អ្នកបើកតាក់ស៊ីដែលបុកមនុស្សនៅម៉ូស្គូ ថាបានធ្វើការ២០ម៉ោងក្នុង១ថ្ងៃ
នៅក្នុងវីដេអូមួយ ដែលត្រូវបានផ្សព្វផ្សាយ ដោយអាជ្ញាធររ៉ូស្ស៊ី បានបង្ហាញពីបុរសម្នាក់ ដែលបានថ្លែងឡើងថា ខ្លួនបានសម្រាក ត្រឹមតែ២ឬ៣ម៉ោងប៉ុណ្ណោះ មុននឹងងើបឡើង មកធ្វើការ។ បុរសនោះបានពន្យល់ថា ខ្លួនបានច្រឡំជាន់បន្ថែមល្បឿន ជាជាងជាន់លើហ្វ្រាំង ដែលជាអ្វី ដែលខ្លួនបានបាត់ការត្រួតពិនិត្យ ទៅលើយានយន្ដរបស់ខ្លួន។
ជាមួយនឹងសំដី សុំការអភ័យទោស ពីបណ្ដាជនរងគ្រោះទាំងអស់នោះ បុរសខាងលើ បានថ្លែងឡើងថា៖ «ខ្ញុំមិនបានដឹងរឿង ដែលបានកើតឡើងទេ»។
បើតាមឯកសារមួយ ដែលត្រូវបានបង្ហោះផ្សាយ ដោយអាជ្ញាធររ៉ូស្ស៊ីដែរនោះ បានពន្យល់ថា បុរសអ្នកបើកតាក់ស៊ីរូបនេះ មានអាយុ២៨ឆ្នាំ និងជាជនជាតិ គៀរជីស្ដង់។ បុរសបានរត់ចេញ ពីកន្លែងកើតហេតុ តែត្រូវបានឃាត់ខ្លួន នៅក្បែរកន្លែងកើតហេតុ ក្នុងពេលបន្តិចក្រោយមក។ អ្នកបើកបរតាក់ស៊ីរូបនេះ បានពន្យល់ ពីការគេចខ្លួនចេញនោះ ថាបណ្ដាលមកពី ខ្លួនបារម្ភខ្លាចត្រូវគេសម្លាប់ នៅនឹងកន្លែង។
[...]
