សហជីពសេរីកម្មករ បានដាក់ពាក្យបណ្តឹង ទៅនាយកដ្ឋានវិវាទការងារ ប្តឹងនាយកក្រុមហ៊ុនអ៊ឹមហ្វូន ពីបទមិន«គោរព​ច្បាប់ការងារ» ដោយបានព្យួរការងារបុគ្គលិកស្រ្តី ចំនួន៥០នាក់ ចាប់តាំងពីខែវិច្ឆិកា ឆ្នាំ២០១២ រហូតមកដល់បច្ចុប្បន្ន​នេះ ហើយសន្យាឲ្យបុគ្គលិកទាំងនោះ រងចាំដោយគ្មានកាលកំណត់ច្បាស់លាស់ និងមិនមានប្រាក់ខែ។

រូបគេហទំព័ររបស់ ប្រព័ន្ធទូរស័ព្ទចល័ត​​អ៊ឺមហ្វូន។

លោក ម៉ាន់ សេងហាក់ អគ្គហិរញ្ញិក សហជីបសេរីកម្មករ បញ្ជាក់ថា ការដាក់ពាក្យបណ្តឹងនេះ ដោយមានការពឹងពាក់ ពី​បុគ្គលិកក្រុមហ៊ុនទូរសព្ទ័ចល័តអ៊ឹមហ្វូន(Mfone) ចំនួន២៥នាក់ ។លោកបន្តថា ក្រុមហ៊ុនបានព្យួរការងារបុគ្គលិក រហូត​ដល់៥០នាក់ ដោយគ្មានពេលកំណត់ និងមិនមានការទទួលខុសត្រូវឡើយ។ អគ្គហិរញ្ញិករូបនេះបន្តថា តាមនីតិវិធី​របស់​ក្រសួងការងារ យ៉ាងយូរម្ភៃមួយថ្ងៃ ឬសែសិបប្រាំបីម៉ោង បើវិវាទនោះជាវិវាទរួម គេនឹងចុះធ្វើអន្តរាគម។ លោកថា ពាក្យ​បណ្តឹងដាក់ពីម្សិលម៉ិញ ឥឡូវពុំទាន់ទទួលបានព័ត៌មានអ្វីពីក្រសួងទេ។ លោករំពឹងថា ខាងក្រុមហ៊ុន នឹងមានដំណោះ​ស្រាយសមរម្យមួយជូនពួកបុគ្គលិក។ តែបើគ្មានដំណោះស្រាយណាមួយជាក់លាក់ ទាំងខាងក្រុមហ៊ុន ទាំងខាងក្រសួង​ការងារទេ នោះសហជីបសេរីកម្មករ នឹងដឹកនាំកម្មករទាំងអស់នេះ ធ្វើបាតុកម្មអហិង្សា នៅមុខក្រុមហ៊ុនទូរសព្ទ័ចល័ត អ៊ឹមហ្វូន (Mfone) តែម្តងដើម្បីទាមទារឲ្យមានការគោរពច្បាប់ និងសិទ្ធិការងាររបស់បុគ្គលិក ។

«ខ្លាចប៉ះពាល់ដល់ការប្រជុំអាស៊ាន» !

អ្នកស្រី ភុន កែវពិសិទ្ធិ តំណាងឲ្យកម្មករចំនួន៥០នាក់ ដែលត្រូវបានក្រុមហ៊ុនទូរសព្ទ័ចល័តអ៊ឹមហ្វូន ព្យួរ​ការងារពួក​គាត់​តាំងពីខែវិច្ឆិការ ឆ្នាំ២០១២ រហូតមកដល់បច្ចុប្បន្ននេះ ដោយពុំមានដំណោះស្រាយ ណាមួយពី​ក្រុមហ៊ុន​ឡើយ ដោយ​គ្រាន់​តែប្រាប់ថាឲ្យរង់ចាំតែប៉ុណ្ណោះ។ អ្នកស្រីបាននិយាយថា «ពួកខ្ញុំសុំជួបចចារជាមួយគាត់ ថាត្រួវមាន​ដំណោះស្រាយ​ជាមួយពួកខ្ញុំ ព្រោះគាត់ថាផ្អាកការងារពួកខ្ញុំមួយខែ ឬក្រោមមួយខែ។ ដល់ពេលមួយខែ ពួកខ្ញុំចូលជួបសួរព័ត៌មានពីគាត់ ដើម្បីផ្តល់ដំណោះស្រាយ គាត់គ្មានដំណោះស្រាយទេ ដោយឲ្យពួកខ្ញុំបន្តការរង់ចាំ។» អ្នកស្រីបន្តថា ខាងក្រុមហ៊ុន​ពេល​បញ្ឈប់នោះ មិនបានជូនដំណឹងដល់បុគ្គលិកជាមុននោះទេ គឺប្រាប់ថ្ងៃហ្នឹង ឲ្យឈប់ថ្ងៃហ្នឹងតែម្តង ដោយអះអាងថាថា «ខ្លាចប៉ះពាល់ដល់ការប្រជុំអាស៊ាន» ។

តំណាងរូបនេះបន្តថា ពួកគាត់ទាំងអស់គ្នា ធ្វើការផ្នែក «ផ្តល់ព័ត៌មានត្រឡប់ទៅភ្ញៀវវិញ» ដែលផ្នែកនេះបច្ចុប្បន្ន​នៅមាន​បុគ្គលិកប្រាំនាក់ធ្វើការជំនួស ហើយពួកគាត់នោះជាជំនួយការ ដែលមើលការខុសត្រូវរួមលើពួកគាត់។ អ្នកស្រីបាន​បញ្ជាក់ថា ម្សិលមិញខាងក្រុមហ៊ុនបានទាក់ទងមកលោកស្រី សុំជួបជាមួយអ្នកតំណាងពីរនាក់ ដើម្បីធ្វើការដោះស្រាយ តែមិនបានបញ្ជាក់ថាថ្ងៃណា និងពេលណាជាក់លាក់នោះទេ ។

លោក ជា សេងហុង នៃនាយកដ្ឋានវិវាទការងារ មិនអាចធ្វើការបកស្រាយលើពាក្យបណ្តឹងនោះបានទេ ដោយលោក​ជាប់​រវល់ ដោយលោកគ្រាន់តែបញ្ជាក់ថា «ពាក្យបណ្តឹងនោះ នាយកដ្ឋានបានទទួលហើយ កាលពីម្សិលម៉ិញ ហើយកំពុងចាត់​ការតាមនីតិវិធី»។

ឆ្លើយតប​នឹងការសាកសួរ​ របស់មនោរម្យព័ងអាំងហ្វូ អ្នកទទួលទូរស័ព្ធទំនាក់ទនង របស់ក្រុមហ៊ុនទូរសព្ទ័ចល័តអ៊ឹមហ្វូន បានបញ្ជាក់ថា ក្រុមហ៊ុនមិនធ្វើការបកស្រាយអ្វីទាំងអស់ ចំពោះករណីនៃ​ការ​បញ្ឈប់ បុគ្គលិកទាំងនោះទេ។

សួមបញ្ជាក់ថា កាលពីថ្ងៃទី៨ ខែមករា ឆ្នាំ២០១៣ សហជីពសេរីកម្មករ នៃព្រះរាជាណាចក្រកម្ពុជា ប្តឹងនាយកក្រុមហ៊ុន​អ៊ឹមហ្វូន ពីបទមិន«គោរពច្បាប់ការងារ»ចំពោះបុគ្គលិក ដោយអះអាងថាក្រុមហ៊ុនមានចេតនាចង់បញ្ឈប់​បុគ្គលិក​ទាំង​នោះ ដោយពុំផ្តល់ប្រាក់អត្ថប្រយោជន៍ផ្សេងៗ តាមច្បាប់ការងារឡើយ។ ក្រុមហ៊ុនទូរសព្ទ័ចល័តមួយនេះ ជា​កម្មសិទ្ធិ​របស់​លោក​ថាក់ស៊ីន ស៊ីណាវ៉ាត្រា (Thaksin Shinawatra)​ ​អតីត​នាយក​រដ្ឋមន្ត្រី​ថៃ​ ដែលត្រូវគេធ្វើរដ្ឋប្រហារ បណ្ដេញ​ចេញ​ពីអំណាច និងជា​មិត្តភ័ក្រ​ដ៏​ជិត​ស្និទ្ធ របស់​​នាយក​រដ្ឋមន្ត្រីខ្មែរលោក ​ហ៊ុន​ សែន​។

កាលពីពាក់កណ្តាលឆ្នាំ២០១២ ក្រុមហ៊ុន អ៊ែលតិក វ៉ាល័រ (Eltek Valere) របស់ប្រទេសន័រវ៉េស បានប្តឹងក្រុមហ៊ុន​អ៊ឹមហ្វូន​នេះ ទៅសាលាដំបូងរាជធានីភ្នំពេញ ឲ្យសង​ថ្លៃផ្គត់ផ្គង់សេវាកម្ម ដែលជំពាក់។ នេះបើតាម សារព័ត៌មាន ឌឹខេប៊ូឌៀដេលី (The Cambodia Daily) ដែលចេញផ្សាយ កាលពីថ្ងៃទី២៩ តុលា ឆ្នាំ២០១២។ ការសែតដដែលបន្ថែមថា សេចក្ដីសម្រេច​ដំបូងដែលបានចេញ នាចុងខែតុលាឆ្នាំ២០១២ បានបង្គាប់ឲ្យក្រុមហ៊ុនអ៊ឹមហ្វូន សងទៅក្រុមហ៊ុនអ៊ែលតិក នូវទឹកប្រាក់​ប្រមាណជា ៣,៧៣លានដុល្លា​អាមេរិក។ តែដោយសារតែក្រុមហ៊ុន មិនទាន់មានប្រាក់ក្នុងការសង សេចក្ដីសម្រេចនោះ បាន​ហាមក្រុមហ៊ុន ក្នុងការលក់ចេញនូវ សម្ភារៈផ្សេងៗរបស់ខ្លួន មុនការសងបំណុលខាងលើរួចរាល់៕

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី០៩ មករា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ