គណបក្សសង្គ្រោះជាតិ «ស្ថិតក្នុងបេះដូងប្រជារាស្ត្រ» ហើយជ័យជំនះ មិនត្រូវបានមើលឃើញ ក្នុងពេលនេះទេ។ នេះ ជាការប្រកាសឡើង របស់អតីតប្រធានគណបក្សសង្គ្រោះជាតិ លោក សម រង្ស៊ី នៅលើទំព័រហ្វេសប៊ុករបស់លោក កាលពីមុននេះបន្តិច។

មេដឹកនាំប្រឆាំងបានយកពុទ្ធភាសិតខ្មែរ «ចាញ់ជាព្រះ ឈ្នះជាមារ» មកពន្យល់នាំមុខ ដោយធ្វើការប្រៀបធៀបលោក ហ៊ុន សែន នាយករដ្ឋមន្ត្រីចាំផ្ទះកម្ពុជា ថាជាមារ។

លោក សម រង្ស៊ី បានសរសេរថា៖ «ហ៊ុន សែន ជាអ្នកប្រមាថប្រជារាស្ត្រខ្មែរ។ គាត់ប្រព្រឹត្តអំពើទុច្ចរិត និងអំពើបាបគ្រប់បែបយ៉ាង ហើយបែរមកធ្វើបាប​អ្នកស្នេហាជាតិ ឥតឈប់ឈរ។ គាត់ជាមារ សម្រាប់កម្ពុជា។ ជ័យជំនះរបស់គាត់ នៅពេលនេះ មិនពិតប្រាកដទេ មិនស្ថិតស្ថិរទេ។»។

មេដឹកនាំប្រឆាំង បានសរសេរបន្ត នៅលើបណ្ដាញសង្គមទៀតថា៖ «សូមឲ្យគណបក្សសង្គ្រោះជាតិ រក្សាភាពស្មោះត្រង់ ចំពោះប្រទេសជាតិ ភាពបរិសុទ្ធ និងស្អាតស្អំ ព្រមទាំងភាពអត់ធ្មត់។ ជ័យជំនះពិតប្រាកដ និងយូរអង្វែង បានមកពីការស្រលាញ់ និងការគាំទ្រ ពីសំណាក់ប្រជារាស្ត្រ។ ទោះជាមើល មិនទាន់ឃើញក៏ដោយ នៅពេលនេះ ពីព្រោះស្ថិតនៅក្នុងបេះដូងប្រជារាស្ត្រ ក៏ជ័យជំនះនេះ នឹងលេចធ្លោយ៉ាងត្រចះត្រចង់ នៅពេលខាងមុខ ជាពុំខាន។»។

ការលើកឡើងរបស់លោក សម រង្ស៊ី ធ្វើឡើងមួយថ្ងៃ បន្ទាប់ពីការថ្លែងរបស់លោក តាមរយៈវិទ្យុសម្លេងអាស៊ីសេរី កាលពីយប់ថ្ងៃទី៤ ខែកញ្ញាកន្លងមកថា រូបលោក និងលោក កឹម សុខ ប្រធានគណបក្សសង្គ្រោះជាតិ ដែលកំពុងជាប់ក្នុងពន្ធនាគារ គឺជា«មនុស្សតែមួយ» ដែលគ្មាននរណា មកបំបែកបានឡើយ។ 

លោកអះអាងថា លោកនឹងរង់ចាំជួបលោក កឹម សុខា ដែលលោកគិតថា នឹងត្រូវលោក ហ៊ុន សែន ដោះលែងក្នុងពេលខាងមុខនេះ ហើយលោកនិងលោក កឹម សុខា នឹងចាប់ដៃគ្នា ដើម្បីធ្វើការងារ ដែលលោកហៅថា ជា«ការសង្គ្រោះជាតិ»៕