ហ៊ុន សែន ទម្លាយរឿងអាស្រូវ«ផ្លូវភេទ» របស់មន្ត្រី«Global Witness»
- ដោយ: ដារី ([email protected]) - ភ្នំពេញ ថ្ងៃទី២០ មករា ២០១៧
- កែប្រែចុងក្រោយ: January 20, 2017
- ប្រធានបទ: នយោបាយខ្មែរ
- អត្ថបទ: មានបញ្ហា?
- មតិ-យោបល់
-
ប្រតិកម្មរបស់លោក ហ៊ុន សែន ពិតជាមិនធម្មតា និងមើលទៅ នៅមានវែងឆ្ងាយតទៅមុខទៀត! នោះគឺការទម្លាយ រឿងអាស្រូវផ្លូវភេទ ដែលលោកនាយករដ្ឋមន្ត្រីកម្ពុជា បានអះអាងថា ជាអាថ៌កំបាំង របស់បុគ្គលិកស្រី ជាតិខ្មែរកាត់បារាំងមួយរូប នៃអង្គការឃ្លាំមើលពិភពលោក (Global Witness) នៅអំឡុងពេលដែលបុគ្គលិករូបនេះ មានវត្តមានមកធ្វើការនៅកម្ពុជា។
នៅពីក្រោមពាក្យផ្ដាំផ្ញើរ ដែលនាយករដ្ឋមន្ត្រីកម្ពុជា បានប្រាប់អង្គការអន្តរជាតិខាងលើ ឲ្យឈប់ល្ងង់ ឈប់ឆ្កួត និងគួរទៅរៀនបន្ថែមទៀតនោះ លោក ហ៊ុន សែន នៅបានលើកពីអាថ៌កំបាំង នៃរឿងរ៉ាវផ្លូវភេទ នៅក្នុងផ្នែកដាក់មតិយោបល់ ដូច្នេះថា៖ «រឿង Global Witness ចាប់ផ្តើមពីបុគ្គលឹកស្រីម្នាក់ ខ្មែរកាត់បារាំង ទៅធ្វើការនៅកម្ពុជា ទៅលួចសាហាយ ជាមួយប្តីគេ ដល់ប្រពន្ធគេទៅតាមរករឿងដល់ផ្ទះ បែជាចោទថា អ្នករកសុីកាប់ឈើ ទៅរករឿង»។
លោក ហ៊ុន សែន នៅបានពន្យល់ថា បុគ្គលិកស្ត្រីរូបនោះ មានម្ដាយជាតិខ្មែរ និងឪពុកជាតិបារាំង។ លោកបានសរសេរបញ្ជាក់ទៀតថា៖ «ពេលនោះ ទូតអង់គ្លេសក៏ដឹងរឿងនេះ។ រឿងអាស្រូវផ្លូវភេទ គេបង្វែរទៅជារឿងផ្សេង ពិតជាថោកទាបមែន។»។
លោក ហ៊ុន សែន មិនបានបង្ហើបបន្តទេថា តើបុគ្គលិកស្ត្រីនោះជានរណា ឈ្មោះអ្វី បើទោះជាប្រិយមិត្តរបស់លោក នៅលើទំព័រហ្វេសប៊ុក បានឈ្លេចសួរលោកយ៉ាងណាក៏ដោយ។ ប៉ុន្តែការអះអាងរបស់លោកនេះ ទំនងជាចង់ផ្ដល់ទម្ងន់ ទៅលើប្រតិកម្មខាងលើរបស់លោក ដែលចាត់ទុកអង្គការ «Global Witness» ដែលមានទីស្នាក់ការធំ នៅរាជធានី ឡុងដ៍ ប្រទេសអង់គ្លេស ថាបានប្រឆាំងលោក ទាំង«ឆ្កួតលីលា»។
កាលពីថ្ងៃពុធ ទី១៨ ខែមករា អង្គការអន្តរជាតិមួយនេះ ដែលមានបណ្ដាញ សឹងនៅពាសពេញពិភពលោក បានរិះគន់លោក ហ៊ុន សែន និងរបបដឹកនាំរបស់លោក តាមរយៈសេចក្ដីប្រកាសព័ត៌មានរបស់ខ្លួន ថាពោរពេញដោយអាថ៌កំបាំង ការបំផ្លិចបំផ្លាញធនធានធម្មជាតិ អំពើពុករលួយ បក្ខពួកនិយម ជាមួយនឹងការក្ដោបក្ដាប់ នៅក្នុងដៃនៃសមាជិកគ្រួសារត្រកូល «ហ៊ុន» នូវសរសៃឈាមសេដ្ឋកិច្ចជាតិកម្ពុជា។ ការចេញផ្សាយសេចក្ដីប្រកាសព័ត៌មាន បានធ្វើឡើង នៅស្របពេលដំណើរទស្សនកិច្ច របស់លោក ហ៊ុន សែន នៅក្នុងវេទិកាសេដ្ឋកិច្ចពិភពលោក ដែលបានប្រព្រឹត្តិទៅ នៅក្រុង ដាវូស (Davos - ប្រទេសស្វីស)។
អ្នកស្រី អេលីស ហារីសាន់ (Alice Harrison) មន្ត្រីប្រឹក្សាខាងទំនាក់ទំនង របស់អង្គការឃ្លាំមើលពិភពលោក បានថ្លែង នៅក្នុងសេចក្ដីប្រកាសព័ត៌មាននោះថា វេទិកាសេដ្ឋកិច្ចពិភពលោកនេះ គួរបិទទ្វារមិនត្រូវឲ្យមនុស្សដូចលោក ហ៊ុន សែន ចូលរួមឡើយ។ អ្នកស្រីថា៖ «លោក ហ៊ុន សែន និងគ្រួសាររបស់គាត់ កំពុងក្ដោបក្ដាប់សេដ្ឋកិច្ចរបស់ប្រទេស។ ដូច្នេះ រាល់ទឹកប្រាក់ទាំងឡាយ របស់ក្រុមអ្នកវិនិយោគទុន ថ្មីៗទាំងនោះ នឹងអាចធ្លាក់ចូល ទៅក្នុងហោប៉ៅផ្ទាល់ របស់ពួកគេ។»
រឿងរ៉ាវ មិនមែនមានត្រឹមតែសេចក្ដីប្រកាសព័ត៌មានមួយនេះទេ តែនៅក្នុងពេលកន្លងមក អង្គការ «Global witness» នៅបានចេញរបាយការណ៍អង្កេតរបស់ខ្លួន ពាក់ព័ន្ធនឹងករណីរសើបៗជាច្រើន ក្នុងនោះមាន របាយការណ៍ ទាក់ទងនឹងការកាប់បំផ្លាញព្រៃឈើ និងសម្បត្តិធនធានធម្មជាតិ ការបើកកកាយ ពីអំពើពុករលួយ និងជាពិសេស ការឃុបឃិតគ្នា ដើម្បីធ្វើមានបាន ដែលមានលក្ខណៈជាប្រព័ន្ធ នៅក្នុងចំណោមក្រុមគ្រួសារ របស់អ្នកកាន់អំណាច នៅកម្ពុជា និងនិយាយឲ្យចំ គឺក្រុមគ្រួសារត្រកូល «ហ៊ុន» តែម្ដង៕