ប្រទេសកូរ៉េខាងត្បូង បានព្រមានកាលពីដើមសប្ដាហ៍នេះ ពីហេតុការណ៍ដែលអាចកើតឡើង នៅក្នុងរបប​កុម្មុយនីស​កូរ៉េខាងជើង ទាក់ទងនឹងការប្រហារជីវិត «ជនក្បត់បក្ស» ជាច្រើននាក់ ដើម្បីជាចម្លើយតប ទៅ​នឹង​ការ​ផ្ដាច់​ខ្លួន របស់​អ្នក​ទទួលខុសត្រូវច្រើននាក់​ របស់របបក្រុងព្យុងយ៉ាង ចូលមកក្នុងប្រទេសកូរ៉េខាងត្បូង។

ទន្ទឹមនឹងនេះ ក្រសួងបង្រួបបង្រួមកូរ៉េ របស់រដ្ឋាភិបាលក្រុងសេអ៊ូល ក៏បានរំពឹងដែរថា របបកុម្មុយនីសនឹង​បញ្ចេញ​​​នូវ​​ការបង្ករឿង​ជាច្រើនទៀត នៅមុន និងក្នុងអំឡុងពេលធ្វើសមយុទ្ធរួមគ្នា រវាងប្រទេសកូរ៉េខាងត្បូង និង​សហរដ្ឋ​អាមេរិក។

មន្ត្រីជាន់ខ្ពស់មួយរូប របស់ក្រសួងបង្រួបបង្រួមកូរ៉េ បានថ្លែងប្រាប់អ្នកយកព័ត៌មាន ក្រោមលក្ខខណ្ឌ​មិន​បញ្ចេញ​ឈ្មោះ​ថា ការផ្ដាច់ខ្លួន​កាលពីសប្ដាហ៍មុន របស់ឯកអគ្គរដ្ឋទូតរង របស់ប្រទេសកូរ៉េខាងជើង ប្រចាំនៅប្រទេស​អង់គ្លេស លោក «Thae Yong-Ho» បានដាក់របបក្រុងព្យុងយ៉ាង ឲ្យស្ថិតក្នុង«ស្ថានភាពមួយដ៏ពិបាក»។

មន្ត្រីរូបនោះបានថ្លែងឡើងថា៖ «តាមអត្តចរិត របស់ប្រមុខដឹកនាំ គីម ជុង-អ៊ុន (Kim Jong-Un) ស្ថានភាពនេះ​មាន​​គ្រោះថ្នាក់​សម្បើមណាស់។ ហើយវាចាំបាច់ត្រូវកូរ៉េខាងជើង ​ធ្វើសកម្មភាពអ្វីមួយ ដើម្បីរារាំងការ​ផ្ដាច់​ខ្លួន​ផ្សេង​​ទៀត និងដើម្បីបញ្ជៀសភាពរញ្ជួយ នៅក្នុងស្រទាប់ប្រជាជនកូរ៉េខាងជើង។»

លោកបានថ្លែងទៀតថា សកម្មភាពនោះរាប់បញ្ចូល ទាំងការព្យយាមតាមប្រហារជីវិត ឬបង្កើតអំពើភេរវកម្ម ប្រឆាំង​​នឹង​«ជនក្បត់បក្ស»ទាំងឡាយ ដែលកំពុងរស់នៅ ក្នុងប្រទេសកូរ៉េខាងត្បូង។ បើមិនអញ្ចឹងទេ អាច​នឹង​មាន​ការ​ចាប់​ពង្រត់ នូវមនុស្សសំខាន់ៗរបស់កូរ៉េខាងត្បូង ចេញទៅយ៉ាងស្ងាត់កំបាំង។ មន្ត្រីដដែល​បាន​រំលឹក​ថា ហេតុ​ការណ៍នេះ ធ្លាប់កើតមានរួចហើយ ទាក់ទងនឹងលោក «Hwang Jang-Yop» អតីតប្រធានសភា​ប្រជាជន​កូរ៉េ​ខាង​ជើង និងមេមនោគមវិជ្ជា របស់លោក គីម ជុង-អ៊ីល (Kim Jong-Il ឪពុករបស់មេដឹកនាំកុម្មុយនីស​សព្វ​ថ្ងៃ) ដែល​​ត្រូវ​​បាន​​លួច​សម្លាប់ បន្ទាប់ពីលោកបានផ្ដាច់ខ្លួន ភៀសខ្លួន​ចូលមកប្រទេសកូរ៉េ​ខាងត្បូង នៅឆ្នាំ​១៩៩៧។

ស្ថានភាពដ៏ពិបាក សម្រាប់របបកុម្មុយនីស...

ការផ្ដាច់ខ្លួនពីរបបកូរ៉េខាងជើង បានកើតមានជាហូរហែ។ កាលពីសប្ដាហ៍មុន កូរ៉េខាងត្បូង​ទើប​បាន​ប្រកាស​ដោះលែង បណ្ដាជនកូរ៉េខាងជើងជាងដប់នាក់ ដែលបានបម្រើការ នៅក្នុងភោជននីយដ្ឋានមួយ គ្រប់​គ្រង​ដោយ​របប​ក្រុង​ព្យុងយ៉ាង និងមានទីតាំងនៅក្នុងប្រទេសចិន។ បណ្ដាជនជាបុគ្គលិក និងអ្នកចាត់ការទូទៅ នៅក្នុង​ភោជនីយដ្ឋាន​កូរ៉េ​ខាង​ជើង​នោះ ត្រូវបានឃាត់ខ្លួន នៅពេលចូលមកដល់ទឹកដីកូរ៉េខាងត្បូង តែត្រូវ​បាន​ដោះ​លែង​ឲ្យ​មាន​សេរីភាព និងព្រលែងឲ្យ​រស់នៅចិញ្ចឹមជីវិត ដូចជនជាតិកូរ៉េធម្មតា។

ប៉ុន្តែការប្រកាសខាងលើនេះ ត្រូវបានរបបកូរ៉េខាងជើងបដិសេធ និងបានពន្យល់ថា ករណីរបស់បណ្ដា​ជន​កូរ៉េ​ខាង​ជើង ទាំងប៉ុន្មាននាក់នោះ មិនមែនជាការផ្ដាច់ខ្លួនទេ តែជាការចាប់ពង្រត់ដោយស្ថាត់ៗ ធ្វើឡើង​ដោយ​ភ្នាក់ងារ​​ចារកម្ម​​កូរ៉េ​ខាង​ត្បូង។

អ្នកជំនាញជាច្រើននាក់ បានគិតថាប្រទេសបងប្អូនកូរ៉េទាំងពីរ កំពុងស្ថិតក្នុងភាពតានតឹង ដ៏ខ្លាំងបំផុត មិន​ដែល​ធ្លាប់​មាន តាំងពីសង្គ្រាមកូរ៉េ (ពីឆ្នាំ១៩៥០ មកឆ្នាំ១៩៥៣) ជាពិសេសបន្ទាប់ពីកូរ៉េខាងជើង បានសាកល្បង​គ្រាប់​បែក​នុយក្លេអ៊ែរ កាលពីខែមករានោះមក។ ស្ថានភាពទុំជោរនេះ អាចនឹងប្រេះធ្លាយ នៅពេលដែល​ប្រទេស​កូរ៉េ​ខាង​ត្បូង និងសហរដ្ឋអាមេរិក ត្រៀមធ្វើសមយុទ្ធរួមគ្នា ជាថ្មីទៀត។

តាមរយៈ​ទីភ្នាក់ងារ​ព័ត៌មានផ្លូវការ «KCNA» របស់ខ្លួន ប្រទេសកុម្មុយនីសបានប្រកាសថា៖ «យើងនឹងវាយ​ប្រហារ ដោយមិនអាសូរ និងដោយប្រើអាវុធ​នុយក្លេអ៊ែររបស់យើង ប្រឆាំងការគម្រាមដល់បូរណភាពទឹកដី និង​ប្រឆាំង​ការ​បង្ក​រឿង​ទាំងឡាយ នៃក្រុមបច្ចាមិត្រ»៕