មនុស្សរាប់ពាន់នាក់ រួមទាំងមនុស្សធម្មតា និងសកម្មជនផង បានណាត់ជួបគ្នានៅជុំវិញទីធ្លាសំខាន់ៗ ក្នុងទីក្រុងប៉ារីស និងកាន់ដៃគ្នាជាខ្សែរបន្ដៗ ដើម្បីទាមទារអោយមានការបញ្ឈប់អោយអស់ទៅ នូវ«កម្មវិធីនុយក្លេអ៊ែរ» ទាំងផ្នែកស៊ីវីល និងខាងយោធា។

ពួកគេសង្ឃឹមថា នឹងប្រមែប្រមូលគ្នាយ៉ាងហោចណាស់ មនុស្សជាង១០ពាន់នាក់ ដូចកាលពីឆ្នាំមុន។ ដោយមានការ​រៀបចំចាត់ចែង ពីបណ្ដាញ«ចេញពីនុយក្លេអ៊ែរ (Sortir du nucléaire)» នោះផង ក្រុមអ្នកស្មោះស្ម័គ្របាន​កំណត់យកថ្ងៃ​សៅរ៍ទី០៩ខែមិនា ដើម្បីធ្វើជា«ខ្សែរមនុស្សបណ្ដាក់» នៅ១៨កន្លែងខុសគ្នា ក្នុងទីក្រុងប៉ារីស។ បុព្វហេតុរបស់ពួកគេ «ទាមទារអោយបញ្ឈប់ទៅ នូវការផលិតអគ្គិសនី ដោយប្រើប្រាស់ថាមពលនុយក្លេអ៊ែរ» នៅក្នុងប្រទេសបារាំង។ ចលនា​នេះ បានកើតឡើង បន្ទាប់ពីមានគ្រោះមហន្តរាយដ៏ធំ នៃការផ្ទុះរោងចក្រអគ្គិសនីនុយក្លេអ៊ែរ នៅហ្វូគូស៊ីម៉ា (Fukushima) ប្រទេសជប៉ុន កាលពីពីរឆ្នាំមុន។

អ្នករៀបចំបានប្រកាសថា អ្នកចូលរួមមានចំនួន២០ពាន់នាក់ តែសម្រាប់អាជ្ញាធរ មានចំនួនតែ៤ពាន់នាក់ប៉ុណ្ណោះ។ អ្នកនាំពាក្យរបស់បណ្ដាញ«ចេញពីនុយក្លេអ៊ែរ» លោកពីជែរីក ដុយផ្លូ (Pierric Duflos) បានអោយដឹងថា អ្នកមក​ចូលរួម​តវ៉ា បានហ៊ំព័ទ្ធទីកន្លែងជាច្រើន ដែលមានអំណាច ទាក់ទងនឹងនុយក្លេអ៊ែរ ដូចជារដ្ឋសភា ព្រឹទ្ធសភា អាជ្ញាធរគ្រប់គ្រង​នុយក្លេអ៊ែរ ការិយាល័យកណ្ដាលនៃអគ្គិសនីបារាំង និងមន្ទីក្រសួងជាច្រើន ដែលក្នុងនោះមានក្រសួងការពារជាតិ និង​ក្រសួងបរិដ្ឋាននោះជាដើម។ ពួកគេក៏បានធ្វើការហ៊ំព័ទ្ធផងដែរ ស្ថាប័នធនាគារជាច្រើន ដែលបានអនុញ្ញាតិ​អោយ​ប្រើប្រាស់ថវិការបស់ខ្លួន សម្រាប់គម្រោងការទាំងនេះ។

កម្មវិធីនេះ រៀបចំឡើងសំដៅជាថ្មីទៀត អោយបញ្ចប់នូវរាល់កម្មវិធី នុយក្លេអ៊ែរ ទាំងស៊ីវិល និងយោធា ហើយបញ្ឈប់​ទាំងស្រុង នូវរោងចក្រនុយក្លេអ៊ែរ ទាំងជាង៣០រោងចក្រ នៅក្នុងប្រទេសបារាំង។ សូមបញ្ជាក់ថា ម៉ាស៊ីនប្រតិកម្ម​នុយក្លេអ៊ែរចំនួនជាង២០ ក្នុងរោងចក្រមួយចំនួន មានវ័យចំណាស់ចាស់ៗណាស់ទៅហើយ។ គណបក្សបរិដ្ឋាន​របស់​បារាំង ដែលគាំទ្រ​យុទ្ធនាការកាន់ដៃជាខ្សែរនេះ បាន​និយាយតាមអ្នកតំណាងរបស់ខ្លួន លោកដឺនីស ប៉ូប៉ាំង (Denis Baupin) យ៉ាងដូច្នេះថា «ពីរឆ្នាំក្រោយគ្រោះ​មហន្តរាយ​នៅហ្វូគូស៊ីម៉ា ប្រទេសបារាំងមិនបានទាញយកមេរៀន​ពី​ហេតុការណ៍នេះទេ»។

អ្នកគាំទ្រនឹង«ខ្សែរមនុស្សបណ្ដាក់»នេះ មានក្រុមអ្នកតំណាងរាស្ត្រឆ្វេងនិយម និងតំណាងពីខាងសមាគម​ប្រមាណ​ជាជាង៣០ទៀត ដែលសុទ្ធសឹងតែធ្វើសកម្មភាពប្រឆាំងនឹងកម្មវិធីនុយក្លេអ៊ែរ។ សហជីបអ្នកធ្វើការផ្លូវដែក ក៏បាន​ចូលរួមគាំទ្រកម្មវិធីនេះដែរ ដោយហេតុពួកគេមិនពេញចិត្ត នឹងការដឹកយកទៅចាក់ចោល នូវកាកសំណល់នុយក្លែអ៊ែរ ដោយប្រើ«រថភ្លើង»ជាមធ្យោបាយ៕

--------------------------------------------------------
ដោយ សេក មនោរកុមារ - ប៉ារីស​ ថ្ងៃទី០៩ ខែមិនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ