្ទៃនៃប្រទេសកម្ពុជាបាន​អនុញ្ញាត ឲ្យមានអ្នកចូលរួមត្រឹមតែមួយម៉ឺននាក់ប៉ុណ្ណោះ និងអនុញ្ញាតឲ្យមានការដង្ហែរញត្ដិ ទៅដាក់នៅគណបក្ស​សង្គ្រោះ​ជាតិ មិនឲ្យលើសពីប្រាំរយនាក់ទេ។ ក្នុងការស្នើសុំដំបូងទៅកាន់ក្រសួងមហាផ្ទៃ បាតុកម្មនេះបានគ្រោង​ចំនួនមនុស្ស​រហូត​ដល់​២ម៉ឺន​នាក់ និងការដង្ហែតាមដងផ្លូវ ចំនួន២ពាន់នាក់។

នៅក្នុងការជូបជុំគ្នានាព្រឹកស្អែកនេះ តំណាងរាស្រ្តមួយចំនួន មកពីគណបក្សប្រជាជនកម្ពុជា ដូចជាលោក ជាម យៀប និងលោក ឈាង វុន ជាដើម ក៏នឹងមកចូលរួមធ្វើបាតុកម្មដែរ។ តែការចូលរួមនេះ តំណាងរាស្ត្រទាំងពីររូប បានអះអាងថា ជាការចូលរួម ក្នុងនាមជាជនរងគ្រោះម្នាក់នៃរបបខ្មែរក្រហម និងក្នុងនាមពលរដ្ឋដែល​មានសិទ្ធិក្នុងការបញ្ចេញ​មតិ​ប៉ុណ្ណោះ មិនមែនក្នុងនាមតំណាងរាស្រ្ត ឬសមាជិកសភាទេ និងក៏មិនមែនក្នុងនាមអ្នកនយោបាយនោះដែរ។

កាលពីថ្ងៃទី៦ ខែ មិថុនា លោក ជុំ ម៉ី បានធ្វើការអំពាវនាវ ឲ្យមានការចូលរួមពីប្រជាពលរដ្ឋគ្រប់រូប ដែលមានបងប្អូន ឬ​សាច់ញាត្តិ បានស្លាប់ក្នុងរបបខ្មែរក្រហម ចូលរួមធ្វើបាតុកម្មអហិង្សា៖ «សូមមេត្តាចូលរួមអហឹង្សា និងសំដៅឆ្ពោះ​តែ​ចំពោះបុគ្គល លោក កឹម សុខា តែម្នាក់ប៉ុណ្ណោះ ក្នុងបំណងគ្រាន់តែបង្ខំឲ្យបុគ្គលរូបនេះ មកទទួលខុសត្រូវនូវអ្វី ដែល​ខ្លួន​បាននិយាយបំភ្លៃភស្តុតាងប្រវត្តិសាស្ត្រ។ ក្រៅពីបុគ្គល លោក កឹម សុខា ទោះកូនចៅឬសាច់ញាតិក្រុមគ្រួសារ​របស់លោក កឹម សុខា គណបក្សនយោបាយ និងអ្នកគាំទ្រ យើងមិនត្រូវប៉ះពាល់ជាដាច់ខាត។ (…) មហាបាតុកម្មមហាជននេះ គឺជាការគ្រាន់តែសម្តែងនូវសិទ្ធិបញ្ចេញមតិ ស្របនឹងសង្គមប្រជាធិបតេយ្យប៉ុណ្ណោះ។»

ផ្ទុយពីការអំពាវនាវនេះ លោកប៊ូ ម៉េង អនុប្រធានរបស់លោក ជុំ ម៉ី ក្នុងសមាគមជនរងគ្រោះ«ក្សេមក្សាន្ដ»នោះ បាន​ថ្លែង​ក្នុងសេចក្ដីប្រកាសមួយ កាលពីពេលកន្លងមកនេះថា លោក«នឹងមិនចូលរួម» ក្នុងបាតុកម្មដែលមាន«ចរិកនយោបាយ»​នេះទេ។ លោកបានបញ្ជាក់​ក្នុង​សេចក្ដីថ្លែងការណ៍ផ្ទាល់ខ្លួននោះថា លោក«មិនយក»ថានះខ្លួនជាជនរងគ្រោះ ទៅប្រកប​«វិជ្ជាជីវះ»​ដើម្បីលាភសង្ការះ​អ្វីឡើយ។

អ្នកនាំពាក្យគណបក្សសង្គ្រោះជាតិ លោក យ៉ែម បុញ្ញារិទ្ធិ មិនអាចសុំទំនាក់ទំនងបានទេក្នុងថ្ងៃនេះ ដោយលោកពុំទទួល​ទូរសព្ទ័។ ប៉ុន្តែតាមប្រភពដែលស្និតនឹងគណបក្សសង្គ្រោះជាតិ បានបញ្ជាក់ថាលោក កឹម សុខា និងមន្ត្រីជាន់ខ្ពស់ឯទៀត បានមកដល់កម្ពុជាកាលពីល្ងាចថ្ងៃទី៧ ខែមិថុនា ម្សិលមិញនេះហើយ។ តែប្រភពមួយនេះ មិនបានបង្ហាញនូវជំហរណា​មួយ ដែលទាក់ទងនឹងការទទួលយកញ្ញត្តិរបស់មហាជន ដែលដឹកនាំដោយលោកជុំ ម៉ី នាថ្ងៃស្អែកនោះទេ។ លោក កឹម សុខា ធ្លាប់បានប្រកាសថា លោកមិនបាននិយាយ ថាគ្មានការកាប់សម្លាប់ គ្មានរបបខ្មែរក្រហម ឬថាគុកទួលស្លែង​ជាគុក​សិប្បនិម្មិតនោះទេ។ ក្នុងសេចក្ដីប្រកាសនោះ លោកកឹម សុខាស្នើសុំឲ្យមានការជួបតទល់គ្នារវាងលោក និងលោកនាយក​រដ្ឋមន្រ្តី ហ៊ុន សែន ដើម្បីបកស្រាយចំពោះបញ្ហាខាងលើនេះ នៅតាមបណ្តាញសារព័ត៌មានជាតិ។

អ្នកវិភាគនយោបាយ និងជាប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ បានគាំទ្រដល់សិទ្ធិបញ្ចេញមតិ និង​សិទ្ធិ​ក្នុងការធ្វើបាតុកម្មរបស់ប្រជាពលរដ្ឋ។ លោកក៏បានសម្តែងនូវការសប្បាយចិត្ត ចំពោះវត្តមានរបស់តំណាងរាស្រ្ត ដែល​បានចូលរួមនេះ តែលោកបង្ហាញថាការចូលរួមរបស់តំណាងរាស្រ្តទាំងនេះ ធ្វើឡើងទៅតាមអ្វីដែល​ពួកគាត់គិត​ថា​«ត្រឹមត្រូវ» ដូចករណីការធ្វើបាតុកម្មនេះជាដើម។

ទាក់ទងនឹងព្រឹត្តិការណ៍ចុងក្រោយ កើតមាននៅប្រទេសកម្ពុជា ដូចជាបាតុកម្ម និងការអនុម័តច្បាប់«ប្រឆាំងការមិន​ទទួល​ស្គាល់ឧក្រិដ្ឋកម្ម ដែលបានប្រព្រឹត្តិឡើងក្នុងរយៈកាល​នៃកម្ពុជា​ប្រជាធិបតេយ្យ»នោះ លោកប្រធានមជ្ឈមណ្ឌលសិទ្ធិ​មនុស្សកម្ពុជារូបនេះ បានថ្លែងបញ្ជាក់ថា វាមាន«ពាក់ពន្ធ័»នឹងរឿងនយោបាយ ដែលមិនគួរឲ្យកើតមាននៅពេលនេះ ហើយ​អាចនឹងកើតមាននូវអំពើហឹង្សា ព្រមទាំងប៉ះពាល់ដល់ការបង្រួមបង្រួមជាតិ។ លោកបានសម្ដែងការ​សោកស្តាយ​ចំពោះសភាជាតិ ដែលគួតែផ្តោតយកចិត្តទុកដាក់ ទៅលើច្បាប់«ពាក់ពន្ធ័នឹងតុលាការ ពាក់ពន្ធ័នឹងសិទ្ធិដីធ្លីពលរដ្ឋ» ប្រសើរជាងការយកចិត្តទុកដាក់លើសម្តី អ្នកនយោបាយ ដែលជម្រុញឲ្យមានការបង្កើតនូវច្បាប់មួយនេះ៕

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី០៨ មិថុនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ