ទំនាក់ទំនងស្នេហា ដែលមានគម្លាត ឬនៅឆ្ងាយពីគ្នា អាចប្រឈមនឹងឧបសគ្គខ្លាំងជាង ស្នេហាដែលដៃគូរទាំងពីរ​នៅ​ជិត​គ្នាដូចឃ្លាមួយថា «ឃ្លាតកាយ ណាយចិត្ត» ដូច្នោះដែរ។ ប៉ុន្តែបើយើងស្ថិតក្នុងកាលៈទេសៈនេះ តើយើងគួរធ្វើ ឬមានវិធី​យ៉ាងណា ដើម្បីឲ្យជិវិតស្នេហានៅស្ថិតថេរជានិរន្តន៏នោះ។

មនោរម្យព័ងអាំងហ្វូ សូមបង្ហាញនូវគន្លឹះយល់ដឹងខ្លីៗ មួយចំនួន ដើម្បីជាវិធីសាស្រ្តជួយថែរក្សា ជិវិតស្នេហារបស់​លោក​អ្នក ដែលកំពុងតែនៅឆ្ងាយពីគ្នាបាន។ កត្តាទាំងនោះមានដូចជា៖

១. ការទំនាក់ទំនង៖
ការទំនាក់ទំនង ជាកត្តាមួយចាំបាច់សម្រាប់អ្នកទាំងពីរ ក្នុងការសន្ទនាគ្នា ទាំងពេលនៅជិត ឬនៅឆ្ងាយពីគ្នា។ ការនៅឆ្ងាយ​ពីគ្នា ដោយមិនបានសន្ទនាគ្នា នោះប្រាកដជាមានការបែកបាក់ជាមិនខាន ដូច្នេះបើអ្នកទាំងពីរនៅស្រលាញ់គ្នា គួរតែរក្សា​ការសន្ទនា ឬជជែកជាមួយគ្នាឲ្យបានញឹកញាប់។

ការសន្ទនាត្រូវមានភាពស្មោះត្រង់។ ទៅបីជាដៃគូររបស់អ្នកនៅឆ្ងាយដល់កំរិតណាក្តី ក៏មិនត្រូវនិយាយកុហកដែរ។ ត្រូវ​និយាយការពិត និងស្មោះត្រង់ ដោយមានភាពជឿជាក់លើគ្នាទៅវិញទៅមក។ ជាពិសេសនៅពេលជជែកគ្នា ត្រូវបើកចិត្ត​ឲ្យទូលាយ និងមានភាពស្និតស្នាលគ្នា។

២. ត្រូវកំណត់ពេលវេលាច្បាស់លាស់ ក្នុងការជជែកគ្នា៖
ការជជែកគ្នាដូចជា តាមរយះទូរស័ព្ទដៃ ឬបណ្តាញសង្គមទំនាក់ទំនងនានា ដោយគ្មានពេលវេលាច្បាស់លាស់ នោះវានឹង​ក្លាយទៅជាការរំខាន ឬគួរឲ្យធុញទ្រាន់ដល់ខាងណាមួយ ជាមិនខាន។

ឧទាហរណ៏៖ មនុស្សរស់នៅមិនមែនមានតែរឿងស្នេហាតែមួយមុខនោះទេ ដែលត្រូវយកចិត្តទុកដាក់នោះ ប្រហែលជា​អ្នកទាំងពីរនៅមានបញ្ហាមួយចំនួនទៀត ដែលត្រូវដោះស្រាយដូចជា បញ្ហាការងារ ការសិក្សារ និងបញ្ហាគ្រួសារជាដើម។ ដូច្នេះប្រការដែលល្អ អ្នកទាំងពីរត្រូវរកពេលវេលាណា ដែលសមគួរដើម្បីជជែកគ្នា ដោយគ្មានសម្ពាត និងដោយភាព​រីករាយ។

៣. ត្រូវជឿជាក់គ្នា៖
នៅពេលដែលអ្នកទាំងពីរនៅឆ្ងាយពីគ្នា វាកាន់តែចាំបាច់ថែមទៀត ក្នុងការបង្កើននូវការជឿជាក់លើគ្នា ព្រោះបើគ្មាន​ការ​ជឿជាក់ទេ វាអាចនឹងកើតទៅជាការប្រច័ណ្ឌខឹង ដែលនាំឲ្យទំនាក់ទំនងស្នេហារបស់អ្នកទាំងពីរ ឈានទៅរកផ្លូវបែកបាក់​បាន។

ប៉ុន្តែដើម្បីទទួលបាននូវការជឿជាក់លើគ្នាទៅវិញទៅមក ទាល់តែអ្នកទាំងពីរធ្វើអ្វីៗ ដើម្បីឲ្យដៃគូរមានការជឿជាក់ ដោយ​បង្ហាញនូវសកម្មភាពស្មោះត្រង់ឲ្យគ្នាបានឃើញ។

៤. កុំឈប់បង្ហាញក្តីស្រលាញ់៖
ការបង្ហាញក្តីស្រលាញ់ជាកាដូ ឬអំណាចមួយ ដែលធ្វើឲ្យស្នេហារបស់អ្នកកាន់តែមានភាពផ្អែមល្ហែម និងអាចនៅគង់​វង្ស​បាន បើទោះបីជាអ្នកទាំងពីរនៅឆ្ងាយគ្នាក៏ដោយ។ ជាងនោះទៅទៀត វារឹតតែធ្វើឲ្យដៃគូររបស់អ្នក មានភាពរីករាយ និង​ពេញចិត្តខ្លាំងថែមទៀតផង។

ផ្ទុយទៅវិញ បើស្នេហារបស់អ្នកទាំងពីរមិនបានបង្ហាញនូវក្តីស្រលាញ់ដល់គ្នាញឹកញាប់ទេ នោះវានឹងនាំឲ្យបាត់បង់​នូវ​ទំនុកចិត្តលើគ្នាបាន។ ដូច្នេះសូមបង្ហាញនូវក្តីស្រលាញ់ ទៅដល់មនុស្សពិសេសរបស់អ្នកឲ្យបានច្រើន ព្រោះវាពិតជា​មិន​ពិបាកនោះទេ បើអ្នកពិតជាស្រលាញ់គាត់ ឬនាងពិតមែន៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២១ ខែឧសភា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ