ហ៊ុន សែន ឲ្យស៊ើរើច្បាប់ហាម សម រង្ស៊ី-កឹម សុខា ដឹកនាំគណបក្ស
ល្បែងនយោបាយ របស់លោក ហ៊ុន សែន កំពុងបន្តមានទៅមុខ មិនចេះអស់។ នេះ បើតាមការអះអាង ដោយផ្ទាល់មាត់ ចេញពីបបូរមាត់របស់លោក ហ៊ុន សែន នាយករដ្ឋមន្ត្រីកម្ពុជា តាមរយៈឧឃោសនស័ព្ទរដ្ឋសភា នៅក្នុងអង្គប្រជុំមួយ ដើម្បីដកតំណែងលោក កឹម សុខា អនុប្រធាន (សព្វថ្ងៃជាប្រធានស្ដីទី) គណបក្សសង្គ្រោះជាតិ ចេញពី «ប្រធានក្រុមមតិភាគតិច» នៃរដ្ឋសភា កាលពីព្រឹកថ្ងៃអង្គារនេះ។
នាយករដ្ឋមន្ត្រីបីទសវត្សន៍ជាង របស់កម្ពុជា បានព្រមានជាថ្មីថា លោកសំណូមពរ ឲ្យស្វែងរកនីតិវិធីមួយចំនួន ក្នុងការឈាន ទៅធ្វើវិសោធនកម្មច្បាប់ ស្ដីពីគណបក្សនយោបាយ ដើម្បីខារខាំងបុគ្គល ជាអ្នកនយោបាយណាក៏ដោយ ដែលមានទោសជាប់ខ្លួន ឡើងមកដឹកនាំគណបក្ស។
ក្នុងកាយវិការ ដៃម្ខាងចង្អុលទៅមុខ និងដៃម្ខាងទៀតកាន់ទូរស័ព្ទ លោក ហ៊ុន សែន បាននិយាយឡើងថា៖ «ធ្វើវិសោធនកម្មច្បាប់ ស្ដីពីបក្សនយោបាយ ក៏ត្រូវតែធ្វើ។ វិសោធនកម្ម ៥០បូក១ ទេតើ។ ដាក់ថែម អ្នកដែលមានទោស [...]
