បន្ទាប់ពីប្រទេសធំៗ នៅបស្ចឹមលោក នៅថ្ងៃនេះ ដល់វេនប្រទេសជប៉ុនម្ដង។ លោក យ៉ូស៊ីហ៊ីដេ ស៊ូហ្គា (Yoshihide Suga) រដ្ឋមន្ត្រីជប៉ុនទទួលបន្ទុកកិច្ចការផ្ទៃក្នុង និងព័ត៌មាន និងជាអគ្គលេខាធិការ នៃខុទ្ទកាល័យ​រដ្ឋាភិបាលលោក ស៊ីនហ្សូ អាប៊េ (Shinzo Abe) ត្រូវបានទីភ្នាក់ងារព័ត៌មាន រ៉យទ័រ (Reuters) ស្រង់សំដី នៅក្នុង​សន្និសីទ​សារព័ត៌មាន​មួយ មកចុះផ្សាយថា រដ្ឋាភិបាលជប៉ុនមិនបញ្ជូន មន្ត្រីជំនាញខាងសង្កេតការណ៍ ការបោះឆ្នោត មកចូលរួមអង្កេតការបោះឆ្នោតជាតិ នៅកម្ពុជា ដែលនឹងប្រព្រឹត្តិទៅ នៅថ្ងៃអាទិត្យទី ២៩ ខែកក្កដា ខាងមុខនេះឡើយ។

បើទោះជាលោក មិនបានបញ្ជាកលំអិតបន្ថែម ពីការសម្រេចចិត្ត របស់រដ្ឋាភិបាលជប៉ុន ខាងលើក៏ដោយ តែលោកបានបានពន្យល់ថា រដ្ឋាភិបាលជប៉ុន បានព្យាយាម «ប្រើប្រាស់ឱកាសជាច្រើន ដើម្បីសំដែងនូវកង្វល់របស់យើង និងទទូចឲ្យពួកគេ វិលមកធ្វើឲ្យប្រសើរឡើង នូវស្ថានភាព[នយោបាយ និងសិទ្ធមនុស្ស]» នៅកម្ពុជា។

ជារៀងរាល់ការបោះឆ្នោតជាតិ នៅកម្ពុជា រាប់តាំងពីឆ្នាំ១៩៩៣មក រដ្ឋាភិបាលជប៉ុនតែងបញ្ជូន អ្នកសង្កេតការណ៍របស់ខ្លួន ឲ្យមកសង្កេតការបោះឆ្នោត មិនដែលខានឡើយ។ ប៉ុន្តែការបោះឆ្នោតលើកនេះ ប្រទេសជប៉ុនបានធ្វើ នូវការសម្រេចចិត្តមួយ ដែលខុសពីទម្លាប់មុនៗ របស់ខ្លួន។ ទីភ្នាក់ងាររ៉យទ័រ បានស្រង់សំដី​មន្ត្រីផ្លូវការម្នាក់ ពីក្រសួងការបរទេសជប៉ុន មកបញ្ជាក់ថា ប្រទេសជប៉ុនបានសម្រេច មិនបញ្ជូនមន្ត្រីជំនាញរបស់ខ្លួន មកកម្ពុជាដូច្នេះ បន្ទាប់​ពីបាន​សិក្សា​យ៉ាងលំអិត ចំពោះ​ស្ថានការណ៍​ចុងក្រោយ ជុំវិញការបោះឆ្នោត ដ៏ចម្រូងចម្រាស់នេះ។

បណ្ដាប្រទេសធំៗ នៅបស្ចឹមលោក រួមនឹងមន្ត្រីសំខាន់ៗ របស់អង្គការ​សហប្រជាជាតិ​ផង បាន​ព្រមានទុក​ជាមុន​ថា ការបោះឆ្នោតជាតិ នៅប៉ុន្មានថ្ងៃខាងមុខ នឹងគ្មានភាពស្របច្បាប់ទេ បន្ទាប់ពីគណបក្សប្រឆាំង​ដ៏ធំមួយ ដែលមានការគាំទ្រពីពលរដ្ឋខ្មែរ ប្រមាណជិតពាក់កណ្ដាលប្រទេស ត្រូវបានរំលាយ​ចោល ប្រធាន​គណបក្សត្រូវបាន​ចាប់ឃុំ និងមន្ត្រី​មកពី​គណបក្ស​នេះ ជាង១០០នាក់ ត្រូវបាន​ហាមឃាត់ មិនឲ្យធ្វើ​នយោបាយ​នោះ។

សហរដ្ឋអាមេរិក តាមរយៈស្ថានទូតរបស់ខ្លួន ប្រចាំក្នុងរាជធានីភ្នំពេញ ក៏ទើបនឹង​ប្រកាសក្នុងថ្ងៃនេះ​ដែរថា រដ្ឋាភិបាល​អាមេរិក មិនបញ្ជូនភ្ញៀវ ឬអ្នកសង្កេតការណ៍ផ្លូវការ របស់ខ្លួនណាម្នាក់ មកចូលរួមសង្កេត ការបោះឆ្នោតជាតិ ខាងមុខឡើយ។ សេចក្ដីថ្លែងការណ៍ របស់ស្ថានទូតអាមេរិក បានបញ្ជាក់បន្ថែមថា៖ «ការសម្រេចចិត្តនេះ គឺស្របតាមសេចក្តីថ្លែងការណ៍ របស់សហរដ្ឋអាមេរិក តាំងពីខែវិច្ឆិកា ឆ្នាំ២០១៧ មក ដែលបានសម្ដែងកង្វល់យ៉ាងជ្រាលជ្រៅ ចំពោះការវិវត្តផ្នែកនយោបាយ នៅប្រទេសកម្ពុជា»៕