តើអ្នកបួស បុព្វជិក ឬអ្នកដែលប្រតិបត្តិតាមសាសនានានា ដូចជាសាសនាព្រះពុទ្ធជាដើមនេះ មានការទទួលទាន​អាហារប្រចាំថ្ងៃរបស់ពួកគេ តាមរបៀបណា? តើចំណីអាហាររបស់ពួកគេ មានលក្ខណៈបែបណា ហើយបានផ្ដល់​នូវអត្ថប្រយោជន៍បែបណា ទៅដល់សារពាង្គកាយនិងជីវិតរបស់ពួកគេ? អត្ថបទនេះនឹងបកស្រាយជូនប្រិយមិត្ត ឲ្យឃើញពីភាពងាយស្រួល និងអត្ថប្រយោជន៍ទាំង១០ ក្នុងការបរិភោគអាហារតាមបែបព្រះពុទ្ធសាសនា។

រាប់បាតដាក់អាហារ សម្រាប់អ្នកបួស។ (រូបថត MONOROOM.info/ D. KEO)

ជីវិតប្រចាំថ្ងៃ -ការបរិភោគអាហារគឺជារឿងសំខាន់ សម្រាប់ទ្រទ្រង់រូបរាងកាយ និងជីវិតឲ្យមានដំណើរការទៅ កាន់​តែល្អប្រសើរឡើង។ ប៉ុន្តែបើការទទួលទាននេះ មិនសមស្រប ឬខុសក្បួនខ្នាត វានឹងអាចផ្តល់មកវិញ នូវទុក្ខទោស​ទៅវិញ​ជាមិនខាន។ ទស្សនាវដ្តីមនោរម្យព័រអាំងហ្វូ សូមដកស្រង់ចំណុចសំខាន់ទាំងដប់ ដែលពុទ្ឋសាសនិក នៅ​ក្នុង​មជ្ឈមណ្ឌលហ្វឹកហាត់ តាំងសមាធិតាមបែបព្រះពុទ្ឋសាសនា (ដាណាកូសា) ក្នុងតំបន់ស្កុតឡេនក្នុងប្រទេស​អង់គ្លេស តែងប្រតិបត្តិ។

សូមបញ្ជាក់ថា បើលោកអ្នកអាចយកចំណុចពីរឬបី ពីក្នុងចំណោមចំណុចទាំងដប់នេះ មកអនុវត្តតាមនោះ លោក​អ្នកអាចនឹងទទួលបាន នូវលទ្ឋផលល្អសម្រាប់ជីវិតប្រចាំថ្ងៃជាមិនខាន។

១. ការបរិភោគអាហារបួស
ការបរិភោគបន្លែច្រើន ឬមិនបរិភោគសាច់សត្វសោះ បានជួយដល់សុខភាពល្អ និងមានភាពកក់ក្តៅ​ទោះបីស្ថិត​ក្នុង​អាកាសធាតុត្រជាក់ក៏ដោយ។ ជាពិសេស ការបរិភោគនេះ បានជួយដល់អ្នកកាន់​ព្រះពុទ្ឋសាសនាមាន​អារម្មណ៏​ថា ខ្លួនមានសន្តិភាព និងសេចក្តីសុខ ជៀសឆ្ងាយពីការបៀតបៀនជីវិតសត្វលោកផ្សេងៗទាំងពួង។

២. ការបរិភោគអាហារទៀតទាត់
ក្នុងវិន័យឪវាទរបស់ព្រះសង្ឃ បានប្រៀបប្រដៅឲ្យបរិភោគអាហារឲ្យទៀតពេល។ ម្យ៉ាងវិញទៀត ការតមមិន​បរិភោគ​អាហារពេលល្ងាច នឹងជួយសម្រួលដល់ចង្វាក់បេះដួង និងបរិភោគ អាហារបានច្រើននាពេលព្រឹកព្រលឹម។

៣. ការមិនបរិភោគអាហារសម្រន់
ក្រៅពីអាហារប្រចាំថ្ងៃ អាហារសំរន់ មិនត្រូវបានអនុញ្ញាតឲ្យបរិភោគឡើយ ក្រៅពីផ្លែឈើស្រស់ៗ និងការបរិភោគ ទឹកតែជាប្រចាំ។

៤. មិនត្រូវលួចលាក់អាហារ
ការបរិភោគអាហារត្រូវបានធ្វើឡើងជុំគ្នា និងមានការចែករំលែកគ្នាទៅវិញទៅមកដោយស្មោះត្រង់ គ្មានការ​លួច​យកទៅលក់ ឬលួចញុំាក្រោយខ្នងឡើយ។

៥. ការធ្វើបង្អែមសម្រាប់កម្មវិធីសំខាន់ៗ
ដោយសារនៅក្នុងបង្អែមប្រមូលផ្សំដោយផ្លែឈើចំរុះ ទើបធ្វើឲ្យបង្អែមមានរសជាតិឆ្ងាញ់ និងជំនួញដល់សុខភាព។ ក្នុងការធ្វើបង្អែមនេះដែរ ត្រូវកំរិតជាតិស្ករ និងសារជាតិផ្អែមឲ្យតិច ដើម្បីគ្រប់គ្រង់បរិមាណជាតិស្ករក្នុងរាងកាយ។ម្យ៉ាងទៀត បង្អែមជួយដល់អណ្តាត ក្នុងការផ្លាស់ប្តូរឱជារសថ្មីនៃបន្លែនិងផ្លែឈើ។

៦. ការចំអិនអាហារដោយខ្លួនឯង
ការចំអិនអាហារដោយខ្លួនឯង នឹងជួយដល់សុខភាពដើម្បីជៀសវាងពីសារជាតិអំបិល ប៊ីចេង និងភាព មិនស្អាត​ដទៃ​ទៀត។ ការចំអិនអាហារដោយខ្លួនឯងនេះ ក៏អាចធ្វើឲ្យអ្នកមានអារម្មណ៏ស្រស់ស្រាយ ព្រមទាំងដឹងពីបរិមាណ​អាហារដែលគួរចំអិន ប្រភេទអាហារគួរបរិភោគ ដើម្បីចម្រើនដល់សុខភាពកាន់តែប្រសើរឡើង។

៧. ការតាំងសមាធិមុនពេលបរិភោគអាហារ
មុនពេលបរិភោគអាហារ គួរតែធ្វើសមាធិ ដើម្បីឲ្យរាងកាយនិងចិត្តស្ងប់ ព្រមទាំងរំលាយអាហារបានស្រួល។ ការ​តាំងសមាធិ គួរធ្វើឡើងដោយដកដង្ហើមចេញចូលវែងៗ មួយៗ និងនឹកដល់គុណអាហារ ដែលយើងបានបរិភោគ។

៨. បរិភោគដោយស្ងៀមស្ងាត់
ការបរិភោគដោយគ្មានសម្លេងវិទ្យុ ទូរទស្សន៏ ឬមើលកាសែត នឹងធ្វើឲ្យការបរិភោគរបស់យើងបានកាន់ តែច្រើន​ឡើង។ ជាពិសេសការបរិភោគនាពេលព្រឹកព្រលឹម ព្រោះនេះជាពេលចាប់ផ្តើមថ្ងៃថ្មី ដែលធ្វើឲ្យជីវិតប្រព្រឹត្តិ​ទៅ​ដោយស្រស់បំព្រង នាពេលគ្មានការជជែកគ្នាច្រើន។ ការចែករំលែកអាហារទៅកាន់អ្នកដទៃ ដោយស្ងៀមស្ងាត់ ក៏ជាការអនុវត្តដ៏មានឥទ្ឋិពលមួយដែរ។

៩. ការបរិភោគបបរពេលព្រឹក
ការបរិភោគបបរជារៀងរាល់ព្រឹក នឹងជួយដល់រាងកាយច្រើន ក្នុងការបំពេញជាតិទឹកបន្ថែម នាពេលរាង​កាយ​មនុស្សភាគច្រើនត្រូវការវា ប៉ុន្តែពិបាកក្នុងការបរិភោគវាឲ្យបានច្រើននា ពេលព្រឹក ព្រលឹម ។លើសពីនេះទៀត បបរអាចលាយសារធាតុបំប៉នសរីរាង្គបានច្រើន។ចំណែកការបរិភោគអាហារពេលថ្ងៃត្រង់ និងពេលល្ងាច អាច​ប្រែប្រួលបាន។

១០. ការចូលរួមជួយធ្វើអាហារជាមួយអ្នកដទៃ
ការចូលរួមចំអិនអាហារជាមួយអ្នកផ្សេងៗទៀត នឹងធ្វើឲ្យជីវិតរបស់យើងកាន់តែមានភាពរស់រវើក មានចំណង​មិត្តភាពល្អ និងចេះសាមគ្គីធ្វើការងារជាក្រុម។ យើងនឹងមានអារម្មណ៏កាន់តែអស្ចារ្យឡើង នាពេលអ្នកបាន​បរិភោគអាហារ ធ្វើជាក្រុមនោះជាមួយមិត្ត ក្នុងក្រុមរបស់អ្នក។

----------------------------------------------
ដោយ៖ ក. សេងហុង - ភ្នំពេញ ថ្ងៃ៣០ ខែធ្នូ ឆ្នាំ ២០១៣
រក្សាសិទ្ឋដោយ៖ ទស្សនាវដ្តីមនោរម្យព័រអាំងហ្វូ