កីឡាករវាយតេនីស រ៉ាហ្វាអែល ណាដាល់ (Rafael Nadal) បានឆ្លងផុតជុំដំបូងទាំងត្រដាបត្រដួស ក្នុងយុទ្ធនាការការពារ​ដំណែងជើងឯករបស់ខ្លួន កាលពីយប់ថ្ងៃច័ន្ទម្សិលមិញ។

កីឡាករវាយតេនីស រ៉ាហ្វាអែល ណាដាល់ នៅក្នុងការប្រកួតរ៉ូឡែន ហ្គារ៉ូស។

កីឡាករអេស្ប៉ាញរូបនេះ បានចំណាយកម្លាំងយ៉ាងច្រើនក្នុងការតទល់ជាមួយនឹងកីឡាករអាឡឺម៉ង់ដានីញ៉ែល ប្រែន (Daniel Brands) ខណៈដែលគាត់ត្រូវបានប្រែន ធ្វើការនាំមុខនៅសិតទី១ ហើយប្រែន បាននាំមុខមុន ៣-០ ទៀតនៅសិតទី២។

ប៉ុន្តែណាដាល់ មិនធ្វើឲ្យការប្រកួតលើកទី៥៩របស់គាត់ បញ្ចប់ទៅដោយសភាពក្រៀមក្រំឡើយ ពោលគឺគាត់បានវាយបក​យកឈ្នះវិញ ដោយលទ្ធផលសរុប ៤-៦, ៧-៦, ៦-៤ និង ៦-៣។

វាក៏ជាថ្ងៃដ៏ពិសេសមួយដែរ សម្រាប់កីឡាករបារាំងហ្គាអែល ម៉ុងហ្វៀល (Gael Monfils) ដែលបានបំបាក់កីឡាករ​លេខ៥​ពិភពលោកថូម៉ាស ចឺឌីជ (Tomas Berdych) បាន ខណៈដែលកីឡាករចូវីលហ្វ្រេដ សុងហ្គា (Jo-Wilfried Tsonga) ក៏បាន​ក្លាយជាកីឡាករម្ចាស់ផ្ទះទី៥ ហើយបានឆ្លងទៅកាន់វគ្គជាបន្តដែរនោះ។

ចំណែកឯកីឡាការនី ម៉ារៀ ស្សារ៉ាប៉ូវ៉ា (Maria Sharapova) បានចាប់ផ្តើមការពារដំណែងជើងឯករបស់ខ្លួន ដោយគ្មានការ​ភ័យព្រួយអ្វីបន្តិចឡើយ បន្ទាប់ពីបំបាក់កីឡាការនីស្ស៊េ ស្សូវ៉ៃ (Hsieh Su-Wei) របស់ចិន ឲ្យតដៃមិនបានរួចមក។

កីឡាការនីរុស្ស៊ីរូបនេះ ប្រើពេលត្រឹមតែ៥៤នាទីតែប៉ុណ្ណោះ ក្នុងការយកឈ្នះលើកីឡាការនីចិន២សិតជាប់ៗគ្នា ដោយ​លទ្ធផល៦-២ និង៦-១ ហើយក៏អាចកក់កៅអីទៅជុំទី២ យ៉ាងងាយស្រួល ខណៈដែលនៅជុំទី២ ស្សារ៉ាប៉ូវ៉ា នឹងត្រូវប្រឈម​មុខជាមួយកីឡាការនីមកពីប្រទេសកាណាដា អ៊ឺចិន បូឆាដ (Eugenie Bouchard)។

ចំណែកឯគូសំខាន់ផ្សេងៗទៀត កីឡាការនីសញ្ជាតិប៉ូឡូញ អានីស្កា រេដវ៉ាន់ស្កា (Agnieszka Radwanska) បានយក​ឈ្នះ​កីឡាការនីអ៊ីស្រាអែលស្សាហា ភៀ (Shahar Peer) ដោយលទ្ធផល ៦-១ និង ៦-១ ខណៈដែលម្ចាស់ជើងឯកឆ្នាំ២០១១ កីឡាការនីលីណា របស់ចិនក៏បានឡើងទៅកាន់វគ្គជាបន្តដែរ បន្ទាប់ពីបានយកឈ្នះកីឡាការនីអេស្ប៉ាញអាណាបែល មេឌីណាហ្គារីកស៏ (Anabel Medina Garrigues)។

រីឯកីឡាការនីលេខ១របស់អង់គ្លេស ត្រូវហាលអាវនៅជុំដំបូង បន្ទាប់ពីចាញ់ក្រោមថ្វីដៃកីឡាការនីដិនម៉ាក ការ៉ូលីន វូស្នីគី (Caroline Wozniacki)៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២៨ ខែឧសភា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ