បទយកការណ៍«សប្បាយដូចនៅស្រុកខ្មែរ» របស់ទូរទស្សន៍បារាំង
នៅកម្ពុជា មិនមែនមានតែរបបខ្មែរក្រហម ឬជាប្រទេសក្រីក្រជាងគេ ដែលល្បីល្បាញ តែខាងការជួញដូរមនុស្ស អំពើពុករលួយ ឬការបំផ្លាញធនធានធម្មជាតិនោះទេ ប៉ុន្តែប្រទេសកម្ពុជា នៅមានវប្បធម៌ដ៏ល្អល្អះ ធម្មជាតិដ៏ត្រកាល និងស្នាមញញឹមប្រឹមប្រិយ របស់ពលរដ្ឋខ្មែរទៀត ដែលបានធ្វើឲ្យជនជាតិបរទេសកាន់តែច្រើនឡើងៗ ធ្លាក់ក្នុងអន្លង់ស្នេហ៍សារជាថ្មី នៃប្រជាជាតិនៅអាស៊ីអាគ្នេយ៍នេះ។
សម្រាប់ជនជាតិបារាំង ប្រទេសតូចដែលពោរពេញ ដោយសម្រស់មួយនេះ នៅតែជាអនុស្សាវរីយ៍ដក់ជាប់ក្នុងចិត្ត តាំងពីសម័យអាណានិគមនិយមមកម្លេះ។ ដោយសារតែការស្រឡាញ់ប្រទេសកម្ពុជា ដែលស្ថិតក្នុងចិត្តរបស់ជនជាតិបារាំងទាំងនេះហើយ ទើបក្នុងពេលបច្ចុប្បន្ន មានជនជាតិបារាំងមិនតិចជាង៦០០០នាក់ឡើយ បានចូលមកបោះទីតាំង ប្រមូលទាំងគ្រួសារមករស់នៅ [...]
