ភ្នាក់ងារនគរបាល ត្រូវបានបញ្ជូនភ្លាមៗ ទាំងកណ្ដាលរាត្រី ទៅកាន់ចំណតរថយន្ដមួយ ក្នុងក្រុង «Schaffhouse (ស្ថិតនៅភាគខាងជើង នៃប្រទេសស្វីស)» បន្ទាប់ពីទទួលដំណឹង ពីអ្នកដំណើរនៅក្បែរនោះ ដែល​បាន​ប្រទះឃើញ​ទារកម្នាក់អាយុ២ខួប នៅក្នុងរថយន្ដតែម្នាក់ឯង ហើយបានរាយការណ៍ករណីនេះ ទៅ​កាន់​អាជ្ញាធរ។ បន្ទាប់មក នគរបាលបានដឹងថា ម្ដាយរបស់ទារករូបនោះ បានទុកកូនខ្លួនចោល ដើម្បីខ្លួន​ចេញ​ទៅ​រាំ​សប្បាយ។

នគរបាលបាននិយាយថា ហេតុការណ៍នេះ បានកើតឡើងកាលពីរំលងអាធ្រាត​យប់ថ្ងៃសៅរ៍ ចូលមក​ថ្ងៃ​អាទិត្យ​ចុងសប្ដាហ៍មុន។

ភ្នាក់ងារ​នគរបាល ដែលបានទៅដល់កន្លែងកើតហេតុ មិនបានហៅអ្នកបច្ចេកទេស ដើម្បីគាស់ទ្វា ឬកញ្ចក់​រថយន្ដ ក្នុងការជួយរំដោះទារក ចេញមកក្រៅទេ ដោយហេតុថា ស្ត្រីជាម្ដាយបានត្រឡប់មកវិញ នៅប៉ុន្មាន​នាទី ក្រោយមក។ ស្ត្រីជាម្ដាយអាយុ២៥ឆ្នាំរូបនេះ បានសារភាពថា នាងបានចេញទៅរាំកំសាន្ត ក្នុងរង្គសាល​មួយ​ក្បែរ​នោះ និងពិតជាបានទុកកូនរបស់នាង នៅក្នុងរថយន្ដនេះ តែម្នាក់ឯងមែន។

នៅអ៊ឺរ៉ុបខាងលិខ ឪពុកម្ដាយដែលខ្ជីខ្ជារ ក្នុងការថែរក្សាកូន រាប់តាំងពីការទុកកូនចោល គ្មានមនុស្ស​ធំ​នៅ​ក្បែរ​ដូច្នេះ នឹងត្រូវមានទោស។ ក្នុងករណីខ្លះ ឪពុកម្ដាយ​ថែមទាំងត្រូវបានតុលាការផ្ដន្ទាទោស ដាក់ពន្ធនាគារ និង​ដក​សិទ្ធិលែងឲ្យថែរក្សា និងចិញ្ចឹមកូនខ្លួនឯង​ នោះរហូតថែមទៀត។

ប៉ុន្តែរឿងរ៉ាវខាងលើ នៅមិនបានបញ្ចប់ទៅ ត្រឹមតែស្ត្រីជាម្ដាយវ័យក្មេង ទៅរាំដោយ​ទុកកូន​ខ្លួន​ចោល​ដូច្នេះ​ទេ។ អ្នកដំណើរម្នាក់ ដែលបានឃើញទារក នៅក្នុងរថយន្ដតែម្នាក់ឯងនោះ ក៏កំពុងរងបណ្ដឹង​ពី​ការ​រំលោភ​សិទ្ធិ និង​បង្ក​ការ​ខូចខាត ទៅលើទ្រព្យសម្បត្តិឯកជននោះដែរ។ នៅមុននគរបាលមកដល់ អ្នកដំណើររូបនោះ បាន​សម្ដែង​ការ​ខឹងសម្បារ (ព្រោះឃើញកូនតូច ត្រូវបានទុកចោលតែឯង) ដោយបានវាយតប់ ទៅលើរថយន្ដ​ចត​ចោល​នោះ៕