សំ ប៉ូលីដា សុំ ប៊ុន រ៉ានី ឲ្យ​ជួយ​ដោះស្រាយ​រឿង​«ប្ដីវាយ»

តារាកំប្លែង និងជាតារាចម្រៀង សំ ប៉ូលីដា បានថ្លែងស្នើទៅភរិយាលោក ហ៊ុន សែន គឺអ្នកស្រី ប៊ុន រ៉ានី ឲ្យ​ជួយ​ធ្វើ​អន្តរាគមន៍​​ពី​រឿង​រ៉ាវ ​របស់​ខ្លួន ដែលអ្នកនាង​បាន​សារភាព​​នៅ​ក្នុងវីដេអូថ្មីមួយ ថាបានរងគ្រោះព្រោះការវាយ​តប់ សឹង​​«មួយ​​លាន​​ដង» ពី​​សំណាក់​​ស្វាមី លោក ស្វាយ ស៊ីសុថា ដែលមានថានៈពាក់ស័ក្ដិ៤ ក្នុងកងរាជអាវុធ​ហត្ថ។
សំ ប៉ូលីដា សុំ ប៊ុន រ៉ានី ឲ្យ​ជួយ​ដោះស្រាយ​រឿង​«ប្ដីវាយ»
ពីឆ្វេងទៅស្ដាំ៖ អ្នកនាង សំ ប៉ូលីដា នៅពេលនាងចូលរោងការ និងពេលអ្នក​នាងរងគ្រោះ នៅថ្ងៃនេះ។ (រូបថតលើបណ្ដាញសង្គម)
Loading...
  • ដោយ: ដារី អត្ថបទ៖ ដាវី ([email protected]) - ភ្នំពេញ ថ្ងៃទី១៣ សីហា ២០១៦
  • កែប្រែចុងក្រោយ: August 13, 2016
  • ប្រធានបទ: តារា
  • អត្ថបទ: មានបញ្ហា?
  • មតិ-យោបល់

ក្នុង‌រយៈពេល‌ មិនដល់២៤ម៉ោងផង តែ‌«ការពិត»​ដែលមានប្រភព ពីអ្នកនាង សំ ប៉ូលីដា បានកើតឡើង​ដល់ទៅ២ ផ្សេង​គ្នា។ ប៉ុន្តែ​«ការ​ពិត»​ចុង​ក្រោយ ដែលបង្កភាពវិលវល់មិនតិចដល់​សាធារណជន​នេះ បានបញ្ជាក់ដោយ​ខ្លួន​អ្នក​នាង​​ថា អ្នក​នាង​ពិត​​ជា​រង​ការវាយ​ធ្វើបាប ពីសំណាក់ស្វាមីពាក់ស័ក្ដិ៤របស់ខ្លួន សឹងមិនលួសពេលឡើយ ជា​ពិសេស​​ការ​​វាយ​តប់ លើក​ចុង​ក្រោយបង្អស់ នៅថ្ងៃទី៣ ខែសីហាកន្លងមក។

នៅក្នុងឃ្លីបវីដេអូមួយ ដែលត្រូវបានយកមកបង្ហោះ នៅលើបណ្ដាញសង្គម នៅប៉ុន្មានប៉ុន្មានម៉ោងមុននេះ តារា​កំប្លែងស្រីសំដីបាន អ្នកនាង សំ ប៉ូលីដា បានសារភាពសារពីអំពើហិង្សា និងបានធ្វើការ​អំពាវ​នាវ ទៅ​អ្នក​ស្រី ប៊ុន រ៉ានី ភរិយានាយករដ្ឋមន្ត្រី ឲ្យជួយខ្លួនទាក់ទងនឹងទង្វើហិង្សា វាយតប់លើអ្នកនាង សឹង​មិន​​លួស​​ពេល ប្រព្រឹត្តិ​​ដោយ​ស្វាមី​អ្នកនាង គឺលោក ស្វាយ ស៊ីសុថា ដែលជាមន្ត្រីរាជអាវុធហត្ថ ពាក់​ស័ក្ដិ​៤។ អ្នកនាងបាន​ថ្លែង​​ឡើង​​ថា៖ «ខ្ញុំសូមឲ្យឮដល់លោកជំទាវ ប៊ុន រ៉ានី ហ៊ុន សែន ដែលគាត់បានចងដៃខ្ញុំ ៥០០០​ដុល្លារ ពេល​ខ្ញុំ​ការ។ អញ្ចឹង​សូម​ឲ្យ​គាត់ ជួយដោះស្រាយឲ្យខ្ញុំ ដែលមន្ត្រីរាជការបែបនេះ ស័ក្ដិដល់​ទៅ​បួន មក​ធ្វើ​បាប​ខ្ញុំ​​ជា​​សិល្បៈករ​​​ម្នាក់។ អញ្ចឹង​ថា ត្រូវធ្វើយ៉ាងម៉េច?»

វីដេអូនេះ ទំនងជាត្រូវបានថត នៅមួយថ្ងៃក្រោយ​ពេលកើតហេតុភ្លាមៗ។ បើទោះជានៅក្នុងវីដេអូ មិនបាន​បញ្ជាក់​ថា ជាទង្វើរបស់ស្វាមីអ្នកនាងនោះទេ តែស្លាកស្នាមជាក់ស្ដែង មានដូចជារបួសបាក់ជើង រយះ​ខ្ទង់​ច្រមុះ និង​ជាំ​មួយចំហៀងមុខ វាពិបាកធ្វើឲ្យគេជឿថា ជាស្លាកស្នាមដែលអ្នកនាងជួបគ្រោះថ្នាក់ ត្រឹមតែដួល​ធម្មតា ឬ​ដោយ​សារពាក់ស្បែកជើងកែង ហើយរអិលបុកនឹងជ្រុងទូទឹកកក។ ការរងគ្រោះដួលរអិលជើង ដែល​ជា​ការ​អះអាង​របស់​អ្នកនាង សំ ប៉ូលីដា នៅក្នុង«ការពិត»មួយទៀត។

យ៉ាងណា នៅក្នុងវីដេអូ«ការពិត»ថ្មីមួយនេះ អ្នកនាងបាននិយាយថា លោក ស្វាយ ស៊ីសុថា ហៅ ខ្យា គឺជា​ជន​ញៀន​ល្បែង ជាបុគ្គលខ្មោចចេញខ្មោចចូល ដោយតែងប្រើប្រាស់​អំពើហិង្សា​គ្រប់ពេលមិនថា អ្នកនាង​សរសៃ​ខ្ចី​នោះ​ឡើយ។ អ្នកនាងបានបន្តទៀតថា សកម្មភាពវាយតប់នេះ គឺវាយតាំងពីអ្នកនាង​កើតកូនបាន២ថ្ងៃ និង​​ជា​​ពិសេស នៅ​ពេល​ដែល​លោក ស៊ីសុថា មានស្រី និងចាញ់អាប៉ោង។ តារាកំប្លែងបាននិយាយថា ក្រោយ​ពេល​មាន​ការ​ប្ដឹង​​ប៉ូលិស​​ម្ដងៗ គឺ​ប៉ូលិសព្រែកឫស្សី ហាក់មិនបានអើពើនោះផងទេ។

» វីដេអូ«ការពិត»ថ្មី ដែលត្រូវបានយកមកបង្ហោះ នៅតាមបណ្ដាញសង្គម៖

ដំណឹងចុងក្រោយ ដែលទើបនឹងត្រូវបានបង្ហោះ នៅលើទំព័រហ្វេសប៊ុក​ផ្លូវការ របស់អ្នកស្រី ប៊ុន រ៉ានី បាន​ឲ្យ​​ដឹង​ថា អ្នកស្រីភរិយាលោក ហ៊ុន សែន រូបនេះ បានចាត់ឲ្យក្រុមការងារ ចុះទៅសួរសុខទុក្ខ និងប្រគល់​ថវិកា​​មួយ​ចំនួន ដល់អ្នកនាង សំ ប៉ូលីដា ដែលបានរងគ្រោះថ្នាក់បាក់ជើង និងរងរបួសលើផ្ទៃមុខយ៉ាងធ្ងន់ធ្ងរ កាល​ពី​ព្រឹក​ថ្ងៃទី១៣ ខែ​សីហា ឆ្នាំ២០១៦នេះ។ សំណេរនោះ មិនបានបញ្ជាក់ឲ្យដឹង ពីទឹកប្រាក់ថាមានចំនួន​ប៉ុន្មាន​ទេ តែ​បើ​តាម​សារព័ត៌មាន​ក្នុងស្រុក បានឲ្យដឹងថា មានប្រមាណជា៥លានរៀល៕

» រូបថត នៅមុនអ្នកនាង សំ ប៉ូលីដា ចូលរោងការជាមួយលោក ស្វាយ ស៊ីសុថា៖

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...