ហ៊ុន សែន៖ សម រង្ស៊ី នឹងមិនត្រឡប់មកស្រុកខ្មែរវិញ មួយជីវិត
«មើលអ្នកក្លាហាន សូមអញ្ជើញ! ទ្វារចំហរហើយ!» នេះជាសំដីចំអក របស់លោក ហ៊ុន សែន នាយករដ្ឋមន្ត្រី-ប្រធានគណបក្សប្រជាជនកម្ពុជា តបទៅលោក សម រង្ស៊ី អតីតប្រធានគណបក្សសង្គ្រោះជាតិ នៅមួយថ្ងៃ បន្ទាប់ពីបុរសខ្លាំងកម្ពុជារូបនេះ បានលុបចោលនូវបទបញ្ជា ដែលហាមប្រាមក្រុមហ៊ុនយន្ដហោះ មិនឲ្យដឹកមេដឹកនាំប្រឆាំងត្រឡប់ចូលកម្ពុជាវិញ។ លោកនាយករដ្ឋមន្ត្រី នៅបានអះអាងទៀតថា លោក សម រង្ស៊ី នឹងមិនអាចត្រឡប់មកកម្ពុជាវិញ អស់មួយជីវិត ដោយសារ«គុក» នៅរង់ចាំលោក។
ថ្លែងក្នុងពិធីចែកសញ្ញាបត្រ ជូននិស្សិតសាកលវិទ្យាល័យបញ្ញាសាស្រ្ត នាព្រឹកថ្ងៃទី១៥ ខែមិថុនា ឆ្នាំ២០១៧នេះ លោក ហ៊ុន សែន បានថ្លែងថា៖ «ពីមុនខ្ញុំគិតសុវត្ថិភាពលោក (លោក សម រង្ស៊ី) តែឥឡូវដោយសារលោកថាមកភ្លាម ខ្ញុំក៏អុកភ្លាមដែរ។ អត់ទាន់បាន ១០ម៉ោងផង ប្តូរចិត្តថាអត់មកទេ។ អ៊ីចឹង បានក្នុងបទអត្ថាធិប្បាយបិទកន្ទុយចុងក្រោយរបស់ខ្ញុំ [...]
