អេនជឺលីណា ជូលី នឹងមកថតកុននៅកម្ពុជា ផលិតដោយកូនខ្លួន
ភាពយន្ដទីបី របស់តារាសម្ដែង ដ៏ល្បីឈ្មោះ របស់ហូលីវូដ នាង អេនជឺលីណា ជូលី នឹងថតឡើងវិញ ពីការសម្លឹងមើលឃើញ របស់កុមារ ទៅក្នុងឈុតឆាក ដ៏សាហាវឬស្សា នៃរបបប្រល័យពូជសាសន៍ ខ្មែរក្រហម។ នេះបើតាមការប្រកាស ឲ្យដឹងកាលពីថ្ងៃព្រហស្បត្តិ៍ របស់គេហទំព័រ «Netflix» ដែលធ្វើអាជីវកម្មភាពយន្ដ នៅតាមបណ្ដាញអ៊ិនធើណែត។
នាង ជូលី នឹងតម្លើងភាពយន្ដនេះឡើង ដោយដកស្រង់គំនិត តាមសៀវភៅមួយ ដែលមានចំណងជើងថា «មុនដំបូង ខ្មែរក្រហមបានសម្លាប់ប៉ារបស់ខ្ញុំ» និងជាស្នាដៃនិពន្ធ ដោយអ្នកស្រី លឿង អ៊ឹង ក្នុងការរៀបរាប់ឡើងវិញ ពីជីវិតដ៏ខ្លោចផ្សារ នៅក្នុងរបបវាលពិឃាត ៣ឆ្នាំ៨ខែ២០ថ្ងៃ រវាងពីឆ្នាំ១៩៧៥ មកឆ្នាំ១៩៧៩។ គេហទំព័រ «Netflix» បានស្រង់សំដីរបស់នាង ជូលី មកបញ្ជាក់ថា៖ «សៀវភៅរបស់អ្នកស្រី លឿង បានធ្វើឲ្យអារម្មណ៍ខ្ញុំ ស្រយ៉ុតស្រយ៉ង់ណាស់។ វាជួយឲ្យខ្ញុំយល់ កាន់តែខ្លាំងឡើង ថាតើកុមារមានេះជីវិតបែបណា នៅក្នុងពេលមានសង្គ្រាម [...]