រកឃើញមីក្រូរបស់អ្នកកាសែត ដែលត្រូវ រ៉ូណាល់ដូ កញ្ឆក់រួចគ្រវាត់ចូលទឹកបឹង
មីក្រូថតសម្លេងដ៏កំសត់... បន្ទាប់ពីត្រូវបានអ្នកសារព័ត៌មានប្រើញក់ញ៉ីរួច នៅទីបំផុតមីក្រូថតសម្លេងឯង ត្រូវបានកីឡាករល្បីឈ្មោះ កញ្ឆក់យកទៅគ្រវាត់ចោល នៅក្នុងទឹកបឹង។ ហេតុការណ៍ បានកើតឡើងនៅថ្ងៃទី២២ ខែមិថុនាកន្លងទៅ នៅក្នុងដំណើរលំហែអារម្មណ៍មួយ របស់ក្រុមកីឡាករជម្រើសជាតិព័រទុយហ្គាល់ នៅមុនជំនួបជាមួយនឹងក្រុម ហុងគ្រី នៅកីឡាដ្ឋានក្រុង លីយ៉ុង ភាគខាងត្បូងប្រទេសបារាំង។
ប៉ុន្តែអ្នកសារព័ត៌មានមួយរូប របស់ទូរទស្សន៍ព័រទុយហ្គាល់ «CMTV» បានឆ្លៀតឱកាសនោះ ដើម្បីសាកសួរមួយម៉ាត់ពីរ ទៅកាន់កីឡាករដ៏ល្បីឈ្មោះ គ្រីស្ទៀណូ រ៉ូណាល់ដូ (Cristiano Ronaldo) ដែលកំពុងមានវត្តមាន នៅក្នុងការលំហែនោះដែរ។
រំពេចនោះ កីឡាករ គ្រីស្ទៀណូ រ៉ូណាល់ដូ ដែលកំពុងស្អប់អ្នកសារព័ត៌មាន ព្រោះតែការដាក់សម្ពាធ មកលើខ្លួនឯងជាងគេស្រាប់ផង បានកញ្ឆក់មីក្រូពីដៃអ្នកកាសែត ហើយបានគ្រវែងមីក្រូដ៏កំសត់ ចូលទៅក្នុងទឹកបឹង [...]
