ឥណ្ឌូនេស៊ី​បង្ក្រាប​គម្រោង​ភេរកម្ម ដែល​ត្រៀម​ធ្វើ​នៅ​ថ្ងៃ​ណូអែល

នគរបាលឥណ្ឌូនេស៊ី បានបង្ក្រាបជនជ្រុលនិយម ចំនួនបីនាក់ ដែល​ត្រៀម​រៀបចំ បំផ្ទុះអំពើភេរវកម្ម នៅ​ថ្ងៃ​បុណ្យ​ណូអែល ខាង​មុខ។ នេះបើតាម​ការ​ប្រកាស​ឲ្យដឹង របស់អាជ្ញាធរឥណ្ឌូនេស៊ី នៅថ្ងៃពុធទី២១ ខែធ្នូនេះ។
ឥណ្ឌូនេស៊ី​បង្ក្រាប​គម្រោង​ភេរកម្ម ដែល​ត្រៀម​ធ្វើ​នៅ​ថ្ងៃ​ណូអែល
រូបភាពឃោសនា របស់យុទ្ធជនស្ម័គ្រប្រយុទ្ធ នៃក្រុមរដ្ឋអ៊ីស្លាម។ (រូបថតផ្តិតពីវីដេអូ)
Loading...
  • ដោយ: កេសរ កូល ([email protected]) - ភ្នំពេញ ថ្ងៃទី២១ ធ្នូ ២០១៦
  • កែប្រែចុងក្រោយ: December 21, 2016
  • ប្រធានបទ: ភេរវកម្ម
  • អត្ថបទ: មានបញ្ហា?
  • មតិ-យោបល់

ជនសង្ស័យ​​ ឥស្លាមនិយមជ្រុល ចំនួនបីនាក់ ត្រូវបានសម្លាប់នៅក្នុងថ្ងៃពុធទី២១ ខែធ្នូនេះ នៅក្នុងតំបន់​ជាយ​ក្រុង នៃរដ្ឋធានី ចាការតា។ ប្រតិបត្តិការ​ប្រឆាំង​អំពើភេរវកម្ម ដែលឈានទៅដល់បង្ក្រាបបាន នូវជនទាំង​បី​នាក់ បានរកឃើញគ្រាប់បែកជាច្រើន នៅក្នុងគេហដ្ឋាន របស់ជនសង្ស័យទាំងនេះ។ នេះ បើតាមការ​ប្រកាស​ឲ្យ​ដឹង របស់​នគរបាលឥណ្ឌូនេស៊ី ដោយបានបញ្ជាក់បន្ថែមថា គម្រោងភេរវកម្មអត្តឃាតមួយ ដែល​ក្រុម​នេះ​ត្រូវ​វៀប​ចំ​ធ្វើ នៅ​ពេល​បុណ្យណូអែល ឬបុណ្យគ្រឹស្មាស៍ ក្នុងប៉ុន្មានថ្ងៃខាងមុខ ត្រូវអាជ្ញាធរបំបែក បាន​ជា​ស្ថាពរ។

ប្រភពពីមន្ត្រីនគរបាល បានឲ្យដឹងថា ជនសង្ស័យទាំងនេះ បានបដិសេធមិនប្រគល់ខ្លួន ឲ្យ​នគរបាល​ឡើយ នៅ​ពេលមានការឡោមព័ទ្ធ និងក្រោយមក មានការវាយសម្រុកចូល ពីសំណាក់កងកម្លាំងនគរបាល ទៅ​ក្នុង​គេហដ្ឋាន​របស់ពួកគេ ដែលស្ថិតនៅក្នុងក្រុង «Tangerang» មានចំងាយ​ប្រមាណ​ជា២៥គីឡូម៉ែត្រ ខាងលិច​រដ្ឋធានី ចាការតា។ ការបដិសេធនេះ បានបង្កឲ្យមានការផ្ទុះអាវុធឡើង។

អ្នកនាំពាក្យ របស់នគរបាលជាតិឥណ្ឌូនេស៊ី បានថ្លែងឲ្យដឹងដែរថា៖ «យើងបានស្នើទៅពួកគេទាំងបី ឲ្យ​អាជ្ញាធរ​ចាប់​ខ្លួន តែពួកគេបានបដិសេធ។ ម្នាក់​ពីក្នុង​នោះ បានគប់គ្រាប់បែកមួយគ្រាប់ មកកាន់​នគរបាល​ថែម​ទៀត។ ប៉ុន្តែជាសំណាងល្អ គ្រាប់បែកនោះ មិនបានផ្ទុះទេ។ បន្ទាប់មក យើងបានតបតរ​ទៅវិញ ដោយ​ហ្មឺងម៉ាត់​បំផុត។»។

គម្រោងធ្វើភេរវកម្មនេះ ត្រូវបានបែកធ្លាយ ដោយសារសមាជិកម្នាក់ របស់ក្រុមអ៊ីស្លាមនិយមជ្រុលទាំងនេះ ត្រូវ​បាននគរបាលចាប់ខ្លួន តាំងពីព្រឹកព្រហាម ថ្ងៃពុធដដែលនេះ ហើយសមាជិកម្នាក់នោះ បានបង្ហើបប្រាប់ ទៅ​អ្នក​ស៊ើបសួរ ពីគម្រោងការរបស់ជនសង្ស័យទាំងបី ក្នុងការរៀបចំអំពើ​ភេរវកម្មអត្តឃាត នៅក្នុងតំបន់​ដែល​មាន​សម្បូរ​ដោយ​​មនុស្ស​​​​មួយកន្លែង ក្នុងឱកាសបុណ្យណូអែល ឬបុណ្យគ្រឹស្មាស៍ខាងមុខ។

ប្រតិបត្តិការនៅថ្ងៃពុធនេះ បានធ្វើឡើង​មិនដល់​ពីរសប្ដាហ៍ផង ក្រោយការចាប់ខ្លួន ជនឥស្លាមនិយមជ្រុល ចំនួន​បួននាក់ (ក្នុងនោះមានស្ត្រីម្នាក់) នៅក្នុង​តំបន់ជាយក្រុង នៃរដ្ឋធានីចាការតា ដែលមានគម្រោង​ដាក់​គ្រាប់​បែក បំផ្ទុះប៉ុស្ដ៍យាម​របស់នគរបាល ប្រចាំនៅវិមានប្រធានាធិបតី​ឥណ្ឌូនេស៊ី។ នគរបាល​បាន​អះអាងថា សមាជិក​ភាគ​ច្រើន​នៃក្រុមនេះ ជាផ្នែកមួយ នៃបណ្ដាញ​ឥស្លាម​និយមជ្រុល ដែលបានស្មោះស្ម័គ្រ បម្រើឲ្យ​ក្រុម​រដ្ឋអ៊ីស្លាម (ពាក្យ​អារ៉ាប់​ហៅ Daech ពាក្យ​កាត់​​បារាំង​​ហៅ EI ពាក្យ​​កាត់​​​អង់គ្លេស​​​ហៅ ISIS)។

កងកម្លាំង​នគរបាលឥណ្ឌូនេស៊ី គឺទិសដៅដ៏សំខាន់បំផុត សម្រាប់ការវាយប្រហារ ពីសំណាក់​ក្រុម​ឥស្លាម​និយម​ជ្រុល នៅក្នុងប្រទេសនេះ ឬមាន​ជាប់​ទាក់ទង នឹងបណ្ដាញភេរវនិយម មកពីក្រៅប្រទេស។ បញ្ហា​ដែល​បង្ក​ការ​ព្រួយ​បារម្ភ ដល់អាជ្ញាធរមិនតិចដែរនោះ នៅត្រង់ថា ពលរដ្ឋឥណ្ឌូនេស៊ី​ជា​ច្រើន​រយ​នាក់ បានធ្វើ​ដំណើរ​ទៅ​«រួម​ស្ម័គ្រ​ប្រយុទ្ធ» ជាមួយក្រុមរដ្ឋអ៊ីស្លាម នៅឯមជ្ឈឹមបូព៌ា ហើយពួកគេ​អាចនឹងមក​បង្កើត ឲ្យមានជាអំពើ​ភេរវកម្ម នៅក្នុង​ប្រទេស​​​កំណើត​​របស់​ខ្លួន នៅពេល​ដែលពួកគេ​​​ត្រឡប់​មក​វិញ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...