កីឡាករវ័យ ២៤ឆ្នាំរូបនេះ នៅតែមានជំនឿថា គាត់នៅមានសមត្ថភាព អាចចូលលេងឲ្យក្រុម ដែលកំពុងតែនាំមុខគេ លើកំពូលតារាងបាន ហើយគាត់និយាយថា គាត់ត្រូវការចូលលេង ក្នុងការប្រកួតឲ្យបានទៀតទាត់ ដើម្បីបង្ហាញ​ពីភាព​ប៉ិនប្រសប់របស់គាត់ពិតប្រាកដ។

ខ្សែបំរើរបស់ក្រុមម៉ែនឆេស្ទើ យូណៃធីត (Manchester United) កីឡាករអេនដឺសិន (Anderson) បានប្រាប់ឲ្យដឹងថា គាត់​មានខកចិត្តខ្លាំងណាស់ ចំពោះអាជីពរបស់គាត់ក្នុងទឹកដីអូលត្រាហ្វដ (Old Trafford) ដោយរូបគាត់ពុំសូវបានចូលលេង។

ការចូលរួមប្រកួតកាលពីថ្ងៃច័ន្ទ ក្នុងការប្រកួតអេហ្វអេខាប់ (FA Cup) ជាមួយនឹងក្រុមរីឌីង (Reading) សរុបមក គឺជាវត្តមាន​លើកទី ១២សំរាប់រូបគាត់ក្នុងរដូវកាលនេះ។ ដោយសារតែ មានកីឡាករ ថម ខ្លេវ៉ឺលី (Tom Cleverley), មីឆែល ខារិក (Michael Carrick), និងខ្សែការពារ កណ្តាល ផីល ចូន (Phil Jones) ក៏អាចលេងជាខ្សែបំរើបានដែរនោះ ដូច្ឆេះធ្វើឲ្យ​រូប​គាត់មាន ឪកាសតិចតួចក្នុងការចូលលេង។

ទោះបីជាយ៉ាងណា យើងកត់សំគាល់ឃើញថា បញ្ហារបួសរបស់កីឡាករអេនដឺសិន គឺជាមូល ហេតុចំបងសំរាប់គាត់ ដែល​ធ្វើឲ្យខកខានក្នុងការប្រកួតជាច្រើនកន្លងមក។

កីឡាករអេនដឺសិន បាននិយាយប្រាប់ដល់កាសែតអ៊ិនដេផិនដិន (The Independent) ថា «នៅពេលដែលខ្ញុំ ត្រូវដើរទៅ​មុខ២ជំហ៊ាន វាហាក់ដូចជា ខ្ញុំត្រូវដើរថយក្រោយ ៣ជំហ៊ាន ដែរ។ ខ្ញុំមានបញ្ហាខ្លះៗ ប៉ុន្តែនៅពេល ដែលខ្ញុំមិនមាន​បញ្ហា​ទាំងនេះ គឺខ្ញុំដឹងថា ខ្ញុំមាន សមត្ថភាពអាចចូលលេងបាន»។

អេនដឺសិនបានចូលលេងបាន ៦នាទីក្នុងការប្រកួត ១-១ ស្មើជាមួយក្រុមរៀលម៉ាឌ្រីដ (Real Madrid) កាលពីថ្ងៃពុធ។ នៅ​ចុងសប្តាហ៏នេះ កីឡាករចូន មិនអាចចូលលេងបានទេ ក្នុងការធ្វើ ដំណើរទៅប្រកួតជាមួយនឹងក្រុមបាតតារាង ឃ្យូភីអរ (QPR) ដូច្នេះធ្វើឲ្យកីឡាករប្រេស៊ីលរូប នេះ មានសង្ឃឹមច្រើនថា នឹងបានចូលលេងក្នុងការប្រកួត នៅថ្ងៃសៅរ៏ខាងមុខ។

កីឡាកររូបនេះបានបន្តថា «គ្រូបង្វឹក អាចប្តូរបានគ្រប់ពេល ហើយនេះជាវិធីសាស្ត្ររបស់ ក្រុមម៉ែនឆេស្ទើ យូណៃធីត។ ប៉ុន្តែ​នៅក្នុងក្រុមនេះ គ្រប់កីឡាករទាំងអស់ តែងតែចង់លេង ទាំងរូបខ្ញុំ និង កីឡាករដទៃៗទៀតក៏ដូច្ឆោះដែរ»៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២០ ខែកុម្ភះ ឆ្នាំ២០១៣
ប្រភព៖ Goal.com
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ