សហរដ្ឋអាមេរិកបានដាក់ពង្រាយយ៉ាងច្រើន នូវយន្ដហោះប្រដេញធុន F-22 នៅលើវេហារបស់កូរ៉េខាងត្បូង។ ប្រតិបត្តិការ​នេះ ដើម្បីជាការហោះសាកល្បងផង និងដើម្បីបង្ហាញជាថ្មីម្ដងទៀត ពីការគាំទ្ររបស់ខ្លួន ទៅទីក្រុងសេអ៊ូល នៅចំពោះ​មុខការគម្រាមរបស់កូរ៉េខាងជើង។

យន្ដហោះប្រដេញ យ៉ាងលឿនរបស់អាមេរិក ធុន F-22។

យន្ដហោះទាំងនេះ បានហោះសាកល្បងជាមួយយោធាកូរ៉េខាងត្បូង ចេញពីបន្ទាយយោធាអាមេរិក នៅកោះជប៉ុន អូគីណាវ៉ា (Okinawa) ដើម្បីទៅចុះចតនៅបន្ទាយយោធាមួយទៀត របស់អាមេរិកដែរ នៅអូសង់ (Osan) របស់កូរ៉េ​ខាង​ត្បូង។

មេបញ្ជាការរបស់កងទ័ពអាមេរិក ប្រចាំនៅកូរ៉េខាងត្បូង បានសរសេរក្នុងសេចក្ដីប្រកាសព័ត៌មានមួយថា «ប្រទេសកូរ៉េ​ខាងជើង នឹងមិនអាចធ្វើអ្វីបានទាំងអស់ ជាមួយនឹងការគម្រាម និងការបង្កហេតុទាំងឡាយ ដែលផ្ទុយទៅវិញ បានដាក់​ខ្លួនឯងអោយកាន់តែឯកោ និងបំផ្លាញការខំប្រឹងរបស់សហគមន៍អន្តរជាតិ ក្នុងការស្វែងរកសន្តិភាព និងស្ថិរភាព​នៅតំបន់​អាស៊ីខាងកើតឈៀងខាងជើង»។

ប្រទេសកុម្មុយនីស បានតម្លើងសេចក្ដីប្រកាសខ្លាំងក្លា នៅក្នុងសប្ដាហ៍ចុងក្រោយនេះ ដោយបានលប់ចោល​«បទឈប់​បាញ់» ធ្វើជាមួយនឹងសហរដ្ឋអាមេរិក នៅក្នុងសង្គ្រាមកូរ៉េនាឆ្នាំ១៩៥៣ ហើយថែមទាំងបានគម្រាមថា នឹងបើកការ​វាយ​លុក​ដោយអាវុធនុយក្លេអ៊ែរទៀតផង។ កាលពីថ្ងៃសៅរ៍កន្លងមកនេះ ប្រទេសនេះបានដាក់ខ្លួន អោយស្ថិតក្នុង«ស្ថានភាព​សង្គ្រាម» ទល់ជាមួយនឹងកូរ៉េខាងត្បូង។

ស្រង់សម្ដីដោយទីភ្នាក់ងារសារព័ត៌មាន ឃីយ៉ូដូ (Kyodo) អ្នកនាំពាក្យរដ្ឋាភិបាលជប៉ុន លោក យ៉ូស៊ីហ៊ីដេ ស៊ូហ្គា (Yoshihide Suga)  បានថ្កោលទោស នូវការបង្កហេតុធ្ងន់ធ្ងរ របស់ទីក្រុងព្យុងយ៉ាង នៅបន្ទាប់ពីការប្រកាស​របស់​កាសែតផ្លូវការរបស់របបនេះ ថាបន្ទាយកងទ័ពអាមេរិក នៅជប៉ុន ជាគោលដៅយុទ្ធសាស្ត្រ សម្រាប់ធ្វើការវាយប្រហារ។

សម្ដេចសង្ឃកាតូលីក ហ្វ្រង់ស៊័រ អំពាវនាវអោយមានការផ្សះផ្សារ

ការឆ្លើយឆ្លងទៅវិញទៅមកនៅលើឧបទ្វីបកូរ៉េ បានជម្រុញអោយសម្ដេចសង្ឃកាតូលីក ហ្វ្រង់ស៊័រ (François) ធ្វើនូវ​ការ​បួង​សួងមួយ សម្រាប់សន្តិភាព។ ការបួងសួងនេះ ត្រូវបានធ្វើនៅក្នុងពិធីសូត្រធម៌ផ្លូវការដ័ធំ កាលពីថ្ងៃអាទិត្យ នៅលើទីលាន ស៊ាំងពីជែ (Saint-Pierre)។ «សូមអោយមានសន្តិភាពនៅអាស៊ី ជាពិសេសនៅលើឧបទ្វីបកូរ៉េ សូមអោយភាពត្រជាក់ត្រជុំ​បានកើត​មាន​ឡើង និងការផ្សះផ្សារបណ្ដុះនៅក្នុងអារម្មណ៍ឡើងវិញ»។

សូមបញ្ជាក់ថា​យន្ដហោះអាមេរិកផ្ទុកគ្រាប់បែកនុយក្លេអ៊ែរ ធុន B-2 ហោះចេញផ្ទាល់ពីទឹកដីអាមេរិក បានក្រឡឹងជុំវិញ​ប្រទេសកូរ៉េខាងត្បូង ដើម្បីចូលរួមក្នុងការហោះសាកល្បង មុននឹងចុះចតនៅ មីស៊ូរី (Missouri) បន្ទាយយោធាមួយទៀត របស់​អាមេរិក។ ការហោះហើរនេះ ជាការសម្ដែងកម្លាំងមួយ ដែលបានបញ្ឆេះកំហឹងរបស់ទីក្រុងព្យុងយ៉ាង អោយក្រេវ​ក្រោបឡើង៕

-------------------------------------------------------
ដោយ សេក មនោរកុមារ - ប៉ារីស​ ថ្ងៃទី០១ ខែមិនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ