ដំណឹងមិនសូវជាល្អប៉ុន្មានទេ សម្រាប់ក្រុមអ្នកចូលចិត្តទស្សនាភាពយន្ដ កាប់ចាក់ ឬហក់លោត គួរឲ្យ​ស្រៀវ​ស្ញើបហើបគូថពីកៅអី។ នោះគឺដោយសារតែ ទស្សនិកជនដែលនិយម ទស្សនាភាពយន្ដលោតហក់ ចូលចិត្ត​យកគ្រឿងកំប៉ិចកំប៉ុក មក«ញ៉ាំលេង» ច្រើនជាងទស្សនិកជន ដែលនិយមប្រភេទភាពយន្ដដទៃទៀត។ នេះ​ជាអ្វីដែល អ្នកស្រាវជ្រាវអាមេរិកាំងមួយក្រុម បានរកឃើញ ហើយបានយកមកចុះផ្សាយ នៅក្នុងព្រឹត្តិប័ត្រ​វេជ្ជសាស្ត្រ JAMA Internal Medicine កាលពីប៉ុន្មានថ្ងៃមុន។

នៅសហរដ្ឋអាមេរិក ដែលមានពលរដ្ឋចំនួនជិតពាក់កណ្ដាល រងគ្រោះនឹងភាពធាត់ចុកខ្លាញ់ ឬមានទំងន់​ខុសខ្នាតនោះ ក្រុមអ្នកស្រាវជ្រាវបានដាក់សំនួរថា តើវាជាការពិតឬទេ ដែលប្រភេទនៃកម្មវិធីមួយ បញ្ចាំង​តាមកញ្ចក់ទូរទស្សន៍ ឬនៅលើផ្ទាំងសំពត់សរ មានឥទ្ធិពលទៅលើបែបផែន នៃការទទួលទានអាហារ​ប្រចាំ​ថ្ងៃ? នៅលើព្រឹត្តិប័ត្រនោះ ក្រុមអ្នកស្រាវជ្រាវបានរកឃើញចម្លើយ ដោយបានសរសេរថា៖ «យើងដឹងថា ទូរទស្សន៍ ឬរោងភាពយន្ដ បានជួយបន្ធូរអារម្មណ៍ ទៅដល់ទស្សនិកជន។ ប៉ុន្តែវាបានជួយបន្ធូរអារម្មណ៍ រហូត​ជំរុញ​ឲ្យ​មនុស្សទាំងនោះ ពេលខ្លះទទួលទានផ្ដេសផ្ដាស និងច្រើនជ្រុល ដោយមិនបានគិត។ ប៉ុន្តែ​យើង​​មិន​សូវ​បាន​ដឹង​ទេ ថាតើប្រភេទកម្មវិធី ឬប្រភេទភាពយន្ដអ្វីខ្លះ ដែលមានឥទ្ធិពលខ្លាំង ទៅលើបញ្ហា​ទាំង​នេះ?»

តាមបទពិសោធកន្លងមក អ្នកស្រាវស្រាវបានធ្វើការសិក្សា ទៅលើឥរិយាបទនៃក្រុមនិស្សិតអាយុ២០ឆ្នាំ ប្រមាណជាជាង១០០នាក់ ដោយចែកជាបីក្រុម៖ ក្រុមទីមួយ ទស្សនាកម្មវិធីសប្បាយ កិច្ចសម្ភាស ឬ​ភាពយន្ដ​​ស្នេហាយុវវ័យ។ ក្រុមទីពីរ ទស្សនាភាពយន្ដ The Island របស់សមិទ្ធិករល្បីឈ្មោះ ដែលជាប្រភេទ​ភាពយន្ដ​ហក់លោត មានសកម្មភាពខ្លាំងក្លា។ ហើយក្រុមទីបី ទស្សនាភាពយន្ដ The Island ដដែល គ្រាន់​តែ​គ្មាន​សម្លេង។ នៅពីមុខក្រុមទាំងបី ក្រុមអ្នកស្រាវជ្រាវបានដាក់នំ ស្កគ្រាប់ ឬស្កសូកូឡា ឬទំពាំងបាយ​ជូរ​ក្រៀម ...។

២០នាទីក្រោយមក ក្រុមទី២ ដែលទស្សនា The Island មានសម្លេងទទួលញ៉ាំលេង នូវគ្រឿងកំដរមាត់ ៩៨% ច្រើនជាងក្រុមទី១ ដែលទស្សនាកិច្ចសម្ភាស ឬកម្មវិធីសប្បាយ បើគិតជាកំដៅផលិតក្នុងខ្លួន មានការខុស​គ្នា​៦៥%។ រីឯក្រុមទី៣ ដែលទស្សនា The Island គ្មានសម្លេង ទទួលញ៉ាំលេង  នូវចំណីរកំដរមាត់លើស​ក្រុម​ទី១ ប្រមាណជា ៤៦% គិតជាកំដៅផលិតក្នុងខ្លួន។

ក្រុមអ្នកស្រាវជ្រាវបានសរសេរទៀតថា៖ «បើកម្មវិធី ឬប្រភេទភាពយន្ដណាមួយ ជួយបន្ធូរ​អារម្មណ៍​មនុស្ស​កាន់តែខ្លាំង មនុស្សនោះកាន់តែមិនខ្វល់ នឹងអ្វីដែលខ្លួនត្រូវទទួលទាន ចូលក្នុងខ្លួន»។ ជាពិសេសភាពយន្ដ​លោតហក់កាន់តែខ្លាំង វានឹងកាន់តែធ្វើឲ្យទស្សនិកជន ហើបគូថជាមួយកាន់តែរន្ថើន ហើយក៏បន្ថែមចង្វាក់​ឲ្យការទទួលទានរបស់ទស្សនិកជននោះ កាន់តែច្រើនដែរ៕