កីឡាករវាយតឺនីស រ៉ចឺ ហ្វេដឺរ៉ឺ (Roger Federer) សង្ឃឹមថានឹងទទួលបានកំណត់ត្រាថ្មីមួយទៀត ហើយក៏មានមហិច្ឆតា​ចង់​បញ្ចប់ក្តីសង្ឃឹមរបស់បារាំង ដែលខំរងចាំអស់រយះពេល៣០ឆ្នាំមកនេះ ក្នុងការចង់ក្លាយជាម្ចាស់ជើងឯកឯកត្តជនបុរស ក្នុងកម្មវិធីរ៉ូឡែន ហ្គារូស (Roland Garros) ដែរ។

បន្ទាប់ពីទម្លាក់កីឡាករបារាំង ហ្គាឡែស ស៊ីម៉ុន (Gilles Simon) កាលពីវគ្គ១៦នាក់ចុងក្រោយរួចមក កីឡាករលំដាប់​លេខ​៣ពិភពលោករូបនេះ ត្រូវជួបជាមួយកីឡាករបារាំងមួយរូបទៀត នៅក្នុងវគ្គ៨នាក់ចុងក្រោយ ហើយក៏ជាកីឡាករបារាំង​តែ​១រូបគត់ដែរ ដែលឡើងដល់វគ្គនេះ។ ហ្វេដឺរ៉ឺ នឹងត្រូវតតាំងជាមួយកីឡាករ ចូវីលហ្វ្រេដ ធីសុងហ្គា (Jo-Wilfried Tsonga) នៅយប់ថ្ងៃអង្គារ៏នេះ។

ម្ចាស់ជើងឯកឆ្នាំ២០០៩ (ហ្វេដឺរ៉ឺ) នឹងលេងក្នុងវគ្គ១ភាគ៤ផ្តាច់ព្រ័ត្រនេះ ជាលើកទី៣៦របស់គាត់ ហើយបើគាត់ឈ្នះនោះ នឹងក្លាយជាជ័យជំនះលើកទី៥៩របស់គាត់ផងដែរ នៅក្នុងព្រឹត្តិការណ៏ហ្វ្រេនអូផិន (French Open)។

បើហ្វេដឺរ៉ឺ អាចយកឈ្នះកីឡាករធីសុងហ្គានៅយប់នេះ មានន័យថាការទទឹងរងចាំរបស់​ប្រជាជនបារាំង អស់​រយៈ​ពេល​៣០ឆ្នាំ ដើម្បីចង់ឃើញកីឡាកររបស់ខ្លួនក្លាយជាម្ចាស់ជើងឯកនោះ នឹងត្រូវបានរលាយសាបសូន្យ ខណៈដែលកីឡាករ​ធីសុងហ្គា ជាកីឡាករបារាំងតែម្នាក់គត់ ឆ្លងមកដល់វគ្គ១ភាគ៤ផ្តាច់ព្រ័ត្រ។

កីឡាករហ្វេដឺរ៉ឺ បាននិយាយថា «ខ្ញុំរងចាំការប្រកួត ជាមួយធីសុងហ្គា។ វាជាការប្រកួតដ៏ធំ ដែលត្រូវលេងជាមួយគាត់​នៅ​ក្នុងទីក្រុងប៉ារីសនេះ។ គាត់ជាមិត្តភក្តិដ៏ល្អរបស់ខ្ញុំ ប៉ុន្តែពេលនេះ យើងទាំង២នាក់កំពុងតែផ្តោតអារម្មណ៏ ទៅលើការ​ប្រកួត​មួយនេះ។»

រីឯកីឡាករធីសុងហ្គា ក៏មានការជឿជាក់លើខ្លួនរបស់គាត់ខ្លាំងដែរ ដោយគាត់បាននិយាយថា «ដ៏រាបណា ការប្រកួតមិន​ទាន់ចប់ ខ្ញុំនៅតែមានសង្ឃឹម។ ខ្ញុំនឹងប្រយុទ្ធដោយស្វិតស្វាញជាទីបំផុត។»

គួរបញ្ជាក់ថា អ្នកឈ្នះក្នុងការប្រកួតនេះ នឹងត្រូវឡើងទៅជួបជាមួយនឹងកីឡាករ ដេវីដ ហ្វឺរ៉ឺ (David Ferrer) ឬថុមី រ៉ូប្រេដូ (Tommy Robredo) នៅក្នុងវគ្គពាក់កណ្តាលផ្តាច់ព្រ័ត្រ ដែលកីឡាករទាំង២រូបនេះ សុទ្ធសឹងតែជាកីឡាករសញ្ជាតិ​អេស្ប៉ាញ ហើយនឹងធ្វើការប្រកួតក្នុងយប់នេះ ដូចគ្នា៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី០៤ ខែមិថុនា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ