រឿងដែលនឹកស្មានមិនដល់នោះ គឺមកដល់ពេលបច្ចុប្បន្ន ដែលកូនប្រុសនោះ មានវ័យប្រមាណ ជាង៣ឆ្នាំហើយនោះ បុរស​ជាឪពុក បែរជាមកធ្វើចិត្តបុណ្យ លួងលោម ចង់បានកូននោះទៅ ដោយនិយាយថា ជាកូនរបស់ខ្លួនតែម្នាក់គត់។ មិនតែ​ប៉ុណ្ណោះ ឪពុកដែលបានចុះចោល កូនខ្លួនទើបនឹងកើត និងម្តាយកំសត់ពីរនាក់នេះ ថែមទាំងបានប្រាប់ ឲ្យមេឃុំធ្វើលិខិត​អញ្ជើញ គ្រួសារខាងស្រី ទៅនិយាយសុំស្រុះស្រួល ជាគ្នាវិញ បន្ទាប់ពីអ្នកទាំងពីរ បានបែកគ្នាអស់រយៈពេល ៤ឆ្នាំ មក​ហើយ។

បុរសជាប្តីឈ្មោះ ឡាយ សុភ័ក្រ បានរៀបការជាមួយ អ្នកស្រី ឡេង ណារី។ អ្នកទាំងពីរ រស់នៅជាមួយគ្នា មានកូនប្រុស​ម្នាក់​ឈ្មោះ ឆាំ ពន្លឺ ដែលសព្វថ្ងៃ មានអាយុជាង៣ឆ្នាំ រស់នៅជាមួយយាយតា នៅក្នុងភូមិកូនកក់ ឃុំបាស្រែ ស្រុកអង្គរបូរី ខេត្តតាកែវ ដែលជាស្រុកកំណើតខាងស្រី។ តាមការអះអាង ពីអ្នកស្រី តន់ ថង ជាម្តាយបង្កើត សាមីខ្លួនខាងស្រី បានប្រាប់​ទស្សនាវដ្តីមនោរម្យ.អាំងហ្វូថា ដំបូងកូនរបស់គាត់ បានរៀបការទៅនៅខាងប្តី នៅភ្នំពេញ ពេលកូនស្រីគាត់ ចាប់ផ្តើម​មាន​ផ្ទៃពោះ កូនប្រសារគាត់ចាប់ផ្តើម រករឿងកូនស្រីគាត់ រកលែងលះ។

រហូតដល់ពេលកូនអ្នកស្រី សម្រាលកូន បានតែ៥ថ្ងៃ កូនប្រសារដ៏អប្រិយ បានបណ្តេញនាងចេញពីផ្ទះ រហូតលុះត្រា​មួយ​ខែក្រោយ ទើបបានលែងលះគ្នាដាច់ស្រេច ដោយមានការដឹងលឺពីភូមិ ឃុំ ចេញលិខិតស្នាមត្រឹមត្រូវ។ អ្នកស្រីបន្តថា ដោយ​សារកូនការ មិនបានធ្វើសំបុត្រអាពាហ៍ពិពាហ៍ ទើបលែងលះឲ្យចប់ នៅត្រឹមតែភូមិឃុំនេះ។ បន្ទាប់មក អ្នកស្រីបាន​ទទួល​មើលថែកូន និងចៅប្រុស រហូតដល់សព្វថ្ងៃ។

ទើបតែប៉ុន្មានខែចុងក្រោយនេះ ស្រាប់តែលេចមុខ បុរសអតីតកូនប្រសារ មកលេងផ្ទះគាត់ ជាញឹកញាប់ ហើយបាន​និយាយ ជាមួយគាត់សុំត្រូវគ្នាវិញ និងសុំកូនប្រុស មករស់នៅជាមួយនៅភ្នំពេញ។

តែការស្នើសុំ និងការលើកឡើងទាំងនេះ របស់បុរសអតីតស្វាមី ត្រូវបានអតីតប្រពន្ធ ប្រកែកជាដាច់ខាតថា នាងមិនព្រម​ឡើយ ហើយថែមទាំង មិនឲ្យកូននោះទៅណាទាំងអស់។ ម្យ៉ាងទៀត ឪពុករូបនេះ គ្មានកន្លែងរស់នៅច្បាស់លាស់ នាងជា​ម្ដាយ បារម្ភពីអនាគតកូន។ បន្ទាប់ពីបានការបដិសេធ ពីក្រុមគ្រួសារខាងស្រី បុរស សុភ័ក្រ បានទៅជួបជាមួយមេឃុំ បាស្រែ ហើយមេឃុំ ក៏បានហៅក្រុមគ្រួសារខាងស្រី ទៅសាកសួរនៅថ្ងៃទី២០ ខែឧសភា ឆ្នាំ២០១៥នេះ ជុំវិញបញ្ហា​សុំស្រុះ​ស្រួលគ្នាវិញ ទាំងមេឃុំរូបនេះ បានចេញលិខិតលែងលះ ឲ្យអ្នកទាំងពីររួចហើយ។

ពាក់ព័ន្ធជាមួយបញ្ហានេះ លោក មឿយ ហៀង មេឃុំប្រាស្រែបានបដិសេធថា លោកមិនបានឃុបឃិតគ្នា ជាមួយសាមី​ខ្លួន​ខាងប្រុសទេ គឺលោកធ្វើតាមសម្តីរបស់គេ ដែលចង់ជួបជុំប្រពន្ធកូនវិញប៉ុណ្ណោះ (ចង់ផ្សះផ្សាគ្នា)។ នៅមិនឆ្ងាយពីនេះ លោក ជ័យ បូរ៉ា នាយនគរបាលប៉ុស្តិ៍ឃុំ ប្រាស្រែ ក៏បានបដិសេធដែរថា បើលោកជួយសម្រុះសម្រួលនេះ គឺដោយសារ​ពី​មុន លោកមិនដឹងថា គេលែងលះគ្នា ទើបបានពេលនេះ លោកបានចូលរួមជួយយ៉ាងនេះ៕