សភាពរបស់នារីសន្តិសុខ រោងចក្រស៊ិនតាយ ក្រោយរងគ្រោះ នូវការជះទឹកអាស៊ីត ពីសំណាក់ស្រ្តីម្នាក់ នៅ​ពេល​ដែល​ទស្សនិកជន បានឃើញហើយ ពិតជាគួរឱ្យខ្លោចចិត្តក្រៃលែង។ ឥទ្ធិពលនៃទឹកអាស៊ីត បានធ្វើរូបកាយ និង​មុខ​មាត់​របស់នាង ប្រែទៅជារលេះរលួយ ស្ទើរតែបាត់បង់ រូបរាងជាមនុស្សទៅហើយ។

រូបថតបុគ្គលិកសន្ដិសុខ វ័យ២០ឆ្នាំរូបនេះ ត្រូវបានគេយកបង្ហោះ ក្នុងបណ្តាញសង្គមហ្វេសប៊ុក ដែលសភាពរបស់នាង​នៅ​ពេល​នេះ ធ្វើឱ្យមនុស្សជាច្រើន មានការអាណិតអាសូរ យ៉ាងខ្លាំង។ ពួកគេបានសម្តែងការសោកស្តាយ ចំពោះករណីនេះ ដោយសារតែភ្លើងប្រច័ណ្ឌមួយពេល បានធ្វើឱ្យនារីម្នាក់ត្រូវបាត់បង់សម្រស់ និងប្រឈមមុខនឹងការខូចអនាគត់។

គួររម្លឹកថា កាលពីព្រលឹមថ្ងៃទី០៦ មិនា នារីជាសន្តិសុខរោងចក្រស៊ិនតាយខាងលើ ត្រូវបានស្រ្តីម្នាក់ ជះទឹកអាស៊ីត ខណៈពេលដែលនាងកំពុងដើរ ទៅធ្វើការជាមួយ កម្មកររោងចក្រផ្សេងៗទៀត ស្ថិតនៅមុខផ្សារ កាណាស៊ីធី ភូមិ​ចោម​ចៅ សង្កាត់ចោមចៅ ខណ្ឌពោធិ៍សែនជ័យ ។

ក្នុងថ្ងៃដដែលនោះដែរ ស្រ្តីម្នាក់ឈ្មោះ ស្រឿន ណាន់ ដែលជាជនសង្ស័យ ត្រូវបានសមត្ថកិច្ចឃាត់ខ្លួន។ ក្នុងពេល​សួរ​ចម្លើយ ស្រ្តីដែល​ជា​ជន​សង្ស័យនោះ បានសារភាពថា ខ្លួនពិតជាបានជះទឹកអាស៊ីត ទៅលើនារីរងគ្រោះពិតមែន ដោយ​សារតែ នារីរងគ្រោះ​មានទំនាក់ទំនង ជាមួយប្តីរបស់ខ្លួន ដែលជាសន្តិសុខរោងចក្រ ស៊ិនតាយ ដូចគ្នា។ ស្រ្តីសង្ស័យ មាន​អាយុ៣៨ឆ្នាំ មានមុខរបរ ជាកម្មការិនីរោងចក្រកាត់ដេរស្បែកជើង EVC និងជាប្រពន្ឋរបស់បុរសម្នាក់ ដែល​មាន​ស្នេហា​ជាមួយនារីរងគ្រោះ។ ស្ត្រីរូបនេះ ត្រូវបាន សមត្ថកិច្ចឃុំខ្លួន និងបានកសាងសំនុំរឿង បញ្ជូនទៅតុលាការ។

ចំណែកឯជនរងគ្រោះ ឈ្មោះ មាស វន្នី មានមុខរបរជាសន្តិសុខ យាមប្រចាំការ នៅរោងចក្រហួស៊ិនតាយ និង​ស្នាក់​នៅ​បន្ទប់ជួល នៅភូមិចោមចៅ សង្កាត់ចោមចៅ។ ជនរងគ្រោះមានស្រុកកំណើត នៅស្រុកក្រគរ ខេត្តពោធិ៍សាត់។ បច្ចុប្បន្ន​នេះ នារីរងគ្រោះ ដែលរងទឹកអាស៊ីត ធ្វើឲ្យរលេះរលួយពេញខ្លួន កំពុងទទួលការព្យាបាល នៅ​មន្ទីរពេទ្យ​កាល់ម៉ែត្រ៕