ប្រធានាធិបតី បាឆារ អាល់-អាសាធ បានប្រកាសកាលពីថ្ងៃអាទិត្យទី៦ ខែមករានេះ ពីផែនកានយោបាយមួយ ដើម្បី​ដោះស្រាយជម្លោះដ៏រ៉ាំរ៉ៃ ដែលបានដាក់ប្រទេសស៊ីរី អោយធ្លាក់ចូល ទៅក្នុងសង្គ្រាមស៊ីវិលតាំងពី២១ឆ្នាំមកហើយ។ តែ​ជាដំណោះស្រាយ ដែលលោកអាល់-អាសាធ នៅតែមានអំណាចពេញដៃដដែល ហើយត្រូវបានបដិសេធភ្លាមៗ ដោយ​ពួកបះបោះ ដែលតម្រូវអោយលោកប្រធានាធិបតី ចុះចេញពីតំណែងជាមុនសិន។

លោកបាឆារ អាល់ អាសាធ ប្រធានាធិបតីនៃប្រទេសស៊ីរី ដែលក្រុមប្រឆាំង ចង់អោយចុះពីតំណែង។

នេះជាកាបង្ហាញខ្លួនមួយ បន្ទាប់ពីសម្ងំក្នុងភាពស្ងប់ស្ងៀមតាំងពីជាង៧ខែមកហើយ របស់លោកបាឆារ អាល់ អាសាធ (Bachar al-Assad) ប្រធានាធិបតីនៃប្រទេសស៊ីរី។ លោកបានធ្វើអោយគេមើលឃើញលោកថា ជាមនុស្សចេះផ្លាស់ប្ដូរ ដោយបានស្នើអោយមាន នូវ«ដំណោះស្រាយនយោបាយ»មួយ ដែលនឹងបញ្ជៀសជម្លោះ ប្រកបដោយឈាម នៅក្នុង​ប្រទេស។ នៅពីមុខមនុស្សជាច្រើននាក់ ដែលប្រជុំគ្នានៅក្នុងគ្រឹះស្ថានវប្បធម៌និងសិល្បៈ ក្នុងថ្ងៃអាទិត្យទី០៦មករានេះ លោកបានអំពាវនាវ អោយមានការជជែកគ្នាមួយ ជាមួយដៃគូរណាក៏ដោយ ដែលរហូតមកទល់សព្វថ្ងៃ នៅមិនទាន់មាន​«ដៃគូរ»នោះនៅឡើយ តែបានបដិសេធមិនជួបនិយាយជាមួយ «ពួកអ្នកលេង» ដែលទទួលបញ្ជាពីបរទេសឡើយ។

លោកបានស្នើ នូវ«ផែនការ»មួយ មានបីជំហាន ចាប់ផ្ដើមពីប្រទេសដែលផ្ដល់ថវិការអោយ «ក្រុមភេវរជន»ទាំង​នោះ ត្រូវអោយ«បញ្ឈប់»ជាមុន។ បន្ទាប់មកទៀត កងទ័ពនឹងបញ្ឈប់ភ្លាមដែរ នូវប្រតិបត្តិការសឹករបស់ខ្លួន តែនៅរក្សាសិទ្ធិ ក្នុងការ«តបតរ»។ លោកអាល់ អាសាធ បានសន្យាទៀតថា នៅក្នុងលក្ខខ័ណ្ឌនេះ នឹងអាចបើកទ្វាទៅរក «កិច្ចប្រជុំ​ចរចារថ្នាក់ជាតិ»មួយ ដោយរួមបញ្ចូលទាំងវិធានការ «បោះប្រជាមតិ» ខណៈរដ្ឋសភាថ្មី និងរដ្ឋាភិបាលថ្មី នឹងត្រូវកើត​ចេញពីការបោះឆ្នោត។

ក្រុមអ្នកបះបោរ ឈប់ចង់បាន «របបផ្ដាច់ការ» នេះទៀតហើយ

ខាងអ្នកបះបោរ បានបដិសេធភ្លាមៗ នូវ«ផែនការ» ដែលគ្មានអ្វីបញ្ជាក់អោយច្បាស់នេះ ហើយថែមទាំងចោទលោក​ប្រមុខរដ្ឋរូបនេះ ថាចង់ជ្រើសរើស «ដៃគូរ»ជជែក និងនៅតែចង់រក្សាអំណាចរបស់ខ្លួន។ អ្នកនាំពាក្យនៃសម្ព័ន្ធមិត្ត​អ្នក​បះបោរ លោក វ៉ាលីដ អាល់ ប៊ូននី (Walid al-Bounni) បានអះអាងប្រាប់ភ្នាក់ងារសារពត៌មានបារាំង អាអេហ្វប៉េ (AFP មានសាខានៅទីក្រុងបៃរូឌ ប្រទេសលីបង់) ថា ក្រុមរបស់លោកចង់បាន«ដំណោះស្រាយនយោបាយមួយ។ តែគោល​បំណងសំខាន់ សម្រាប់ប្រជាជនស៊ីរី គឺត្រូវបណ្ដេញលោក អាសាធ ចេញពីតំណែង ហើយមកទល់នឹងបច្ចុប្បន្ន ប្រជាជនស៊ីរីបានបាត់បង់ជិវិត ប្រមាណជាជាង ៦០ពាន់នាក់ហើយ។ ប្រជាជនស៊ីរី មិនបានធ្វើការបូជាទាំងនេះ ដើម្បី​រក្សាទុក នូវរបបផ្ដាច់ការបែបនេះតទៅទៀតទេ។»

ចំណែកឯខាង បងប្អូនមូស្លីម នៃប្រទេសស៊ីរីវិញ ដែលជាកម្លាំងយ៉ាងសំខាន់ នៅក្នុងចលនាបះបោរ បានបញ្ជាក់ក្នុង​សេចក្ដីប្រកាសពត៌មានមួយថា «ផែនការ»នេះ «គ្មានន័យ»អ្វីសោះ និងបានចាត់ទុកលោកអាល់-អាសាធ ជា«ឧក្រិដ្ឋជន​សង្គ្រាម ដែលត្រូវគេកាត់ទោសជាមុនសិន»។

ប្រតិកម្មពីបរទេស អាមេរិក និងអ៊ឺរ៉ុប

សុន្ទរកថារបស់លោក អាល់-អាសាធ បានបង្កអោយមានប្រតិកម្មពុះកញ្ជ្រោលឡើង ពីសំណាក់អង់គ្លេស អាឡឺម៉ង់ និងអាមេរិក។ ទីក្រុងឡុងដ៍ បានបរិហាពី «ភាពពុតត្បុត» របស់ប្រធានាធិបតីស៊ីរីរូបនេះ ចំណែកឯទីក្រុងវ៉ាស៊ិនតោន គិតថា លោកអាសាធ «បានចេញឆ្ងាយពីការពិត» ហើយសុន្ទរកថារបស់លោក ជាការសាកល្បងថ្មីមួយទៀត សម្រាប់​ចាប់តោងរកអំណាច។

ប្រមុខការទូតអង់គ្លេស លោកវីល្លីយ៉ាម ហាគ (William Hague) បានសរសេរក្នុងប្រព័ន្ធបណ្ដាញសង្គមទ្វីធើរថា «កិច្ចសន្យាខ្យល់»របស់លោកអាសាធ មិនអាចបញ្ឆោតអ្នកណាបានទេ ហើយបានចាត់ទុកសុន្ទរកថានេះ ថាទៅហួស​ពីភាពពុតត្បុតនោះទៅទៀត។ ទីក្រុងប៊ែរឡាំងឯណោះ បានបង្ហាញការសោកស្ដាយ ពីសុន្ទរកថានោះ ថាគ្មាន«គំនិតល្អ​យល់ពីអ្វីថ្មីបន្ថែម»សោះ។ សហគមន៍អ៊ឺរ៉ុប បានជម្រុញអោយលោកអាសាធ ដកខ្លួនចេញជាមុនសិន ដើម្បីឈាន​ទៅរក​«ដំណោះស្រាយរនយោបាយ»ណាមួយ។

ដោយឡែក នៅលើសមរភូមិឯណោះវិញ ក្រុមអ្នកឃ្លាំមើលសិទ្ធមនុស្សនៃប្រទេសស៊ីរី បានធ្វើរបាយការណ៍មកថា យ៉ាង​តិចណាស់មនុស្ស ៧៨នាក់  ក្នុងនោះ ប្រជាជនស៊ីវិល ៣៦នាក់ ពួកបះបោរ ២២នាក់ និង កងទ័ព២០នាក់ បានស្លាប់​កាលពីថ្ងៃ​អាទិត្យនេះដដែល៕

--------------------------------------------------
ដោយ៖ សេក មនោរកុមារ - ប៉ារីស ថ្ងៃទី ០៦ ខែមករា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ