សេចក្ដីសារភាពមួយ ដែលបង្កឲ្យព្រឺដល់ឆ្អឹងខ្នង បានធ្លាយចេញពីមាត់ផ្ទាល់ របស់ប្រមុខរដ្ឋមួយរូប ដែល​បាន​ជាប់ឆ្នោត ក្លាយជាប្រធានាធិបតី កាល​ពី​ប៉ុន្មាន​ខែមុន។ លោក រ៉ូឌ្រីចូ ឌុយតែតេ (Rodrigo Duterte) ប្រធានា​ធិបតី​នៃកោះហ្វីលីពីន បានថ្លែងអះអាង កាលពីដើមសប្ដាហ៍នេះថា លោកបានសម្លាប់ ដោយ​ផ្ទាល់​ដៃ​លោក នូវ​មនុស្ស​ជាច្រើននាក់ ដែលរងការសង្ស័យ ថាជាឧក្រិដ្ឋជន នៅក្នុងអំឡុងពេលលោក កាន់តំណែង​ជា​អភិបាល​ក្រុង ដាវ៉ៃ (Davao ស្ថិតនៅ​ភាគ​ខាង​ត្បូង)។ ការកំទេចដោយផ្ទាល់ដៃលោកទាំងនោះ ត្រូវបាន​លោក​បញ្ជាក់​ទៀត​ថា គឺដើម្បីធ្វើជា«គំរូ»​ ដល់កងកម្លាំង​នគរបាល។

នៅចំពោះអ្នកជំនួញ និងអ្នកមុខអ្ន​កការជាច្រើននាក់ លោក រ៉ូឌ្រីចូ ឌុយតែតេ អាយុ៧១ឆ្នាំ បានថ្លែងឡើង​ដូច្នេះ ដើម្បី​ធ្វើអត្ថាធិប្បាយ ទៅលើ​យុទ្ធនាការ​កណ្ដាប់ដៃដែក ប្រឆាំងបណ្ដាញជួញដូរគ្រឿងញៀន នៅលើផ្ទៃ​ប្រទេស ដែលបានសម្លាប់មនុស្ស អស់ជាង៥០០០នាក់ តាំងពីថ្ងៃទី៣០ ខែមិថុនា (ឆ្នាំ​២០១៦) នៃការចូល​កាន់​តំណែង​ដំបូង ជាប្រធានាធិបតី របស់លោកនោះមក។ លោកប្រធានាធិបតី បានថ្លែងឡើងថា៖ «នៅ​ក្រុង​ដាវ៉ៃ ខ្ញុំបាន​ធ្វើវា​ឲ្យ​ផ្ទាល់​ដៃ ដើម្បីបង្ហាញទៅពួកអាដែង (កងកម្លាំងនគរបាល) ថាបើខ្ញុំអាចធ្វើបាន ហេតុអី​ពួកគេ​មិន​អាច​ធ្វើ​វា​បាន?»។

លោក រ៉ូឌ្រីចូ ឌុយតែតេ បានរៀបរាប់ពីយុទ្ធវិធី ដែលលោកបានប្រើប្រាស់ នៅពេល​លោក​នៅជាអភិបាល​ក្រុង អស់រយៈពេលជាង២០ឆ្នាំ យ៉ាងដូច្នេះថា៖ «ខ្ញុំបានជិះម៉ូតូឈ្លប នៅតាមដងផ្លូវនានា នៃក្រុងដាវ៉ៃ ដើម្បី​ស្វែង​រក​បញ្ហា។ បន្ទាប់មក ខ្ញុំបានបង្កឲ្យមាន​ការ​ប្រឈម​មុខ​មួយ​ឡើង ដើម្បីអាចសម្លាប់ (ជននោះ)។»។

សម្រាប់ក្រុមអ្នកការពារសិទ្ធិមនុស្ស បានចោទលោក រ៉ូឌ្រីចូ ឌុយតែតេ ថាបានបញ្ជា ឬនៅពីក្រោយ​កង​កម្លាំង​ពេជ្ឈឃាត ជាច្រើនក្រុម ដែលទំនង​ជា​បាន​សម្លាប់​មនុស្ស ច្រើនជាង១០០នាក់ នៅក្រុងដាវ៉ៃ។ សហរដ្ឋ​អាមេរិក អង្គកា​រសហ​ប្រជាជាតិ និងសហគមន៍អ៊ឺរ៉ុប បានធ្វើការថ្កោលទោស ជាលក្ខណៈ​អន្តរជាតិ ទៅលើ​​នយោបាយ​​បង្ក្រាប បណ្ដាញជួញដូរគ្រឿងញៀន របស់លោក ជាពិសេសនៅត្រង់ចំណុច ដែលលោក​​ប្រធានា​ធិបតី​រូប​នេះ បាន​លើក​ទឹកចិត្ត ដល់ពលរដ្ឋ​សមញ្ញ ឲ្យសម្លាប់ ឬធ្វើការឃាត់ខ្លួន ជនសង្ស័យ ដោយ​សេរី។

ទោះជាមានការរិះគន់ ពីសំណាក់សហគមន៍អន្តរជាតិក៏ដោយ តែលោក ឌុយតែតេ បានថ្លែងជាថ្មី នៅក្នុងពិធី​ដដែល​នោះ​ថា លោកគ្មានបំណង នឹង​បញ្ឈប់​នយោបាយខាងលើនេះទេ ដោយលោកបញ្ជាក់ថា វាមិន​បាន​រំលោភ ទៅ​លើ​ច្បាប់​អ្វីណាមួយឡើយ។ លោកប្រធានាធិបតី ដែលធ្លាប់​ជាមេធាវីមួយរូបនោះ បានបញ្ជាក់ថា នគរបាលបានធ្វើអន្តរាគមន៍ (បាញ់សម្លាប់) ដោយប្រើសិទ្ធិការពារខ្លួន ហើយមរណភាពជាច្រើន បាន​កើត​ចេញ​ពី​ការ​ជម្រះ​បញ្ជី រវាង​ក្រុម​ឧក្រិដ្ឋជន៕