ញ៉ូហ្សេឡែន ស្នើ ហ៊ុន សែន ឲ្យស្ដារ​នីតិសម្បទា CNRP ដើម្បី​ប្រជាធិបតេយ្យ​ស្រប​ច្បាប់

ប្រទេសញ៉ូហ្សេឡែន បានថ្លែងតាមរយៈរដ្ឋមន្ត្រី ការបរទេស របស់ខ្លួន លោក វីនស្ដុន ភីតធើរ (Winston Peter) សំដែងការព្រួយបារម្ភ នៅចំពោះការបោះឆ្នោតជាតិកម្ពុជា ដែលបានប្រព្រឹត្តិទៅ កាលពីថ្ងៃអាទិត្យកន្លងមក។ លោក វីនស្ដុន ភីតធើរ បានបញ្ជាក់ថា លោក ហ៊ុន សែន ត្រូវបានទទូច ឲ្យស្ដារនីតិសម្បទា របស់គណបក្សសង្គ្រោះជាតិឡើងវិញ ដើម្បីអនុញ្ញាតឲ្យកម្ពុជា មានលទ្ធិប្រជាធិបតេយ្យស្របច្បាប់។
ញ៉ូហ្សេឡែន ស្នើ ហ៊ុន សែន ឲ្យស្ដារ​នីតិសម្បទា CNRP ដើម្បី​ប្រជាធិបតេយ្យ​ស្រប​ច្បាប់
លោក វីនស្ដុន ភីតធើរ រដ្ឋមន្ត្រីការបរទេសនៃប្រទេសញ៉ូហ្សេឡែន។ (រូបថតលើទ្វីសធើរ)
Loading...
  • ដោយ: មនោរម្យ.អាំងហ្វូ ([email protected]) - ប៉ារីស ថ្ងៃទី៣១ កក្កដា ២០១៨
  • កែប្រែចុងក្រោយ: August 01, 2018
  • ប្រធានបទ: បោះឆ្នោត​ជាតិ
  • អត្ថបទ: មានបញ្ហា?
  • មតិ-យោបល់

នៅក្នុងសេចក្ដីថ្លែងការណ៍មួយច្បាប់ ដែល​ចេញផ្សាយ ដោយក្រសួងការបរទេស នៃប្រទេសញ៉ូហ្សេឡែន បានស្រង់សំដីរដ្ឋមន្ត្រីការបរទេស លោក វីនស្ដុន ភីតធើរ (Winston Peter) មកសរសេរថា៖ «ដើម្បីឲ្យកម្ពុជា មានលទ្ធិប្រជាធិបតេយ្យស្របច្បាប់ វាមានសារសំខាន់ណាស់ ដែលសម្លេងប្រឆាំង ដ៏ធំអាចត្រូវបានគេស្តាប់ឮ។ ប្រទេសញូហ្សេឡែន ស្នើដល់លោកនាយករដ្ឋមន្រ្តី ហ៊ុន សែន ឲ្យស្តានីតិសម្បទា របស់គណបក្សប្រឆាំងដ៏ធំ ឡើងវិញ និងដោះលែងអ្នកទោស​នយោបាយ​ទាំងអស់ រួមទាំងមេដឹកនាំគណបក្សប្រឆាំង លោក កឹម សុខា។»។

គណបក្សសង្គ្រោះជាតិ ដែលជាគណបក្សប្រឆាំង​ដ៏មានសក្ដានុពល ត្រូវបានរដ្ឋាភិបាលលោក ហ៊ុន សែន រំលាយកាលពីខែវិច្ឆិកា ជាមួយនឹងការហាមឃាត់​មន្ត្រីគណបក្ស ១១៨នាក់ ពីជីវភាពនយោបាយ សម្រាប់រយៈពេល៥ឆ្នាំ និងប្រធានគណបក្ស លោក កឹម សុខា ត្រូវបានចាប់ឃុំ តាំងពីដើមខែកញ្ញា រហូតមកដល់ថ្ងៃនេះ។

នៅក្នុងការបោះឆ្នោតជាតិ កាលពីថ្ងៃអាទិត្យ គណបក្សចំនួន២០ បានប្រកួតប្រជែងគ្នា ប៉ុន្តែមិនមានគណបក្សណាមួយ ដែលមានកម្លាំងអាចប្រកួតប្រជែងស្មើកម្លាំងគ្នា ជាមួយនឹងគណបក្សប្រជាជនកម្ពុជា របស់លោក ហ៊ុន សែន នាយករដ្ឋមន្ត្រីផុតអាណត្តិនោះទេ។

បើតាមតួលេខផ្លូវការ ដែលផ្ដល់ដោយគណៈកម្មាធិការជាតិរៀបចំការបោះឆ្នោត (គ.ជ.ប) បានបង្ហាញថា ចំនួនអ្នកចេញទៅបោះឆ្នោត មានចំនួនដល់ទៅជាង ៨២%។ ប៉ុន្តែតួលេខនេះ ត្រូវបានច្រានចោល ដោយគណបក្សប្រឆាំង ដោយបានចាត់ទុកថា ជាការបំប៉ោង តាមតែទំនើងចិត្ត ដោយសារអវត្តមានអ្នកសង្កេតការណ៍ឯករាជ្យ ដែលមានជំនាញពិតប្រាកដ នៅក្នុងការបោះឆ្នោត។

នៅក្នុងលទ្ធផលបឋម ដែលផ្ដល់ដោយស្ថាប័ននេះដដែល បានបញ្ជាក់ទៀតថា គណបក្សប្រជាជនកម្ពុជា របស់លោក ហ៊ុន សែន នាយករដ្ឋមន្ត្រីផុតអាណត្តិ បានទទួលជ័យជំនះ សឹងតែ១០០% និងទទួលបានអសនៈសភា សឹងតែទាំងស្រុង នៅក្នុងការបោះឆ្នោតនេះ។

លោក វីនស្ដុន ភីតធើរ បានថ្លែងបន្តថា៖ «ញ៉ូហ្សេឡែន ជាដៃគូយូរអង្វែងរបស់កម្ពុជា និងបានវិនិយោគកិច្ចប្រឹងប្រៀង យ៉ាងសន្ធឹកសន្ធាប់ ក្នុងការគាំទ្រដំណើរការអន្តរកាល នៃលទ្ធិប្រជាធិបតេយ្យ របស់កម្ពុជា នៅក្រោមការគ្រប់គ្រង របស់អង្គការសហប្រជាជាតិ នៅដើមទសវត្សរ៍ឆ្នាំ៩០។ យើងត្រៀមខ្លួនរួចជាស្រេច ធ្វើការជាមួយកម្ពុជា ដើម្បីស្ដារស្ថាប័ន និងលទ្ធិប្រជាធិបតេយ្យ ដែលអនុញ្ញាតឲ្យមានការរៀបចំការបោះឆ្នោត ដោយសេរី និងត្រឹមត្រូវ។»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...