កីឡាករវាយកូនបាល់ អេនឌី មួរ៉េ (Andy Murray) បានដណ្តើមបានចំណាត់ថ្នាក់លេខ២ ពិភពលោក បន្ទាប់ពីយកឈ្នះ ដេវ៊ីដ ហ្វឺរឺ (David Ferrer) ដោយលទ្ធផល ២-៦ ៦-៤ ៧-៦ (៧-១) ហើយបានឈ្នះពានរង្វាន់ សូនី អូផិន (Sony Open) នៅក្នុងទីក្រុង ម៉ាយអាមី (Miami) កាលពីថ្ងៃអាទិត្យកន្លងទៅ។

អេនឌី មានទឹកចិត្តដ៏ខ្លាំងក្លា បន្ទាប់ពីវាយបកតាមយកឈ្នះ ក្នុងការប្រកួតនោះ ក្រោយពីកីឡាកររូបនេះ បរាជ័យក្នុងវគ្គ​ទី១។ ប៉ុន្តែគាត់រក្សាអារម្មណ៏បានល្អ ដោយបានយកឈ្នះក្នុងវគ្គទី២ និងវគ្គទី៣ ហើយទទួលបានពានរង្វាន់ជាលើកទី២ របស់គាត់។

កីឡាករស្កុតឡែន វ័យ២៥ឆ្នាំរូបនេះ បានត្រឡប់មកឈរដំណែងលេខ២ របស់ពិភពលោកវិញបន្ទាប់ពីខកខាន ចាប់​តាំង​ពីខែកញ្ញា ឆ្នាំ២០០៩។ ហើយការដណ្តើមបានចំណាត់ថ្នាក់លេខ២នេះ ក៏បានជួយឲ្យគាត់ទទួលបានពានរង្វាន់ ម៉ាស្ទើ (Masters) ជាលើកដំបូង ចាប់ពីខែតុលា ឆ្នាំ២០១១ នៅទីក្រុង សៀងហៃ (Shanghai)។

មួរ៉េ បាននិយាយថា «វាជាការប្រកួត ដ៏លំបាកមួយ។ យើងទាំង២នាក់ បានខិតខំរៀងៗខ្លួន យ៉ាងអស់ពីសមត្ថភាព ប៉ុន្តែ​ពួកយើងធ្វើពុំបានល្អដូចគ្នា នៅជិតបញ្ចប់ម៉ោង។ ខ្ញុំតែងតែគិតថា ខ្ញុំត្រូវតែឈ្នះ ក្នុងការប្រកួតនេះ។»

ចំណែកឯកីឡាករ ហ្វឺរឺ បើទោះបីជាគាត់ចាញ់ក្នុងការប្រកួតនោះក្តី ប៉ុន្តែគាត់ក៏បានឈរនៅចំណាត់ថ្នាក់លេខ៤ លើមិត្ត​រួមជាតិអេស្ប៉ាញ ណាដាល់ (Nadal) ដែរ។ ហើយគាត់ធ្វើបានយ៉ាងល្អ នៅក្នុងវគ្គទី១ ដែលបង្ហាញថាសមត្ថភាព និង​ជំនាញរបស់គាត់ ពិតជាមិនធម្មតា។

ទម្លាប់របស់កីឡាករ អេនឌី មួរ៉េ មិនដែលចាប់ផ្តើមបានល្អនោះទេ ក្នុងការប្រកួតដំបូង។ ហើយក្នុងការប្រកួតនេះ ក៏មិន​ខុសគ្នាដែរ ដោយគាត់បានចាញ់ដោយលទ្ធផល ៥-០ ក្នុងការប្រកួតចាប់ផ្តើមនៅម៉ោង ១១៖៣០នាទី ព្រឹក។

ម្ចាស់ដំណែងលេខ២ របស់ពិភពលោកថ្មី អេនឌី មួរ៉េ ពេលនេះកំពុងតែ ត្រៀមខ្លួន សំរាប់រដូវកាលថ្មី ក្នុងការប្រកួត​លើ​ទីលានដីឥដ្ឋ ដែលនឹងត្រូវចាប់ផ្តើម នៅក្នុងទីក្រុង ម៉ុងតេ កាឡូ (Monte Carlo) ក្នុងរយះពេល ២សប្តាហ៏។ ហើយគាត់​នឹងត្រូវប្រកួតក្នុងកម្មវិធី ហ្វ្រេន អូផិន (French Open) នៅចុងខែឧសភា៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី០១ ខែមេសា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ