«ខ្ញុំនិងគ្រួសារ ស៊ូលះបង់ដើម្បីប្រយោជន៍ជាតិ»
- ដោយ: អ៊ុម វ៉ារី ដោយ អ៊ុម វ៉ារី (ទាក់ទង៖ [email protected]) - ភ្នំពេញ ថ្ងៃទី១៨ វិច្ឆិកា ២០១៤
- កែប្រែចុងក្រោយ: November 18, 2014
- ប្រធានបទ: យុត្តិធម៌
- អត្ថបទ: មានបញ្ហា?
- មតិ-យោបល់
-
ក្រោយជំនួបជាមួយស្វាមី លោក មាជ សុវណ្ណរ៉ា ក្នុងពន្ធនាគារថ្ងៃទី១៧ ខែវិច្ឆិកានេះ លោកស្រី សិទ្ធិ ចំរើន ដែលឈ្មោះក្នុងសញ្ជាតិអាមេរិកហៅថា ជេមី មាជ (Jemie Meach) បានថ្លែងទៅកាន់អ្នកសារព័ត៌មានថា លោកស្រីមិនចង់ឃើញប្រទេសកម្ពុជា និងប្រព័ន្ធតុលាការរបស់កម្ពុជា ព្រោះតែដោះស្រាយភាពជាប់គាំងនយោបាយ ដើម្បីតែប្រយោជន៏បុគ្គល ឬប្រយោជន៍គណបក្សនយោបាយណាមួយ បង្ខំឲ្យគេ (ភាគីបដិបក្ខ) ទទួលយកនូវការចង់បានរបស់ខ្លួន តាមរយៈការចាប់ខ្លួន ឬការគម្រាមតាមប្រព័ន្ធតុលាការនោះឡើយ។
សម្ដីរបស់លោកស្រី ទំនងចង់និយាយពីការចាប់ខ្លួនស្វាមីលោកស្រី ដែលបានរងការចោទប្រកាន់ថា បានប្រើប្រាស់ប្រព័ន្ធតុលាការជាលេស ដើម្បីយកមកតថ្លៃផ្នែកនយោបាយ នៅក្នុងកិច្ចកែទម្រង់មួយ ស្ដីពីគណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប។ លោកស្រីបានថ្លែងថា៖ «ដើម្បីបានគ.ជ.ប "ឯករាជ្យ" នាងខ្ញុំសុខចិត្តឲ្យប្តីនាងខ្ញុំជាប់ពន្ធនាគារ។ (...) ចង់បានប្រទេសឯករាជ្យ និងប្រព័ន្ធតុលាការគោរពនូវច្បាប់ត្រឹមត្រូវ។ ( ...) ខ្ញុំនិងគ្រួសារ ស៊ូលះបង់ដើម្បីប្រយោជន៍ជាតិទាំងមូល។»
លោកស្រី ដែលមានអតីតភាព ជាសាស្ត្រចារ្យមួយរូបនោះ បានបញ្ជាក់ទៀតថា «កុំយកគ្រួសារខ្ញុំមកដោះដូរ ជាគោលនយោបាយ។ ធ្វើយ៉ាងណាឲ្យប្រទេសខ្មែរមានឯករាជ្យ គ.ជ.ប ឯករាជ្យត្រឹមត្រូវ តុលាការឯករាជ្យត្រឹមត្រូវ។ (..) សូមតុលាការគោរពឆន្ទៈប្រជាពលរដ្ឋ គោរពច្បាប់។ មិនត្រូវចាប់មនុស្ស ក្នុងហេតុផលនយោបាយឡើយ។»
លោកស្រីបានបន្ថែមទៀតថា លោកស្រីនឹងមិនប្រថុយ និងមិនយល់ព្រមឡើយ បើការដោះដូរសេរីភាព គ្រួសារលោកស្រីតែមួយនេះ ហើយទទួលបានមកវិញ នូវ គ.ជ.ប មួយ«មិន»ឯករាជ្យ ឬដើម្បីតែសុខផ្ទាល់ខ្លួន បង្កឲ្យមាន«ទុក្ខ»វេទនាដល់ប្រជាពលរដ្ឋខ្មែរទាំងមូលនោះឡើយ។
សូមស្តាប់កិច្ចសម្ភាសលោកស្រី ជាមួយនឹងអ្នកសារព័ត៌មានដូចខាងក្រោម៖