ភេរវកម្មនៅឡុងដ៍៖ នគរបាលអង់គ្លេសចាប់ខ្លួនបាន៧នាក់
- ដោយ: ដ. កែវ ([email protected]) - ប៉ារីស ថ្ងៃទី២៣ មិនា ២០១៧
- កែប្រែចុងក្រោយ: March 23, 2017
- ប្រធានបទ: ភេរវកម្ម
- អត្ថបទ: មានបញ្ហា?
- មតិ-យោបល់
-
នៅយប់ថ្ងៃពុធ ចូលមកព្រឹកថ្ងៃព្រហស្បត្តិ៍នេះ នគរបាលអង់គ្លេស បានចាប់ខ្លួនមនុស្ស បានចំនួន៧នាក់ ដែលជាប់សង្ស័យ ថាមានពាក់ព័ន្ធនឹងភេរវកម្ម ក្បែរវិមានរដ្ឋសភា កណ្ដាលរាជធានី ឡុងដ៍័ កាលពីល្ងាចម្សិលម៉ិញ។ ភេរវកម្ម ដែលបានបណ្ដាលឲ្យមនុស្ស៣នាក់ស្លាប់ និងច្រើននាក់ទៀតរងរបួស។ ចំនួនជនរងគ្រោះដល់ជីវិត នៅក្នុងភេរវកម្ម បានថយមកនៅត្រឹមតែ៣នាក់វិញ ដែលខុសពីការប្រកាស កាលពីយប់ម្សិលម៉ិញ ថាជនរងគ្រោះ៤នាក់ បានស្លាប់បាត់បង់ជីវិត។
លោក «Mark Rowley» មេបញ្ជាការកងកម្លាំងប្រឆាំងភេរវកម្ម នៃនគរបាល «Scotland Yard» បានថ្លែងឲ្យដឹងថា៖ «យើងបានធ្វើប្រតិបត្តិការ ចាប់ខ្លួនបាន៧នាក់ នៅ៦កន្លែងផ្សេងគ្នា ក្នុងក្រុង "Birmingham (ភាគពាយ័ព្យ នៃរាជធានីឡុងដ៍)" ក្នុងរាជធានី ឡុងដ៍ និងក្នុងតំបន់ផ្សេងទៀត នៅលើផ្ទៃប្រទេស»។
លោកមេបញ្ជាការ បានពន្យល់បន្តថា ជនរងគ្រោះ ដែលបានបាត់បង់ជីវិតទាំងបីនាក់ រួមមាន៖ នគរបាលអាយុ៤៨ឆ្នាំម្នាក់ បុរសអាយុជាង ៥០ឆ្នាំ ម្នាក់ និងស្ត្រីអាយុជាង ៤០ឆ្នាំម្នាក់ទៀត ខណៈមនុស្ស ៧នាក់ផ្សេងទៀត ដែលរងរបួស កំពុងស្ថិតក្រោមការព្យាបាល នៅឯមន្ទីរពេទ្យ។
#BREAKING: Arrests made in police raid in Birmingham which is linked to #London terror attack - @SkyNews pic.twitter.com/Waj6wK5cDR
— Corrina Pysa (@CorrinaPysa) 23 mars 2017
ពីល្ងាចម្សិលម៉ិញ ជនបង្កដែលស្លៀកពាក់ពណ៌ខ្មៅ មានដុះពុកចង្កា និងពុកមាត់ បានបើករថយន្ដតូច ទៅបំបុកអ្នកដំណើរថ្មើរជើង នៅលើស្ពាន «Westminster» នៅចំពីមុខនាឡិការសកល «Big Ben»។ បន្ទាប់មក ជននេះបានកាន់កាំបិត ចុះចេញពីរថយន្ដ ទៅចាក់នគរបាលម្នាក់ នៅខាងមុខអាគាររដ្ឋសភាអង់គ្លេស មុននឹងព្យាយាមចូលទៅក្នុងអាគាររដ្ឋសភា។ ប៉ុន្តែជនបង្ករូបនេះ ត្រូវបានកងកម្លាំងប្រចាំការ នៅទីនោះ បាញ់សម្លាប់។
ប្រព័ន្ធផ្សព្វផ្សាយអង់គ្លេសជាច្រើន បានរាយការណ៍ថា នគរបាលបានរកឃើញជនជាច្រើន នៅក្នុងក្រុង «Birmingham» នៅភាគកណ្ដាលនៃប្រទេស ដែលជាប់សង្ស័យ នៅក្នុងភេរវកម្ម។ ទូរទស្សន៍ប៊ីប៊ីស៊ី បានអះអាងថា រថយន្ដធុនតូច ដែលត្រូវបានជនបង្ក បើកទៅ ជារថយន្ដដែលត្រូវបានជួល ចេញពីក្រុង «Birmingham»។ ក្រុមសារព័ត៌មាន ក៏អះអាងដែរថា ក្រុម«អ៊ីស្លាមនិយមជ្រុល» គឺក្រុមជាប់សង្ស័យធំជាងគេ នៅក្នុងហេតុការណ៍ ភេរវកម្មដ៏អាក្រក់ខាងលើ។
Attentat à Londres: des témoins racontent la panique sur le pont #AFP pic.twitter.com/PSAhBBnesr
— Agence France-Presse (@afpfr) 23 mars 2017
មកដល់ម៉ោងនេះ គេនៅមិនទាន់ឃើញ មានក្រុមណាមួយ ចេញមុខមកទទួលខុសត្រូវ ក្នុងការវាយប្រហារនេះនៅឡើយ៕