យន្ដហោះយោធាភូមា​មួយគ្រឿង ដែលដឹកក្រុមគ្រួសាររបស់ទាហាន ចំនួនជាង១០០នាក់ បានបាត់ខ្លួនសូន្យឈឹង ពីកញ្ចក់ត្រួតពិនិត្យផ្លូវអាកាស ហើយគេទើបនឹងរកឃើញបំណែកជាច្រើន របស់យន្ដហោះនេះ នៅក្នុងសមុទ្រ ក្បែរក្រុង «Dawei» ភាគអាគ្នេយ៍នៃប្រទេស។

លោក «Naing Lin Zaw» អ្នកទទួលខុសត្រូវមួយរូប នៃកងទ័ពអាកាសភូមា បានថ្លែងឲ្យដឹងថា៖ «ពេលនេះ យើងបានរកឃើញនៅក្នុងសមុទ្រ នូវបំណែកជាច្រើន របស់យន្ដហោះ ស្ថិតនៅចំងាយ២១៨គីឡូម៉ែត្រ ពីទីក្រុង "Dawei"»។

អគ្គមេបញ្ជាការកងទ័ព លោក «Min Aung Hlaing» បានសរសេរ នៅលើទំព័រហ្វេសប៊ុក​របស់លោកថា៖ «ការទាក់ទងជាមួយយន្ដហោះ បានបាត់​ដ៏ទាន់​ហន់ នៅវេលាម៉ោង ១៣និង៣៥នាទី (ម៉ោងក្នុងស្រុក)»។ លោកបានបញ្ជាក់នៅវេលាយប់នេះថា នៅក្នុងយន្ដហោះមានទាហាន និងសមាជិកគ្រួសារ របស់​ពួកគេ ចំនួន១០៦នាក់ រួមនឹងអ្នកបម្រើការលើយន្ដហោះ ១៤នាក់ផង។

ប៉ុន្តែការអះអាងរបស់លោកមេទ័ព បានខុសពីការលើកឡើង របស់ប្រភពពីព្រលានយន្ដហោះ ដែលអះអាងថា នៅក្នុងយន្ដហោះ មានមនុស្ស​តែ១១៦នាក់​ប៉ុណ្ណោះ (១០៥នាក់ ជាអ្នកដំណើរ និង១១នាក់ ជាសមាជិកបម្រើការ លើយន្ដហោះ)។

ក្ដីសង្ឃឹមរួចរស់ជីវិត មានតិចតួច...

លោក «Min Aung Hlaing» បានបន្តឲ្យដឹងទៀតថា៖ «យុទ្ធនាការជួយសង្គ្រោះ និងការរុករក កំពុងប្រព្រឹត្តិទៅ ដោយមានជំនួយ ពីយន្ដហោះ និងនាវា​សមុទ្រ របស់កងទ័ព»។ ហើយគឺនាវាមួយ ពីក្នុងចំណោមនាវាយោធា ជាច្រើននោះហើយ ដែលបានរកឃើញបំណែក របស់យន្ដហោះ។

យន្ដហោះបានបាត់ការទាក់ទង នៅបន្ទាប់ពីយន្ដហោះ បានហោះឆ្លងពីលើ តំបន់ដែលនៅជុំវិញទីក្រុង «Dawei» ស្ថិតនៅមាត់សមុទ្រ «Andaman» (ផ្នែក​ខាងកើត នៃមហាសមុទ្រឥណ្ឌា)។ យន្ដហោះបានហោះចេញ ពីក្រុង «Myeik» ដែលមានបន្ទាយយោធាមួយនៅទីនោះ ហើយត្រូវទៅចុះចត នៅរដ្ឋធានី​សេដ្ឋកិច្ច រ៉ង់ហ្គូន (Rangoun)។

ប្រភពមួយ ពីព្រលានយន្ដហោះ បានពន្យល់ថា ការដឹកជញ្ជូនទាហាន និងក្រុមគ្រួសាររបស់ពួកគេនេះ ត្រូវបានធ្វើឡើង ២ដង ក្នុងមួយខែ ហើយក្ដីសង្ឃឹម ដែលថាអាចមានមនុស្សរស់រានមានជីវិត ពីគ្រោះថ្នាក់ធ្លាក់យន្ដហោះដូច្នេះ ទំនងជាមានតិចតួចបំផុត។ ប្រភពដដែលបានអះអាងថា៖ «មូលហេតុ​បង្ក​គ្រោះថ្នាក់ អាចបណ្ដាលមកពីបញ្ហាបច្ចេកទេស។ ស្ថានភាពឧត្តុនិយម មានលក្ខណៈល្អប្រសើរ។»។

គ្រោះថ្នាក់ ក្នុងវិស័យដឹកជញ្ជូន ទាំងផ្លូវអាកាស និងផ្លូវទឹក បានកើតឡើងជាញឹកញាប់ណាស់ នៅក្នុងប្រទេសភូមា ដែលត្រូវបានទុក ឲ្យស្ថិតក្នុងសភាព​ឯកោ អស់រយៈពេលរាប់សិបឆ្នាំ ដោយក្រុមមេដឹកនាំយោធា។ បើទោះជាក្រុមមេដឹកនាំយោធា បានរំលាយខ្លនឯង និងងាកមករករបបដឹកនាំ តាមបែប​ប្រជាធិបតេយ្យវិញក៏ដោយ ក៏ការថែរក្សា ការត្រួតពិនិត្យបច្ចេកទេស និងការជួសជុលសម្ភារៈដឹកជញ្ជូន តាមផ្លូវអាកាស និងផ្លូវទឹក នៅតែជាបញ្ហា​ចោទ​មួយ​នៅ​ឡើយ៕