រឿងរ៉ាវថ្មីមួយទៀត របស់វិទ្យុសម្លេង «ABC» របស់លោក សេង ប៊ុនវ៉េង ហៅអាចារ្យ «A» ត្រូវបាន​អ្នក​ប្រើ​ប្រាស់​​ហ្វេសប៊ុក​មួយរូប ទម្លាយឲ្យដឹង កាលពីប៉ុន្មានម៉ោងមុន តាមរយៈ​​ការបង្ហោះ នៅលើបណ្ដាញ​សង្គម នូវ​​វីដេអូ​នៃ​បទ​​យក​​ការណ៍​​អង្កេត​​មួយ របស់ទូរទស្សន៍ថៃ ឈ្មោះ «Thai PBS (Thai Public Broadcasting Service)» ស្ដី​ពី​ការ​នាំ​ចូលផលិតផល «ទឹកដោះគោ» ម្យ៉ាង ចូលមក​ធ្វើ​ចរាចរណ៍​លក់ដូរ នៅ​ក្នុង​ប្រទេស​កម្ពុជា។

អ្នកប្រើប្រាស់បណ្ដាញសង្គម ដែលដាក់​ឈ្មោះ​ខ្លួន ជាភាសាថៃ «คุณชาย โอ้» បាន​សរសេរ អមនឹង​ការបង្ហោះ​វីដេអូ​នោះ​ថា៖ «ក្រុមការងារ​របស់ "Thai PBS" ប្រចាំប្រទេសថៃ បានចុះទៅ​ស្រាវជ្រាវ គ្រប់​ប៉ុស្ដិ៍​វិទ្យុ "ABC" ក្នុង​ខេត្ត​ក្រុង​នានា នៅទូទាំងប្រទេសកម្ពុជា»។

លោក «คุณชาย โอ้» បានសរសរ​ពីការរកឃើញ របស់ក្រុមការងារ​របស់ទូរទស្សន៍ថៃថា ទឹក​ដោះ​គោ​ម្យ៉ាង ​(ហៅ​ជា​ភាសា​ថៃ "นมโรงเรียน") របស់​ប្រទេស​ថៃ ដែលត្រូវបានរដ្ឋាភិបាលថៃ អនុញ្ញាត​ឲ្យផលិត ដើម្បី​ទុក​ចែក​ចាយ ដោយ​មិន​គិតកម្រៃ ទៅឲ្យសិស្សសាលា ឬ ក្មេងរៀនតូចៗនោះ ត្រូវបានវិទ្យុ «ABC» របស់​លោក​ ​អាចារ្យ «A» នាំ​ចូល​ដោយ​ខុសច្បាប់ ដើម្បី​លក់​យក​កម្រៃ មកក្នុងប្រទេសកម្ពុជា។

លោក «คุณชาย โอ้» បានសរសេរថា៖ «វិទ្យុ "ABC" ដែលមានអាចារ្យ អេ ជាបងធំ បានលួច​នាំ​យក​ទឹក​ដោះ​គោ ដោយ​គ្មាន​ការអនុញាត និង​ខុសច្បាប់ មកចែកចាយលក់ ឲ្យពលរដ្ធខ្មែរ និងនៅតាម​បណ្តា​ខេត្ត​ក្រុង​នានា ​ក្នុង​ប្រទេស​កម្ពុជា»។ ប្រិយមិត្តអ្នក​ប្រើប្រាស់ បណ្ដាញសង្គម រូបនេះ បានសរសេរ​បន្ត​ទៀត​ថា៖ «ចំណែក​កូន​ខ្មែរ​យើង អត់​មាន​នរណា​ដឹង​ម្នាក់​សោះ អញ្ចឹង​តើ (ទើប)ក្រុម​របស់​វិទ្យុ "ABC" បោក​ប្រាស់​បាន»។

ភ្លាមៗនេះ គេមិនឃើញមានប្រតិកម្មពីវិទ្យុ «ABC» ឬពីក្រុមការងារ របស់វិទ្យុនេះនៅឡើយ ហើយ​ទស្សនាវដ្ដី​មនោរម្យ.​អាំងហ្វូ ក៏មិនអាច​ទាក់ទង​សុំប្រតិកម្មបានដែរ ដោយសារ​វេលានេះ ជា​ពេល​យប់ នៅ​ក្នុង​ប្រទេស​កម្ពុជា។ ប៉ុន្តែ​ទស្សនាវដ្ដី នឹង​ត្រឡប់​មក​ជម្រាប ប្រិយមិត្តអ្នកអាន​វិញ នៅក្នុងអត្ថបទ​លើក​ក្រោយ​របស់​ខ្លួន បើសិន​ណា​ជា​មាន​ដំណឹង​ថ្មី។​

រឿងរ៉ាវនេះ បានបន្ថែម​ករណីដ៏រសើបមួយទៀត សម្រាប់វិទ្យុផ្សាយ​សម្លេង «ABC» របស់​លោក សេង ប៊ុនវ៉េង ហៅអាចារ្យ «A» បន្ទាប់ពី​ហេតុការណ៍ រថយន្ដសង្គ្រោះដឹកទឹកត្របែក ទៅដាក់ឲ្យ«ម៉ូយ» កាលពី​ប៉ុន្មាន​ខែ​កន្លង​មក និង​ហេតុការណ៍ ហក់​រំលងតុ សំដីសំដៅ​កាយ​វិការ មិនសម​ប្រកប ពីសំណាក់​ធីការិនីម្នាក់ របស់​វិទ្យុ​នេះ កាល​ពី​ពីរ​សប្ដាហ៍​មុន។

រឿងរ៉ាវ «ដឹកទឹកត្របែក» ដ៏ចម្រូងចម្រាស់នោះ មិនបានធ្វើឲ្យវិទ្យុនេះ រួមនឹងថ្នាក់ដឹកនាំវិទ្យុផង រងការពិន័យអ្វីឡើយ ដោយ​សារ​លោក​នាយករដ្ឋមន្ត្រី ហ៊ុន សែន បាន​ចេញ​មុខ មកចូលជួយ​អន្តរាគមន៍។ ផ្ទុយ​ទៅ​វិញ រឿងរ៉ាវ «ហក់​រំលង​តុ របស់​ពិធីការិនី» បាន​ធ្វើ​ឲ្យ​វិទ្យុ​មួយ​នេះ «សើច​លែង​សម» ដោយ​សារ​​រដ្ឋមន្ត្រី​​ក្រសួង​​ព័ត៌មាន លោក ខៀវ កាញារីទ្ធ បាន​ចេញ​សេចក្ដី​សម្រេច កាលពីសប្ដាហ៍មុន ហាមវិទ្យ​នេះ មិនឲ្យធ្វើ​កម្មវិធី «ABC 3 SPRING» របស់​ខ្លួន​ត​ទៅ​ទៀត៕

» វីដេអូបទយកការណ៍ របស់ទូរទស្សន៍ថៃ បង្ហោះដោយប្រិយមិត្តហ្វេសប៊ុក៖

» វីដេអូបទយកការណ៍ពេញ របស់ទូរទស្សន៍ថៃ៖