កីឡាករប្រណាំងកង់របស់អាឡឺម៉ង់ ម៉ាស្សែល ឃីតថេល (Marcel Kittel) បានឈ្នះក្នុងជុំទី២ នៃកម្មវិធី ប៉ារីស-ណីស (Paris-Nice) ក្នុងការប្រកួតរយះចំងាយ ២០០,៥គីឡូម៉ែត្រ ដែលត្រូវធ្វើដំណើរពីតំបន់វីម៉ូរី (Vimory) ទៅកាន់ ស្សឺរីលី (Cerilly) កាលពីថ្ងៃអង្គារ៏កន្លងទៅ។

កីឡាករប្រណាំងកង់ ម៉ាស្សែល ឃីតថេល។

ទោះបីជាយ៉ាងណា ការនាំមុខសរុបគឺបានទៅលើកីឡាកររបស់អ៊ីតាលី អេលែ វីវ៊ែនី (Elia Viviani) ដែលបានទទួលផល​ចំណេញពីអ្នកនាំមុខចាស់ គឺម្ចាស់ជើងឯកកីឡាករបារាំង ណាសឺ បូហានី (Nacer Bouhanni) ដែលបានធ្លាក់ចេញ​ពីការ​ប្រកួតដោយសារតែគាត់ដួលក្នុងចំងាយ ៥៨គីឡូម៉ែត្រ ពីកន្លែងបញ្ចប់ ហើយរងការឈឺចាប់ដោយសាររបួសមាត់។

បន្ទាប់ពីគ្រូពេទ្យបានពិនិត្យរួចឃើញថា កីឡាករវ័យ ២២ឆ្នាំរូបនេះ បានបាក់ធ្មេញអស់ចំនួន២ ហើយត្រូវការដេរចំនួន ៨ថ្នេរ នៅលើបបូរមាត់របស់គាត់។

លោកវេជ្ជបណ្តិត ជឺរ៉ាត ក្វីលូមី (Gerard Guillaume) របស់ក្រុមអេហ្វឌីជេ (FDJ) បាននិយាយថា « តាមការឆ្លុះមើលកាំរស្មី អ៊ិចរ៉េ (x-rays) បានឲ្យដឹងថា គ្មានការបែកបាក់ឆ្អឹង ណាមួយផ្សេងទៀត ដែលគួរឲ្យបារម្មណ៏នោះទេ»។

កីឡាករវ័យ ២៤ឆ្នាំ ឃីតថេល ដែលបានឈ្នះការប្រណាំងក្នុងប្រទេសអេស្ប៉ាញកាលពីឆ្នាំ ២០១១នោះ បានវ៉ាផ្តាច់កីឡាករ ៤រូបផ្សេងទៀត ដោយរួមបញ្ចូលទាំងកីឡាករ វីវ៊ែនី ហើយទៅដល់ទីមុនគេបានសម្រេច។

កីឡាករ វីវ៊ែនី ទទួលបានចំណាត់ថ្នាក់លេខ២ ខណះដែលកីឡាករអូស្រ្តាលី លេក ហូវ៉ាដ (Leigh Howard) ទទួលបាន​ចំណាត់ថ្នាក់លេខ៣ ហើយជាបេក្ខជនចុងក្រោយគេ ដែលឈរនៅលើវេទិកា។

កីឡាករ ឃីតថេល បាននិយាយថា «ខ្ញុំពិតជារីករាយខ្លាំងណាស់ ដែលមានឱកាសនេះ។ បន្ទាប់ពីជុំទី១ចប់ ខ្ញុំមានអារម្មណ៏ សោកស្តាយខ្លាំងណាស់ ដែលខ្ញុំគ្មានឱកាសដើម្បីឈ្នះ ពីព្រោះខ្ញុំនៅសល់ចំងាយ ១០គីឡូម៉ែត្រពីទីផ្ដាច់ព្រ័ត្រ»។

គាត់បានបន្តថា «វាសំខាន់ណាស់សំរាប់ខ្ញុំ ក្នុងការទទួលបានជ័យជំនះក្នុងការប្រណាំងកង់ពិភពលោក ហើយវាដូចជាឆាប់​ពេកក្នុងរដូវកាលនេះ។ ប៉ុន្តែវាប្រហែលជាឱកាសចុងក្រោយសំរាប់ខ្ញុំក្នុងការឈ្នះក្នុងកម្មវិធី ប៉ារីសណៃ នាឆ្នាំនេះផងដែរ»។

កីឡាករ វីវ៊ែនី បាននាំមុខជាលើកទី២ ទៅលើកីឡាករបារាំង ស៊ីលវែន ឆាវ៉ាញ៉ែល (Sylvain Chavanel) ជាមួយនឹងជនរួម​ជាតិ ដាម៉ែន កូឌិន (Damien Gaudin) ដែលស្ថិតនៅចំណាត់ថ្នាក់លេខ៣ ក្នុងការប្រកួតសរុប។

កីឡាកររូបនេះបាននិយាយទាំងរំភើបថា «វាធ្វើឲ្យខ្ញុំ មានក្តីសោមនស្ស និងរីករាយយ៉ាងខ្លាំង ដែលបានពាក់អាវពណ៌លឿង ព្រោះវាជាគោលបំណងរបស់ខ្ញុំ។ ខ្ញុំមិនបានឈ្នះក្នុងជុំ ប៉ុន្តែ កីឡាករ ឃីតថេល ពិតជាខ្លាំងណាស់សំរាប់រូបខ្ញុំនៅថ្ងៃនេះ»។
គាត់បានបន្តថា «ខ្ញុំកំពុងតែសម្លឹងមើលទៅជុំបន្ទាប់ ហើយវាពិតមានការលំបាក ដើម្បីការពារ ដំណែងមួយនេះ ប៉ុន្តែខ្ញុំមាន​ក្រុមដ៏ល្អ ហើយខ្ញុំនឹងព្យាយាមឲ្យល្អជាទីបំផុត»។

ក្នុងការប្រណាំងជុំទី៣ មានចំងាយ ១៧០,៥ គីឡូម៉ែត្រ ដែលត្រូវចាប់ផ្តើមពីតំបន់ ឆាថេល កូយ៉ន (Chatel-Guyon) ទៅកាន់​តំបន់ ប្រីអូដេ (Brioude) នៃប្រទេសបារាំង ហើយមានតំបន់ខ្ពស់ចំនួន ២កន្លែង ដែលស្ថិតនៅចម្ងាយ ១៥គីឡូម៉ែត្រពីទី៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី០៦ ខែមិនា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ