លោកប្រធានាធិបតី វ្លាឌីមៀរ ពូទីន (Vladimir Poutine) អាចនឹងមិនទទួលឯកត្តកម្ម ជាមេដឹកនាំ​ដែលស្ថិតក្នុងតំណែងយូរជាងគេ ក្នុងពិភពលោកទេ តែលោកអាចទទួលឯកត្តកម្ម ថាជាបុរសខ្លាំងរ៉ូស្ស៊ី ដែលមានអំណាចយូរជាងគេ។ លោក ពូទីន នឹងចេញពីតំណែងជាប្រធានាធិបតី នៃសហព័ន្ធរ៉ូស្ស៊ី ហើយអាចមកធ្វើជានាយករដ្ឋមន្ត្រី ជាថ្មីឡើងវិញ ដូចដែលលោកបានធ្វើរួចហើយ កាលពីឆ្នាំ២០០៨។

ខាងលើនេះ ជាការបង្ហើបឲ្យដឹងរបស់លោក វ្លាឌីមៀរ ពូទីន កាលពីចុងសប្ដាហ៍នេះ នៅក្នុងវេទិកាសេដ្ឋកិច្ច ក្រុងស៊ាំងភេធើស្បួរ (Saint-Pétersbourg - ភាគខាងលិចរ៉ូស្ស៊ី) តបនឹងសំនួរបស់អ្នកកាសែត ដែលចង់ដឹងថា តើលោកនឹងពិតជាចាកចេញ ពីតំណែងជាប្រធានាធិបតី នៅឆ្នាំ២០២៤ ចុងអាណត្តិនេះ ឬយ៉ាងណា។

បុរសខ្លាំងរ៉ូស្ស៊ី បានថ្លែងឡើងថា៖ «ខ្ញុំតែងតែគោរព និងនៅតែគោរពរដ្ឋធម្មនុញ្ញ របស់ប្រទេសរ៉ូស្ស៊ី។ នៅក្នុងរដ្ឋធម្មនុញ្ញ បានចែងយ៉ាងច្បាស់ថា មិនអាចកាន់តំណែង លើសពី២អាណត្តិជាប់គ្នាបានទេ។ នៅថ្ងៃនេះ ខ្ញុំកំពុងកាន់តំណែង ក្នុងអាណត្តិទីពីររបស់ខ្ញុំ។»។

លោកបានយកឧទាហរណ៍ ក្នុងឆ្នាំ២០០៨មកបញ្ជាក់ថា កាលនោះលោកបានចាកចេញ ពីតំណែងជាប្រធានាធិបតី ដើម្បីក្លាយជានាយករដ្ឋមន្ត្រី មុននឹងក្លាយជាប្រធានាធិបតីឡើងវិញ នៅ៤ឆ្នាំក្រោយមក។

នៅចំពោះសំនួរបស់អ្នកកាសែត ដែលបន្តសួរ​ពីអនាគតរបស់លោក ក្នុងឆ្នាំ២០២៤ ថាលោកអាចក្លាយជានាយករដ្ឋមន្ត្រីជាថ្មី ដូចឆ្នាំ២០០៨ឬទេ? លោក ពូទីន បានឆ្លើយថា៖ «ខ្ញុំបានចេញពីតំណែងជាប្រធានាធិបតី ព្រោះរដ្ឋធម្មនុញ្ញមិនអនុញ្ញត ឲ្យឈរឈ្មោះជាលើកទី៣។ ចម្លើយខ្ញុំ មានតែប៉ុណ្ណឹងទេ ហើយខ្ញុំក៏ត្រៀមខ្លួនរួចជាស្រេចដែរ ថានឹងគោរពគោលការណ៍នេះ នៅថ្ងៃខាងមុខ។»។

លោក វ្លាឌីមៀរ ពូទីន ដែលមានអតីតភាព ជាភ្នាក់ងារ​គិញ​សម្ងាត់រ៉ូស្ស៊ី (KGB) បានក្លាយជាប្រធានាធិបតី នៅឆ្នាំ២០០០ និងបានកាន់តំណែងនេះ អស់រយៈពេល២អាណត្តិ រហូតដល់ឆ្នាំ២០០៨។ មកដល់ឆ្នាំនោះ លោកបានផ្អាកការឈរឈ្មោះ ដោយទុកឲ្យមនុស្សជំនិតរបស់លោក គឺលោក ឌីមីទ្រី ម៉េវើដេវ (Dmitri Medvedev) ឡើងធ្វើជាប្រធានាធិបតីម្ដង ខណៈរូបលោក ចុះមកធ្វើជានាយករដ្ឋមន្ត្រីវិញ។ បន្ទាប់មក​នៅឆ្នាំ២០១២ លោក ពូទីន បានត្រឡប់មកធ្វើជាប្រធានាធិបតីជាថ្មីឡើងវិញ ហើយទើបនឹងបានបន្ត​មួយអាណត្តិទៀត​ នៅក្រោយការបោះឆ្នោត ក្នុងខែមីនា ឆ្នាំ២០១៨កន្លងទៅ។

ក្នុងឆ្នាំ២០២៤ ដែលជាឆ្នាំចុងបញ្ចប់ នៃអាណត្តិប្រធានាធិបតី លោក វ្លាឌីមៀរ ពូទីន នឹងមានអាយុ ៧១ឆ្នាំ។ កាលពីខែមីនាមុន លោកបានឆ្លើយទៅនឹងសំនួរអ្នកកាសែត ជុំវិញលទ្ធភាពបន្តអាណត្តិរហូតដល់ឆ្នាំ ២០៣០ ដូច្នេះថា៖ «អ្នកឯងត្រូវសើចសប្បាយហើយ! តើឲ្យខ្ញុំត្រូវធ្វើដូម្ដេច? នៅអញ្ចឹង​រហូតដល់ អាយុ១០០ឆ្នាំឬ? មិនអញ្ចឹងទេ។»៕