ការវាយប្រហារនេះ ត្រូវបានរៀបចំឡើង តាំងពីច្រើនខែមកហើយ តែប្រធានាធិបតីផុតអាណត្តិ លោក បារ៉ាក់ អូបាម៉ា (Barack Obama) មិនបានបើកភ្លើងខៀវ ដើម្បីផ្ទុះអាវុធនោះទេ។ ក្រុមការងារក្រោមបញ្ជា របស់​លោក អូបាម៉ា បាន​រៀបចំ​គម្រោងនេះឡើង ដើម្បី​អនុញ្ញាត ឲ្យធ្វើការវាយសម្រុក ទៅលើផ្ទះមួយ​ខ្នង​សង់​ពីឥដ្ឋ ស្ថិត​ក្នុង​តំបន់​ព្រៃ​ភ្នំ​មួយ ភាគកណ្ដាលនៃប្រទេសយ៉េមេន ដែលគេបានដឹងថា ជាសម្បុក​​របស់​​បណ្ដាញ​​ភេរវនិយម​ អាល់កៃដា (Al-Qaïda) ប្រចាំ​នៅ​ឧបទ្វីប​​អារ៉ាប៊ីសាអ៊ូឌីត ហៅកាត់ថា «AQPA»។

គោលបំណងសំខាន់ នៃគម្រោងវាយប្រហារនេះ គឹចង់រឹបអូសឲ្យបាន នូវប្រព័ន្ធកំព្យូទ័រ និង​ឧបករណ៍​អេឡិច​ត្រូនិក​ផ្សេង​ទៀត ដែលមាននៅក្នុងផ្ទះនោះ ដើម្បីអាចឲ្យដឹង ពីព័ត៌មាន ឬពីគម្រោងសំងាត់​ទាំងឡាយ របស់​បណ្ដាញ​ភេរវនិយម នៅក្នុងតំបន់។

ប៉ុន្តែគម្រោងវាយលុក ដោយមានការបញ្ជូន កងកម្លាំងថ្មើរជើងអាមេរិក ទៅប្រយុទ្ធដោយ​ផ្ទាល់​នេះ ត្រូវ​បាន​ប្រធានាធិបតី អូបាម៉ា និងក្រុម​ការងារ​របស់​លោក លើក​ពេលម្ដង​ជាពីដង។ ​លោក អូបាម៉ា បាន​គិត​ថា វា​នឹង​​មាន​​ហនិភ័យ​ច្រើន ប្រសិនជា​លោក​បើក​ភ្លើងខៀវ ឲ្យផ្ទុះអាវុធ។ នេះ បើតាម​ការ​អះអាង របស់​​សារព័ត៌មាន «New York Times»។

ផ្ទុយទៅវិញ ប្រធានាធិបតីអាមេរិកថ្មី លោក ដូណាល់ ត្រាំ (Donald Trump) ដែលទើប​នឹង​ចូល​មក​កាន់​តំណែង បានបើកភ្លើងខៀវ ឲ្យធ្វើការវាយលុក ទៅលើភូមិនោះ កាលពីថ្ងៃអាទិត្យទី២៩ ខែមករា​កន្លង​មក។ បើ​តាម​ក្រុម​អ្នក​ជំនាញ​ឯករាជ្យ​មួយ ដែលមានជំនាញ ខាងការសិក្សា​ទៅលើ​ជម្លោះ​អន្តរជាតិ (ហៅជា​ភាសា​អង់គ្លេសេ «International Crisis Group») បាន​អះអាង​ថា មានស្ត្រីនិងកុមារ យ៉ាងហោច​១០នាក់ បាន​ស្លាប់​នៅក្នុង​ការ​វាយប្រហារ​ខាងលើ។ ក្រុមអ្នកជំនាញ បានសម្ដែង​​ការព្រួយបារម្ភ​បន្ថែមថា អាចនឹង​មាន​ជន​ស៊ីវិល​ស្និត​​នឹង​​បណ្ដាញភេរវនិយម​ច្រើននាក់​ទៀត ក៏​ត្រូវ​បានសម្លាប់​ដែរ។

រីឯ​ខាងអាមេរិកវិញ ទាហានម្នាក់បានស្លាប់ និងបីនាក់ផ្សេងទៀត បានរងរបួស។ មន្ទីរប៉ង់តាហ្គោន (Pentagone = ក្រសួង​ការពារ​ជាតិអាមេរិក) បានទទួលស្គាល់ថា កងកម្លាំង​ភេរវនិយម យ៉ាងតិច១៤នាក់ (ដែល​ត្រូវ​​បាន​សម្លាប់) ហាក់ដូចជា​បាន​ដឹង​ជាមុន ពីការ​វាយ​សម្រុកនេះ និង​បាន​ប្រយុទ្ធ តទល់នឹង​​កងទ័ព​​អាមេរិក​វិញ យ៉ាង​​ខ្លាំងក្លា។

ដោយ​ឡែក នៅក្នុងការផ្សាយមួយ របស់សារព័ត៌មាន «The Guardian» បានឲ្យដឹងថា នៅក្នុងចំណោម​ជនរងគ្រោះ ជាជនស៊ីវិលទាំងនោះ មានកុមារីអាយុ៨ឆ្នាំម្នាក់ ជាជនជាតិអាមេរិក ដែលធ្វើឲ្យខាងអាមេរិក មាន​មនុស្ស​ស្លាប់​ឡើង​ដល់​ពីរនាក់។ ជីតារបស់កុមារី បានអះអាង​ដោយ​ខ្លួនឯង​ផ្ទាល់ ប្រាប់​សារព័ត៌មានថា ចៅ​ស្រី​របស់​លោក ត្រូវបាន​ទាហាន​អាមេរិកាំង បាញ់ចំ​ក និង​បាន​ស្លាប់ នៅ២ម៉ោង​ក្រោយ​ការ​វាយលុក។ ជីតា​រូប​នេះ ​បាន​លើក​ឡើង​ថា៖ «ខ្ញុំមិនយល់​ពីហេតុអ្វី បានជាកងទ័​​ព​​អាមេរិក បានប្រើប្រាស់​កម្លាំង​កុម្មង់ដូ (Commando) ដ៏​សម្បើម ទៅលើភូមិ​ដ៏តូច​មួយ របស់​ប្រទេស​យ៉េមេន ដែល​ប្រៀប​បាន ទៅនឹង​ការ​វាយ​សម្រុក ចូល​សម្លាប់ អូសាម៉ា ប៊េនឡាដេន (Oussama Ben Laden) នៅក្នុង​​ប្រទេស​ប៉ាគីស្ដង់​ដូច្នេះ»៕

» កុមារី ដែលបានស្លាប់ នៅក្នុងហេតុការណ៍៖