បទចម្រៀងនេះ ជាបទរបស់ផលិតកម្ម «Basba Media» ដែលបានបកស្រាយ តាមរយះសំនៀងលោក អ៊ាម វន្នី និងជាស្នាដៃនិពន្ធផ្ទាល់ របស់លោកផងដែរ។ តាមពិត បទនេះត្រូវបានដាក់បញ្ជូល ក្នុងគេហទំព័រ យូធូប តាំងពី២ខែមុនមកម្លេះ តែដោយសារផលិតកម្មនេះ មិនសូវមានអ្នកស្គាល់ ម្យ៉ាងទៀតអ្នកច្រៀងខ្លួនលោក ក៏មិនមានឈ្មោះបោះសំលេង នៅឡើយដែរ ទើបចម្រៀងមួយនេះ មិនសូវមានការចាប់អារម្មណ៍។

ប៉ុន្តែពេលនេះ អ្នកចម្រៀង អ៊ាង វន្នី ចាប់ផ្ដើមត្រូវបានគេស្គាល់ តាមរយះបទចម្រៀង «ខ្ញុំជាអ្នកខេត្ត​បាត់​ដំបង» ហើយរូបលោក ក៏ជាបេក្ខជនដែលប្រលង ក្នុងកម្មវីធី ខេមបូឌាន អាយឌល (Cambodian Idol) ដែល​មានអ្នកគាំទ្រយ៉ាងច្រើន ថាលោកច្រៀងពិរោះ ហើយមានសមត្ថភាពនិពន្ធបទចម្រៀង ដោយ​ខ្លួន​ឯង​ទៀត។

«គន្ធបុប្ផាមហាសន្តោស» បទចម្រៀងមនោសញ្ចេតនាដ៏កំសត់ និងច្រៀងដោយសំលេងពិរោះ រណ្តំចិត្ត ស្តាប់ហើយចង់ស្រក់ទឹកភ្នែកនេះ បានច្រៀងរៀបរាប់ថា មន្ទីរពេទ្យគន្ធបុប្ផា ជាទីរំពឹងដែលជួយ​ស្រោច​ស្រង់​ជិវិត របស់កុមារជាច្រើន ដែលមានជម្ងឺ និងបញ្ជាក់ពីទឹកចិត្ត ថ្លែងអំណរគុណយ៉ាងខ្លាំង ចំពោះមន្ទីរពេទ្យ​នេះ។ ជាចុងក្រោយ នៅពេលអនាគត សង្ឃឹមថាមន្ទីពេទ្យនេះ នឹងនៅតែស្ថិតស្ថេរ ដើម្បីជាក្តីសង្ឃឹមរបស់​កុមារ។

គួររំលឹកថា មន្ទីពេទ្យគន្ធបុប្ផា ដែលមានលោកវេជ្ជបណ្ឌិត បេអាត រិឆ្នឺរ ប្រធាននិងជាស្ថាបនិកនោះ ត្រូវ​បាន​បង្កើតឡើង តាំងពីឆ្នាំ១៩៩២។ រហូតមកដល់បច្ចុប្បន្ន មន្ទីពេទ្យខាងលើ មានបុគ្គលិកពេទ្យ​ប្រមាណ​២៥០០​នាក់ ដែលប្រចាំការរាល់ថ្ងៃ នៅក្នុងសេវាទទួលពិនិត្យព្យាបាលកុមារ ពីគ្រប់ទីកន្លែងទាំងអស់ក្នុងប្រទេស ដោយ​មិនគិតថវិកា៕

» ចង់ដឹងថា ពិរោះនិងមានន័យយ៉ាងណា សូមស្ដាប់ និងទស្សនាដូចខាងក្រោម៖