ហេតុអ្វីបានជាគណបក្សសង្គ្រោះជាតិ បានឈ្នះឆ្នោត នឹងធ្វើឲ្យមានចលាចល ក្នុងប្រទេសកាន់តែខ្លាំង? លោក ខឹម វាសនា ប្រធាន​គណបក្ស​សម្ព័ន្ធ​ដើម្បី​ប្រជាធិបតេយ្យ (ហៅបក្សជួង ឬ LDP) បានលើកឡើង​ពី​ករណី​នេះ ដោយ​បញ្ជាក់​​ពី​មូលហេតុថា ព្រោះគណបក្សសង្គ្រោះជាតិ គ្មានមនោគមវិជ្ជាអ្វីទាំងអស់ និងគ្រាន់តែ​កេង​ចំណេញ ពីលើ​​ការ​ឈឺចាប់ របស់ពលរដ្ឋខ្មែរ ដែលចង់ផ្លាស់ប្ដូរតែប៉ុណ្ណោះ។ លោកថែមទាំង​បានពន្យល់​ទៀត​ថា គណបក្ស​ដែល​មានរូបសញ្ញា​ព្រះអាទិត្យ ជាតំណាងនេះ គ្មាន​សមត្ថភាព​គ្រប់គ្រង​សភាពការណ៍ ហើយ​ក៏គ្មាន​ការទទួល​ខុសត្រូវ​ដែរ និងមានតែបង្កើត​លេសដោះសារ យករួចខ្លួន។

លោក ខឹម វាសនា បានលើកឡើងយ៉ាងដូច្នេះ នៅលើបណ្ដាញសង្គម ដោយបានទាំងអួតអាងថា មានតែ​មនោគម​វិជ្ជា​របស់​គណបក្ស«ជួង»របស់លោកទេ ទើបអាច​ជួយស្រុក​ទេសបាន។ ជាមួយនឹងការសរសេរ «ចាំ​ពាក្យ​ខ្ញុំចុះ ៗ» ឡើងវិញជាច្រើនដង លោក ខឹម វាសនា បានបញ្ជាក់ថា៖ «LDP មានមនោគមវិជ្ជា ដែល​ពលរដ្ឋ​គ្រប់រូប ត្រូវតែរៀនសូត្រ ពីមនោគមវិជ្ជានោះ ទើបអាចជួយស្រុកទេសយើងបាន។ គ្មានអ្នកណាម្នាក់ ឬក្រុមតូច​មួយ អាច​ជួយខ្មែរ ក្រៅពីខ្មែរភាគច្រើនរស់នៅ ដោយមាន​មនោគមវិជ្ជា ដែលផ្តល់​ដោយ LDP យើងនោះទេ (SIC)។ ខ្មែរ​មាន​មនោគម​វិជ្ជា LDP ក្នុងខ្លួន ទើបខ្មែរអាចគេចផុត ពីការបោកប្រាស់ ទាំងក្រៅទាំងក្នុង ហើយ​រស់​នៅ​ជា​ម្ចាស់​​លើជីវិតខ្លួន និងម្ចាស់លើវាសនា នៃប្រទេសខ្លួនបាន។»។

នរណាជា«តាធំ»?

រីឯគណបក្សសង្គ្រោះជាតិ ដែលជាគណបក្សប្រឆាំងធំជាងគេ នៅកម្ពុជា ត្រូវបានប្រធាន​គណបក្ស​«ជួង»​​រូប​នេះ វាយតម្លៃថា គ្មានមនោគមវិជ្ជាអ្វីទាំងអស់ និងជា​គណបក្ស ធ្វើឲ្យ«ខ្មែរមិនបានសុខ»។ លោក ខឹម វាសនា សរសេរ​ថា៖ «ចាំពាក្យខ្ញុំចុះ បើមាន CNRP នៅជាបក្សប្រឆាំង វាយអោយងាប់ទៀត ក៏ខ្មែរមិនបាន​សុខ​ដែរ ចាំ​ពាក្យ​ខ្ញុំ​ចុះ។ បើ CNRP ឈ្នះនឹងចលាចលប្រទេស កាន់តែខ្លាំង ហើយអ្នកដឹកនាំបក្សនេះ គ្មាន​សមត្ថភាពភាព​គ្រប់​គ្រង​​សភាពការណ៍ទេ ហើយក៏គ្មាន​ការទទួល​ខុសត្រូវ​ដែរ មានតែបង្កើតលេស ដោះសារយករួចខ្លួន ដូចតែ​តាធំ​យើងក្នុងរឿងខ្មែរក្រហម ដែលបាននាំខ្មែរឲ្យស្លាប់ ជាងពីរលាននាក់អញ្ចឹង។»។

បើនិយាយពីរឿងខ្មែរក្រហម រឿងសន្យាខ្យល់ ឬការបង្កភាពវឹកវរ រហូតដល់ថ្នាក់ផ្ទុះសង្គ្រាមនេះ គេក៏ធ្លាប់ឮ​មេ​ដឹកនាំគណបក្សប្រជាជនកម្ពុជា ដែលជាគណបក្ស​កាន់​អំណាច តែងធ្លាប់យកមកថ្លែងជាសាធារណៈ ជា​ញយ​ដង​ដែរ ដើម្បីវាយប្រហារលើគណបក្សសង្គ្រោះជាតិ។ លោក ហ៊ុន សែន នាយករដ្ឋមន្ត្រី-​ប្រធាន​គណបក្ស​ប្រជាជនកម្ពុជា ថែមទាំងគម្រាម សឹងតែនៅគ្រប់​ការថ្លែង​​ជា​សាធារណៈ​ថា បើគណបក្សសង្គ្រោះជាតិឈ្នះឆ្នោត នឹងមាន«ផ្ទុះសង្គ្រាម»ឡើង។

នរណានិយាយតាមនរណា?

មន្ត្រីគណបក្សសង្គ្រោះជាតិម្នាក់ បានថ្លែងនៅមុននេះ ប្រាប់ទស្សនាវដ្ដីមនោរម្យ.អាំងហ្វ យ៉ាងខ្លីថា ការលើក​ឡើង​​របស់​លោក ខឹម វាសនា និងលោក ហ៊ុន សែន មាន​«សន្ដាន»​តែមួយ ដោយគ្រាន់តែទម្រង់និយាយ មាន​លក្ខណៈ​ខុស​គ្នា​ប៉ុណ្ណោះ។ មន្ត្រីរូបនោះ បានសួរឡើងថា៖ «បញ្ហានៅត្រង់ថា រវាងលោក ហ៊ុន សែន និងលោក ខឹម វាសនា តើ​នរណា​មួយ និយាយ​តាម​នរណា? តើលោក ហ៊ុន សែន និយាយតាមលោក ខឹម វាសនា ឬ?»៕