លួចគោ១យប់៣ក្បាល វះយកតែភ្លៅនិងសាច់
តើចោរទាំងនេះ មានជំនាញខាងកាប់គោយកសាច់ឬ? ព្រោះគោហូតដល់ទៅ៣ក្បាល ត្រូវបានក្រុមចោរយកទៅកាប់តែមួយយប់ រួចវះយកតែសាច់ទៅអស់។
ករណីលួចគោមួយយប់អស់បីក្បាលនេះ បានកើតឡើងនៅម៉ោងប្រមាណជា០១ រំលងអធ្រាត ឈានចូលថ្ងៃទី១០ ខែមករា ឆ្នាំ២០១៥នេះ ក្នុងភូមិត្រពាំងទួល ឃុំសំរោងលើ ស្រុកអង្គស្នួល ខេត្តកណ្តាល។ ជនរងគ្រោះដែលជាម្ចាស់គោ លោក ជឿន សុធា បានថ្លែងថា គោរបស់លោកដែលបានបាត់ទាំងបីក្បាលនេះ មានញី១ក្បាល និងឈ្មោល២ក្បាល។
ម្ចាស់គោជាកសិករ អាយុ៣៦ឆ្នាំ ដដែល បាននិយាយថា នៅមុនពេលកើតហេតុ ប្រហែលជាម៉ោង១១យប់ លោកបានបានចុះទៅដាក់ចំបើងឲ្យគោស៊ី មុននឹងត្រឡប់មកដេកនៅផ្ទះវិញ។ ប៉ុន្តែនៅពេលលោកភ្ញាក់ឡើង នៅវេលាម៉ោងប្រហែល០៤ទាបភ្លឺ ស្រាប់តែបាត់គោអស់ពីក្រោលរលីង។ លោកបានស្រែកឆោរឡោឡើង រហូតដឹងដល់អ្នកជិតខាង រួចបាននាំគ្នាដើររក [...]