ISIS ត្រៀម​ភេរវកម្ម​ថ្មី ខ្លាំង​ជាង​ភេរវកម្ម​១១កញ្ញា៖ ប៉ារីស​នឹង​រលំ

វីដេអូចំនួនពីរ របស់ក្រុមរដ្ឋអ៊ីស្លាម ដែលទើបនឹងផ្សាយ នៅក្នុងថ្ងៃទី២៣ ខែវិច្ឆិកានេះ បានឲ្យដឹង ពី​គម្រោង​ធ្វើ​ភេរវកម្ម ដ៏​មាន​ទំហំ​ដ៏ធំ​មួយ នៅថ្ងៃខាងមុខ ប្រឆាំងប្រទេសបារាំង។ គម្រោងនោះ នឹងមានទំហំដ៏សម្បើម ខ្លាំងជាង​ភេរវកម្ម ថ្ងៃ​ទី១១ ខែ​កញ្ញា ឆ្នាំ​២០០១ ដែលធ្វើទៅលើអាគារភ្លោះ ក្នុងទីក្រុងញ៉ូយក សហរដ្ឋអាមេរិក​ទៅទៀត។
Loading...
  • ដោយ: សេក មនោរកុមារ អត្ថបទ និងយកការណ៍៖ សេក កុមារ ([email protected]) - បារីស ថ្ងៃទី២៣ វិច្ឆិកា ២០១៥
  • កែប្រែចុងក្រោយ: November 23, 2015
  • ប្រធានបទ: ភេរវកម្ម
  • អត្ថបទ: មានបញ្ហា?
  • មតិ-យោបល់

«ប៉ារីស នឹងរលំ» នេះជាអ្វីដែលគេបានឃើញ នៅក្នុងវីដេអូចំនួនពីរ របស់ក្រុមរដ្ឋអ៊ីស្លាម (ពាក្យអារ៉ាប់ហៅ Daech ពាក្យកាត់​បារាំង​ហៅ EI ពាក្យកាត់អង់គ្លេសហៅ ISIS) ដែលទើបនឹងបញ្ចេញមកផ្សាយ  នៅក្នុងថ្ងៃ​សៅរ៍មុន និងមកដល់ដៃប្រព័ន្ធផ្សព្វផ្សាយ នៅថ្ងៃទី២៣ ខែវិច្ឆិកានេះ បង្កការព្រួយបារម្ភជាថ្មីទៀត ដល់​បណ្ដា​ប្រទេសនៅលោកខាងលិច។ នៅក្នុងវីដេអូទាំងពីរនោះ យុជនពីរនាក់របស់ក្រុមរដ្ឋអ៊ីស្លាម បានអះអាងថា ក្រុម​ខ្លួននឹងត្រៀមការវាយប្រហារ ភេរវកម្មដ៏ខ្លាំងមួយ មានទំហំធំជាងភេរវកម្ម ទៅលើអាគារភ្លោះ ក្នុង​ក្រុង​ញ៉ូយក (សហរដ្ឋអាមេរិក) កាលពីថ្ងៃទី១១ ខែកញ្ញា ឆ្នាំ២០០១នោះទៅទៀត។

យុទ្ធជនទាំងពីរនោះ បានពន្យល់ជាភាសាបារាំង ដង្ហោយទៅអ្នកកាន់សាសនាអ៊ីស្លាមទាំងអស់ នៅក្នុង​ពិភពលោក ឲ្យងើបឡើងដឹកនាំប្រតិបត្តិការភេរវកម្ន ដែលមានលក្ខណៈប្រហាក់ប្រហែល ទៅនឹងភេរវកម្ម​ជា​ច្រើនកន្លែង កណ្ដាលរដ្ឋធានីប៉ារីស (ប្រទេសបារាំង) កាលពីថ្ងៃទី១៣ ខែវិច្ឆិកា កន្លងទៅ និងដែលបានធ្វើឲ្យ​ប្រទេស​ជាច្រើន នៅអ៊ឺរ៉ុបខាងលិច​«តក់ស្លុត»មិនតិចឡើយ។

យុទ្ធជនម្នាក់ បិទមុខ តែមានឯកសណ្ឋានជាទាហាន នៅក្នុងវីដេអូទីមួយ បានថ្លែងព្រមានឡើងថា៖ «មាន​ពាក្យ​មួយម៉ាត់ សម្រាប់អ្នកឯង, ហ្វ្រង់ស៊័រ ហូឡង់ (François Hollande - ប្រធានាធិបតីបារាំង)។ ទោះជា​ខ្លួន​អ្នក​ឯង​ផ្ទាល់ ក៏អ្នកឯងគ្មានសុវត្ថិភាព នៅក្នុងប្រទេសផ្ទាល់របស់អ្នកឯងដែរ។ យើងនឹងវាយប្រហារជាថ្មី ហើយ​មាន​រយៈពេលយូរ ដូចទង្វើរបស់ពួកអ្នកឯង ដែលបានវាយប្រហារយើង នៅក្នុងប្រទេសរបស់យើង។ យើង​នឹង​វាយ​ប្រហារ នៅក្នុងប្រទេសអ្នកឯង។ ហើយនេះ គ្រាន់តែជាការចាប់ផ្ដើមប៉ុណ្ណោះ។ អ្វីដែលកើត​ឡើង នឹង​មានទំហំធំ ខ្លាំងជាង និងជូរចត់ជាងនេះ។»

ខណៈយុវជនម្នាក់ទៀត ដែលនិយាយដោយបើកមុខ បានថ្លែងក្នុងវីដេអូទីមួយដដែល ដោយលក្ខណៈ​ព្រមាន​ដូចគ្នាថា៖ «អ្នកឯងត្រូវដឹងថា អ្នកឯងនឹងឃើញនូវអ្វីមួយ ដែលកើតឡើងអាក្រក់ជាង ថ្ងៃ១១កញ្ញា (ឆ្នាំ​២០០១) ទៅទៀត»។ ចំណែកវីដេអូទីពីរ ដែលដាក់ចំណងជើងថា «រួមគ្នាបំផ្ទុះប្រទេសបារាំង» ក៏បានបង្ហាញ​នូវសារព្រមានជាច្រើន ប្រហាក់ប្រហែលគ្នានេះដែរ។ អ្វីដែលគួរឲ្យកត់សម្គាល់នោះ នៅក្នុងវីដេអូទីមួយ គេ​បាន​ឃើញរូបភាពកាត់ត ពីការដួលរលំរបស់តួអេហ្វែល (Tour Eiffel) ដែលទំនងជាដកស្រង់ ពីភាពយន្ដ​ណា​មួយ៕


» វីដេអូទីមួយ ដែលព្រមានពីការធ្វើភេរវកម្ របស់ក្រុមរដ្ឋអ៊ីស្លាម៖


Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...