បួនលើកមកហើយ ដែលព្រះសង្ឃរាប់ពាន់អង្គ បាននិមន្តសូត្រធម៌ប្រោះព្រំលើដងវិថីសំខាន់ៗ បន្ទាប់ពីមានគ្រោះថ្នាក់​ចរាចរណ៌ធំៗ នៅក្នុងទីក្រុងភ្នំពេញ និងតាមបណ្តាខេត្តមួយចំនួនក្នុងប្រទេសកម្ពុជា។

គ្រោះថ្នាក់ចរាចរណ៍មួយ នៅតាមដងផ្លូវមួយ ក្នុងខេត្តស្ទឹងត្រែង។

ការផ្តួចផ្តើមឲ្យមាននូវពិធីនេះឡើង បន្ទាប់ពីគ្រោះថ្នាក់ធំជាច្រើនលើក កើតមាននៅដើមឆ្នាំ២០១៣នេះ ដែលបណ្តាល​ឲ្យ​អ្នកបើកបរ និងអ្នកធ្វើដំណើរតាមផ្លូវ រងគ្រោះថ្នាក់ដល់ជីវិត និងរងរបួសធ្ងន់ស្រាល ជាច្រើននាក់។

ប្រធានក្រុមហ្វេសបុកមួយមានឈ្មោះថា ព័ត៌មានជាតិថ្មីៗដោយសេរី និងប្រតិកម្មរហ័យ លោកខ័ណ្ឌ ច័ន្ទសុផល បាន​និយាយកាលពីថ្ងៃច័ន្ទ ទី១ ខែមេសា ឆ្នាំ២០១៣ថា លោកជាអ្នករៀបចំ ឲ្យមាននូវការធ្វើពិធីនិមន្តព្រះសង្ឃ សូត្រមន្ត​ប្រោះព្រំនៅតាមផ្លូវ ដែលមានគ្រោះថ្នាក់ចរាចរណ៍ធំៗនោះ ដូចជានៅផ្លូវជាតិលេខ៤ ស្ពានគីសូណា ខេត្តកំពង់ចាម ផ្លូវ​មុន្នីរ៉េត និងផ្លូវព្រះមុន្នីវង្សក្នុងទីក្រុងភ្នំពេញ ទៅកាន់ក្រុងតាខ្មៅខេត្តកណ្តាលជាដើម។

លោកច័ន្ទសុផលបានថ្លែងថា៖ «ខ្ញុំបានចាប់ផ្តើមធ្វើពិធីនិមន្តព្រះសង្ឃ សូត្រធម៌ដេញគ្រោះចង្រៃ និងលើករាសីតាមផ្លូវ ដែលមានគ្រោះថ្នាក់ធ្ងន់ធ្ងរ តាំងពីដើមខែមិនា បន្ទាប់ពីនិស្សិតពេទ្យម្នាក់ បានបង្កឲ្យមានគ្រោះថ្នាក់ចរាចរណ៍ រហូតមាន​ក្មេងបីនាក់ បានស្លាប់ភ្លាមៗនៅនឹងកន្លែង»។

ក្នុងពិធីនោះ លោកបាននិមន្តព្រះសង្ឃជាច្រើនរយអង្គសូត្រព្រះធម៌ និងប្រោះព្រំដេញគ្រោះចង្រៃ ចាប់ពីវិមានឯករាជ្យ រហូតដល់ស្ពានអាកាសព្រះមុន្នីវង្ស (ស្ពានច្បារអំពៅ)។ ពិធីនេះមានការចូលរួម ពីប្រជាពលរដ្ឋរាប់ពាន់នាក់ផងដែរ។

លោកខ័ណ្ឌ ច័ន្ទសុផលបានអះអាងថា៖ «មានប្រជាពលរដ្ឋប្រមាណជាជាង៣ម៉ឺននាក់ បានចូលរួមជាមួយខ្ញុំ ទាំង៤លើក​ដែលខ្ញុំបានធ្វើ ដោយមានអ្នកខ្លះ បានផ្តល់ជាថវិកាដើម្បីជួលឡានដឹកព្រះសង្ឃ និងទិញភេសជ្ជៈប្រគេនព្រះសង្ឃ និងអ្នក​ចូលរួមផងដែរ»។

ហេតុផល ដែលបានជម្រុញអោយលោកមានគំនិតធ្វើបែបនេះ គឺដោយសារតែលោកចង់ឲ្យប្រជាពលរដ្ឋខ្មែរ ក៏ដូចជាអ្នក​ដំណើរទាំងអស់ជួបប្រទះ តែសុខសប្បាយដោយសារបារមី និងការប្រោះព្រំបណ្តេញគ្រោះចង្រៃ មិនឲ្យកើតមានដល់​ពួកគេ។

លោកច័ន្ទសុផល បានបន្តថា៖ «ខ្ញុំមិនមែនធ្វើបែបនេះ ដើម្បីបង្ហាញឲ្យអ្នកធ្វើដំណើររាល់គ្នា ជឿជាក់១០០%នោះទេ ហើយ​បន្តឲ្យពួកគេ ធ្វើការបើកបរដោយបំពាន និងមិនគោរពច្បាប់ចរាចរណ៏នោះទេ តែនេះគ្រាន់តែជាជំនឿ របស់ខ្មែរតែ​ប៉ុណ្ណោះ។ សូមឲ្យអ្នកប្រើប្រាស់ផ្លូវទាំងអស់គ្នា គោរពច្បាប់ចរារចណ៏ និងអធ្យាស្រ័យឲ្យគ្នា ទៅវិញទៅមកពេល​ធ្វើ​ដំណើរ»។

គួរបញ្ជាក់ដែរថា កាលពីរសៀលថ្ងៃទី៣១ ខែមិនា ឆ្នាំ២០១៣ រូបលោក ច័ន្ទសុផលដដែលនេះ ក៏ជាអ្នកបានរៀបចំនិមន្ត​ព្រះសង្ឃ ប្រមាណជាជាង១០០អង្គ មកពី៥វត្តក្នងរាជធានីភ្នំពេញ ធ្វើការសូត្រធម៌ពីគល់ស្ពានអាកាសព្រះមុន្នីវង្ស ដើម្បី​សូត្រមន្តប្រោះព្រំលើកំណាត់ផ្លូវជាតិលេខ២ ទៅដល់រង្វង់មូលព្រះនរាយណ៏ក្រុងតាខ្មៅ ខេត្តកណ្តាល និង ដោយមានការ​ប្រកាន់ខ្ជាប់នូវពាក្យស្លោកមួយថា «ថ្ងៃនេះ និងថ្ងៃស្អែក សូមកុំឲ្យមាន គ្រោះថ្នាក់ចរាចរណ៏កើតមានឡើង»។

លោកខ័ណ្ឌ ច័ន្ទសុផល បានមានប្រសាសន៌ឲ្យដឹងទៀតថា មានព្រះសង្ឃរាប់ពាន់អង្គ បានចូលរួមសហការណ៍ ជាមួយ​លោកក្នុងការការពារជីវិត អ្នកធ្វើដំណើរតាមផ្លូវ ដោយបានរួមគ្នាប្រោះព្រំលើករាសី និងផ្សព្វផ្សាយឲ្យពលរដ្ឋទាំងអស់ ការពារជីវិតរបស់ខ្លួន ដោយគោរពច្បាប់ចរារណ៌ និងប្រុងប្រយ័ត្នខ្ពស់ ពេលធ្វើដំណើរជិត ឬឆ្ងាយ។

ដោយឡែក លោករដ្ឋមន្រ្តីក្រសួងព័ត៌មាន លោកខៀវ កាញារិទ្ធ ក៏បានអំពាវនាវ ទាក់ទងនឹងគ្រោះថ្នាក់ចរាចរណ៍នេះដែរ កាលពីថ្ងៃពុធទី២៧ ខែមិនា ឆ្នាំ២០១៣ ថាសមត្ថកិច្ចពាក់ព័ន្ធ ត្រូវតែធ្វើសំណុំរឿងពាក់ព័ន្ធ នឹងគ្រោះថ្នាក់ចរាចរណ៍ ទៅ​តុលាការដើម្បីដាក់ទោសជនបង្កហេតុ ដោយគ្មានការលើកលែង។

យោងតាមរបាយការណ៏បណ្តោះអាសន្ន របស់នាយកដ្ឋានកណ្តាលសណ្តាប់ធ្នាប់ នៃក្រសួងមហាផ្ទៃ ចំពោះវិធានការ​ដោះស្រាយ ករណីគ្រោះថ្នាក់ចរាចរណ៍ ក្នុងឆ្នាំ២០១២បានឲ្យដឹងថា មានសំណុំរឿងចំនួន៩៨៣ករណី ត្រូវបាន​បញ្ជូន​ទៅតុលាការ ដែលក្នុងនោះមានការសំរុះសំរួល ចំនួន២២៣៤ករណី និងកំពុងបន្តការស៊ើបអង្កេត ចំនួន១១៣៣ករណី។

មន្ត្រីក្រសួងសាធារណការ និងដឹកជញ្ជូនបានឲ្យដឹងថា ៩៥ភាគរយនៃគ្រោះថ្នាក់ចរាចរណ៍ កើតមានឡើង​ដោយសារ​កត្តាមនុស្ស។

-----------------------------------------------
ដោយ ៖ គិន ងុយ - ភ្នំពេញ ថ្ងៃទី០១ ខែមេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ