កាលពីសប្ដាហ៍មុន ការបញ្ចេញឯកសារជាសម្លេងមួយ ដែលនិយាយពីការហែកហួរគ្នា រវាងមេបក្សប្រឆាំងពីររបស់កម្ពុជា នៅមុនពេលគណបក្សទាំងពីរ បានចូលរួបរួមគ្នា បានជម្រុញឲ្យមានប្រតិកម្មពីសង្គមស៊ីវិល និងប្រជាពលរដ្ឋមួយចំនួន ស្ដីពីការប្រើប្រាស់ប្រព័ន្ធផ្សព្វផ្សាយ សម្រាប់ការបោះឆ្នោតខាងមុខ។

ការជួបជជែកគ្នាមួយ នៅក្នុងប្រព័ន្ធផ្សព្វផ្សាយកម្ពុជា៖ វិទ្យុសម្លេងប្រជាធិបតេយ្យ។ (រូបថត kindcambodia.org)

វិធីសាស្ត្របកអាក្រាត និងបរិហារគ្នាទៅវិញទៅមក ជាជំនាញយ៉ាងចំណាន របស់អ្នកនយោបាយខ្មែរ ហើយវាកំពុងពង្រីក​រូបរាង ក្នុងខណៈពេល ដែលការបោះឆ្នោតសកលឈានជិតមកដល់។

នាយកគណៈកម្មាធិការបោះឆ្នោតដោយសេរី និងត្រឹមត្រូវ (និចហ្វិច) លោក ហ្សង ពុទ្ធា បានលើកឡើងថា នេះជាការ​ធម្មតាទេសម្រាប់មុនពេលបោះឆ្នោត ដែលគណបក្សមានឱកាសច្រើនជាង ប្រើប្រាប់គ្រប់បធ្យោបាយ សម្រាប់ការ​ទាក់​ទាញការគាំទ្រពីប្រជាពលរដ្ឋ និងការទាក់ទាញពីសាធារណៈជន។ លោកបន្តថា ការរៀបចំសម្លេងនេះ ជាការស្វែងរក​កម្សោយ របស់ភាគីខ្លួន និងក៏ ជាយុត្តិសាស្រ្តមួយធ្វើឲ្យដៃគូរនោះមានភាពទន់ខ្សោយ។

តែប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព(PDP) លោក យង់ គឹមអេង បានបញ្ជាក់មកវិញថា បើ​មានបក្សមួយធ្វើបែបនេះ ត្រូវធ្វើឲ្យបានគ្រប់ភាគី និងគ្រប់បក្ស។ គ្រប់បក្សទាំងអស់ តែងតែប្រើនូវមធ្យាបាយផ្សេងៗគ្នា ក្នុងការវាយប្រហារគ្នាដោយពាក្យសំដី ជាមួយនឹងប្រព័ន្ធផ្សព្វផ្សាយ ដែលខ្លួនមាន។  ហេតុដូច្នេះហើយ ទើបតម្រូវឲ្យស្ថិត នៅក្នុងក្របខណ្ឌច្បាប់មួយជាក់លាក់។

កាលបរិចេ្ឆទនៃយុទ្ធនាការឃោសនាបោះឆ្នោត នៅមិនទាន់បានអនុញ្ញាតិដោយ គ.ជ.ប នៅឡើយ។ ដូច្នេះរាល់ការ​ឃោសនាតំណាងឲ្យបក្សមួយ ប្រឆាំង, ផ្លែផ្កា ឬឌឺដង ទៅឲ្យបក្សផ្សេងទៀតជាសាធារណៈ ជាភាពមួយមិនអព្យាក្រិត្យ និងខុសច្បាប់។

បញ្ហានេះ លោក ហ្សង ពុទ្ធា បានបញ្ជាក់ថា ពលរដ្ឋទាំងអស់មានសិទ្ធិបញ្ចេញសម្លេង តែក្នុងបរិបទនេះ អ្នកនយោបាយ​កំពុងតែស្វែងរកចំណេញ ពីគ្នាទៅវិញទៅមក ដោយពុំសូវជាបានគិតពីច្បាប់ទម្លាប់ទេ។ លោកបន្តថា ការផ្សព្វ​ផ្សាយ​នេះ ភាគីដែលត្រូវបានគេផ្សាយ អាចយល់ថា ជាមធ្យោបាយល្អ ក្នុងការចំណេញសន្លឹកឆ្នោតរបស់ខ្លួនវិញ។

ឯលោក យង់ គឹមអេង បង្ហាញថាសេរីភាព នៃការផ្សព្វផ្សាយ និការបញ្ចេញសម្លេងត្រូវតែមាន។ ប៉ុន្តែត្រូវមើលថា​តើការ​ផ្សព្វផ្សាយនេះ បំរើប្រយោជន៍សាធារណជនឬទេ និងត្រូវបែងចែកឲ្យដាច់ រវាងស្ថាប័នផ្សព្វផ្សាយរបស់រដ្ឋ និងឯកជន។ ស្ថាប័នរដ្ឋមិនអាចធ្វើការផ្សាយ ឬត្រូវបានយកទៅប្រើប្រាស់ សម្រាប់តែភាគីម្ខាងនោះទេ ព្រោះជាស្ថាប័នរបស់ជាតិ ដែល​ត្រូវប្រកាន់ខ្ជាប់នូវអព្យាក្រិត្យភាព និងត្រូវផ្សាយឲ្យគ្រប់ភាគីទាំងសងខាង។

អតីតប្រធានមជ្ឍមណ្ឌលអភិវឌ្ឍន៍សង្គម(CSD) និងជាអ្នកវិភាគឯករាជ្យ លោកស្រី ជា វណ្ណាត បានលើកឡើង គ.ជ.ប ក៏ត្រូវធ្វើការត្រួតពិនិត្យ និងពង្រឹងការងនុវត្តច្បាប់ ឲ្យមានប្រសិទ្ធិភាព ដើម្បីជាប្រយោជន៍ស្មើគ្នា សម្រាប់គណបក្សដែល​នឹងត្រូវចូលរួម។

ទាក់ទងនឹងការយកស្ថាប័នរបស់រដ្ឋ មកធ្វើការផ្សព្វផ្សាយ ប្រយោជន៍បុគ្គល ឬបក្សនោះ លោកស្រី ជា វណ្ណាត បញ្ជាក់ថា រដ្ឋាភិបាន ជារដ្ឋបាល មិនមែនជាគណបក្សណាមួយទេ។ ជាស្ថាប័នឯករាជ្យមួយ ដោយមិនចូលកាន់ឃោសនាប្រឆាំង ឬគាំទ្របក្សណាទាំងអស់។ រាល់ការផ្សព្វផ្សាយក្នុងនាមជាស្ថាប័នរដ្ឋ ត្រូវមានជំហរអព្យា ជាកណ្តាល មិនគាំទ្រ ហើយក៏​មិនប្រឆាំង ទើបស្របនឹងទ្រឹស្តីរដ្ឋបាលសាធារណៈ៕

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី០៤ ឧសភា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ