គល់ បញ្ញា៖ មានការចរចា មានការចាប់ខ្លួន? នោះជារឿង«នយោបាយ»
រាល់ការចាប់ខ្លួន«មុន»ការចចារ ឬ«អំឡុង»ពេលចរចា ក្នុងបរិបទកម្ពុជាសព្វថ្ងៃនេះ ត្រូវបានលោក គល់ បញ្ញា នាយកប្រតិបត្តិនៃគណៈកម្មាធិការ ដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ជាភាសាអង់គ្លេសថា COMFREL បានចាត់ទុកថា ជារឿង«នយោបាយ»តែមួយ។ លោកបានថ្លែងថា ការប្រើប្រាស់កម្លាំងប្រដាប់អាវុធរបស់ជាតិ ការប្រើប្រាស់តុលាការ ការប្រើប្រាស់អាជ្ញាធរបិទទីលានប្រជាធិបតេ្យ ក្នុងគោលបំណងតែមួយគត់ គឺការដាក់សម្ពាធខាងនយោបាយ ស្វែងរកកិច្ចចរចាជាមួយគណបក្សប្រឆាំង។
លោកបានលើកជាឧទាហរណ៍ជាក់ស្តែងមួយថា លទ្ធផលនៃការចរចាថ្ងៃទី២២ ខែកក្កដា ឆ្នាំ២០១៤ ថ្មីៗនេះ ជាលទ្ធផលដែលបានមកពីការគម្រាមកំហែង និងតាមរយៈការចាប់ខ្លួន អ្នកតំណាងរាស្រ្តគណបក្សប្រឆាំងចំនួនប្រាំបីនាក់ ក្រោយហេតុការណ៍ថ្ងៃទី១៥ ខែកក្កដា ឆ្នាំ២០១៤ [...]