ទោះជាការផ្ទៀងផ្ទាត់ផែនទី និងបញ្ហាព្រំដែន កម្ពុជា-វៀតណាម ដូចជាត្រូវនាយករដ្ឋមន្រ្តីកម្ពុជា ប្រកាស​បញ្ចប់​ក៏ដោយ ប៉ុន្តែការឆ្លើយឆ្លងគ្នា រវាងមន្ត្រីរដ្ឋាភិបាល និងមន្ត្រីគណបក្សប្រឆាំង នៅបន្តមាន មិនទាន់ដាច់អាល័យ​នៅឡើយ។

ពាក់ព័ន្ធនឹងបញ្ហាព្រំដែននេះ លោក សម រង្ស៊ី ប្រធានគណបក្សសង្គ្រោះជាតិ បានបង្ហាញនូវជំហរផ្ទាល់ខ្លួន ប្រាំ​យ៉ាង ក្រោយការវិលត្រឡប់ ដោយស្ងៀមស្ថាត់មកកម្ពុជាវិញ កាលពីថ្ងៃទី១៣ ខែកញ្ញាម្សិលម៉ិញនេះនេះ។ ជំហរ​ទាំងប្រាំនោះរួមមាន៖ ទីមួយ មិនចោទប្រកាន់បុគ្គលណា ឬគណបក្សនយោបាយ។ ទីពីរ មិនឆ្លើយតប ទៅ​នឹងការចោទប្រកាន់ ពីបុគ្គលណា ឬគណបក្សនយោបាយណា។ ទីបី បង្ហាញការពិត ពីញ្ហាព្រំដែន និងបូរណ​ភាព​ទឹកដី នៃប្រទេសកម្ពុជា ដែលមិនមែនជាជម្លោះនយោបាយ រវាងខ្មែរនិងខ្មែរទេ តែជាជម្លោះទឹកដី រវាង​ប្រទេស​កម្ពុជា និងប្រទេសជិតខាង។ ទីបួន ខិតខំពង្រឹងឯកភាពជាតិ ដោយជៀសវាង កុំឲ្យខ្មែរចាញ់ល្បិច​បំបែក​បំបាក់ របស់បរទេសឈ្លានពាន ដែលញុះញង់ឲ្យខ្មែរឈ្លោះគ្នា ដើម្បីលេបត្របាក់ទឹកដីកម្ពុជា។ និងទីប្រាំ ខិតខំ​ស្វែងរកឯកសារ ជំនាញ និងគំនិតស្ថាបនា ដើម្បីជួយការពារ ទឹកដីប្រទេសកម្ពុជាបច្ចុប្បន្ន ឲ្យបាន​គង់​វង្ស។

ប៉ុន្តែជំហរទាំងប្រាំ របស់លោក សម រង្ស៊ី ត្រូវបានអ្នកនាំពាក្យទីស្ដីការគណៈរដ្ឋមន្ត្រី លោកផៃ ស៊ីផាន លើក​មក​ធ្វើការចំអក ដោយអះអាងថា ការលើកឡើង របស់ប្រធានគណបក្សសង្គ្រោះជាតិ គ្រាន់តែដើម្បីបោកប្រាស់ ប្រជាពលរដ្ឋប៉ុណ្ណោះ។ លោកបានបន្ថែមថា លោក សម រង្សី មិនដែលគោរពសំដី ឬកិច្ចសន្យារបស់ខ្លួនឡើយ បើ​សូម្បីតែកិច្ចព្រមព្រៀង បង្កើត«វប្បធម៌សន្ទរនា» ដែលលោក សម រង្សី ជាអ្នកចុះហត្ថលេខាដោយផ្ទាល់​នោះ ក៏លោក សម រង្សី ហ៊ានរំលោភបំពានដែរ។ លោកបានចោទជាសំនួរថា៖ «តើឲ្យគេជឿ សម រង្សី ដូចម្ដេច​ទៅ បើ​មាត់​និយាយផ្សេង ទង្វើធ្វើផ្សឹងនោះ?»

អ្នកនាំពាក្យបានធ្វើការ«ចំអក» ដោយហៅជំហរទាំងប្រាំ របស់លោក សម រង្ស៊ី ថាមាត់និយាយខុស ពីការគិត និងធ្វើ។ លោកបានលើកឡើងថា៖ «លោក សម រង្សី មិនដែលបង្ហាញការពិត ហើយមិនដែល ទទួលស្គាល់​ការពិតម្ដងណាទេ។ ទោះផែនទី យកមកពីអង្គការសហប្រជាជាតិ និង ប្រទេសបារាំងក៏ដោយ។ ម្យ៉ាងវិញទៀត សម រង្សី មិនដែលទៅតវ៉ា ឬឈ្លោះជាមួយយួនទេ ផ្ទុយមកវិញ សម រង្សី និង គណបក្សសង្គ្រោះជាតិ បាន​បង្ក​អរិភាព និងឈ្លោះតែជាមួយរាជរដ្ឋាភិបាល និងគណបក្សប្រជាជនកម្ពុជា ឥតឈប់ឈរតែប៉ុណ្ណោះ។ (...) អត់​មានបរទេសណា មកញុះញង់ទេ មានតែលោក សម រង្សី, កឹម សុខា និងបក្សសង្គ្រោះជាតិ នេះហើយ ដែល​ដើរ​ញុះញង់ប្រជាជនគ្រប់ពេល គ្រប់ទីកន្លែង ។ (...) ទៅរកឯកសារឯណាទៀត បើផែនទីពីអង្គការ​សហ​ប្រជាជាតិ និង ផែនទីពីប្រទេសបារាំង អាមេរិកាំង លោកសម រង្សី និង គណបក្សសង្គ្រោះជាតិ មិនទទួល​ស្គាល់​ផង​នោះ។ ផ្ទុយទៅវិញលោក សម រង្សី នៅបន្តបំភ័ន្ធប្រជាពលរដ្ឋ អំពីបញ្ហាផែនទី ដោយទិញផែនទីពីផ្សារ យក​មក​ធ្វើ​ជា​ឯកសារ​បំភ័ន្ត។»

លោក ផៃ ស៊ីផាន បានបរិហាប្រធានគណបក្សសង្គ្រោះជាតិទៀតថា៖ «លោក សម រង្សី គ្មានគំនិត​រិះគន់​ដើម្បី​ស្ថាបនាទេ ផ្ទុយមកវិញ មានតែដើរញុះញង់ប្រជាពលរដ្ឋ អោយមានការយល់ខុស មកលើរាជ​រដ្ឋាភិបាល​តែ​ប៉ុណ្ណោះ។»៕