តុល្យភាព នៃចំនួនជនរងគ្រោះដល់ជីវិត បានបន្តកើនឡើង យ៉ាងរន្ធត់ បន្ទាប់ពីអំពើភេរវកម្មចំនួនពីរផ្ទួនៗគ្នា កាល​ពី​យប់​ថ្ងៃសៅរ៍ ដែលបានវាយប្រហារ នៅកណ្ដាលក្រុង អ៊ីស្ដាំប៊ូល នៃប្រទេសទួរគី ក្បែរនឹង​កីឡាដ្ឋាន​បាល់​ទាត់​ឈ្មោះ «Vodafone Arena»។ របាយការណ៍នៅម៉ោងនេះ ដែលប្រកាសឡើង ដោយលោក «Süleyman Soylu» រដ្ឋមន្ត្រីមហាផ្ទៃ នៃប្រទេសទួរគី បានឲ្យដឹងថា អ្នកស្លាប់មានចំនួនដល់៣៨នាក់ និង​ជន​រង​របួស មាន​ចំនួន​១៦៦នាក់។

» ទិដ្ឋភាពនៅមុនពេលផ្ទុះគ្រាប់បែកលើកទីមួយ៖

-#TURQUIE : Des images prises par un vidéaste amateur montrent l'instant de la double explosion près du stade Vodafone à #Istanbul. pic.twitter.com/wYfKkQS6MR

— Lies⚡️Breaker (@Lies_Breaker) 10 décembre 2016

ភេរវកម្មទាំងពីរបានកើតឡើង មុនក្រោយគ្នាប្រមាណជា ៤៥វិនាទី។ រថយន្ដមួយគ្រឿង ដែលត្រូវបាន យក​មក​ចត​ចោល នៅក្បែរ​រថយន្ដ​នគរបាល ​ចំពី​មុខ​ច្រក​ចូល​កីឡាដ្ឋាន បានបំផ្ទុះខ្លួនឡើង៖

បន្ទាប់មក ភេរវកម្មទីពីរបានកើតឡើង បង្កដោយភរវជនអត្តឃាតម្នាក់។ ជននោះ​​បានរត់​ទៅបំផ្ទុះខ្លួន នៅ​​ក្នុង​​ចំណោម​​កង​​កម្លាំង​នគរបាល ដែលកំពុងឈរជើង នៅក្នុងសួនច្បារ «Maçka» ស្ថិត​នៅ​មិនឆ្ងាយប៉ុន្មាន ពី​​កីឡាដ្ឋាន។

លោករដ្ឋមន្ត្រីមហាផ្ទៃ បានបញ្ជាក់ថា ជនរងគ្រោះដល់ជីវិតទាំង៣៨នាក់នោះ មាន៣០នាក់ជានគរបាល ៧​នាក់​ជាពលរដ្ឋស៊ីវិល និងម្នាក់ទៀត កំពុងស្វែង​រកការ​កំណត់ ពីអត្តសញ្ញាណ។ លោកបានថ្លែងបន្តថា មក​ដល់​ពេលនេះ គ្មានការចេញមុខ មកប្រកាសទទួលស្គាល់ ការវាយប្រហារនេះនៅឡើយ បើតាមការ​ស៊ើប​អង្កេត ក្នុង​​ជំហានដំបូង បានទម្លាក់​ការទទួលខុសត្រូវ នៃអំពើភេរវកម្មទាំងពីរ ទៅលើក្រុមនិយមបំបែកខ្លួន របស់​គណបក្ស​ពលករ​ជាតិ​គួដ ហៅកាត់ថា «PKK»។

» ទិដ្ឋភាពនៅបន្ទាប់ពីផ្ទុះរថយន្ដ ក្នុងភេរវកម្មទីមួយរួច៖

រីឯឧបនាយករដ្ឋមន្ត្រីទួរគី លោក «Numan Kurtulmus» វិញ​បាន​លើក​ឡើង​ថា៖ «អំពើ​​ភេរវកម្ម​​នេះ មានបំណង​វាយ​ប្រហារ​ច្បាស់​ណាស់ ទៅ​លើ​កងកម្លាំងប្រឆាំងកុបកម្ម របស់នគរបាលជាតិ»។

ប្រទេសទួរគីទាំងមូល ត្រូវបានប្រកាសឲ្យកាន់ទុក្ខថ្នាក់ជាតិ នៅពេញមួយថ្ងៃអាទិត្យនេះ ហើយរាល់ទង់​ជាតិ​ទាំង​ឡាយ ត្រូវបានបញ្ជាឲ្យទម្លាក់ មកត្រឹម​ពាក់​កណ្ដាល។ ទីភ្នាក់ងារព័ត៌មាន «Anadolu» ដែលស្និត​​នឹង​រដ្ឋាភិបាល បាន​រាយការណ៍ថា លោកប្រធានាធិបតី «Recep Tayyip Erdogan» បានពន្យាពេល ដំណើរ​ទស្សនកិច្ច​​របស់​លោក ទៅកាន់ប្រទេស​កាហ្សាក់ស្ដង់ ដែលបានគ្រោងនឹងធ្វើ នៅដើមសប្ដាហ៍ក្រោយនេះ៕