«ខ្ញុំជាកំពូលអ្នកគាំទ្រ ប្រវត្តិជោគជ័យរបស់លោក» នេះជាឃ្លាខ្លីមួយ ក្នុងចំណោមឃ្លាខ្លីពីរ សរសេរជាភាសាអង់គ្លេស របស់លោក ហ៊ុន ម៉ានី អមទៅនឹងរូបថតមួយសន្លឹក ដែលកូនប្រុសនាយករដ្ឋមន្ត្រីរូបនេះ បានថតជាមួយលោក ជេក ម៉ា (Jack Ma) កំពូលមហាសេដ្ឋីចិន នៅក្នុងវេទិកា «ខ្សែ​ក្រវាត់ និង​វិថី សម្រាប់​កិច្ច​សហប្រតិបត្តិការ​អន្តរជាតិ» រៀបចំឡើង ​នៅ​ក្នុងរដ្ឋធានី​ប៉េកាំង ប្រទេស​ចិន។

តំណាងរាស្ត្រមណ្ឌលកំពង់ស្ពឺ លោក ហ៊ុន ម៉ានី ជាសមាជិកមួយរូប នៃគណៈប្រតិភូកម្ពុជា ដឹកនាំដោយឪពុករបស់លោក គឺលោកនាយករដ្ឋមន្ត្រី ហ៊ុន សែន សម្រាប់ដំណើរទៅចូលរួម នៅក្នុងវេទិកានេះ ដែលបានចាប់ផ្ដើមធ្វើ រវាងពីថ្ងៃ១៤ ទៅដល់ថ្ងៃទី១៥ ខែឧសភា។

រូបថត និងសំណេរជាភាសាអង់គ្លេសខាងលើ​ ត្រូវបានទំព័រហ្វេសប៊ុក របស់លោក ហ៊ុន ម៉ានី បង្ហោះ កាលពីម្សិលម៉ិញ ជាមួយនឹងការចែករំលែក យ៉ាងច្រើនសន្ធឹកសន្ទាប់ ពីសំណាក់ប្រិយមិត្តរបស់លោក។ រីឯឃ្លាជាភាសាអង់គ្លេសទីពីរវិញ លោក ហ៊ុន ម៉ានី បានសរសេរថា៖ «សូមអរគុណ សម្រាប់រូបថតមួយសន្លឹកនេះ លោក ជេក ម៉ា»។

លោក ជេក ម៉ា ជាស្ថាបនិក និងជាអគ្គនាយក អាលីបាបា គ្រូប (Alibaba Group - Internet)។ មកដល់ពេល​បច្ចុប្បន្ន បុរសជនជាតិចិនរូបនេះ មានអាយុ៥២ឆ្នាំ និងមានទ្រព្យសម្បត្តិច្រើនជិត ៣០ពាន់លានដុល្លារ ហើយជាប់លេខរៀង ជាអ្នកមានប្រាក់ច្រើន​ជាងគេ ទី ២៣ ក្នុងពិភពលោក។ នេះ បើតាមទស្សនាវដ្ដី «Forbes» ដែលចេញផ្សាយពីតួលេខនេះ ក្នុងឆ្នាំ២០១៧៕