សង្កាត់ជាមូលដ្ឋានដ៏សំខាន់ នៃក្រុមបះបោរ នៅក្នុងក្រុងអាឡិប (Alep) ដែលជាក្រុងទីពីរ នៃប្រទេសស៊ីរី (បន្ទាប់​ពីរដ្ឋធានី ដាម៉ាស) កំពុងដួលរំលំរលាយ ហើយនឹងឈាន​ទៅចុះចាញ់​កងទ័ពស្មោះស្ម័គ្រ នឹង​លោក ប្រធានាធិបតី បាឆារ អែល-អាសាធ (Bachar al-Assad) ទាំងស្រុងហើយ នៅថ្ងៃអង្គារទី ១៣ ចូល​មក​ថ្ងៃ​ពុធ ទី១៤ ខែធ្នូ ឆ្នាំ២០១៦នេះ។ ជាលទ្ធផលចុងក្រោយ នៃសមរភូមិដ៏ក្ដៅរោលរាល ដុត​ឆេះហុយ​ផ្សែង​ទ្រលោម ក្រោម​សូរ​គ្រាប់ផ្លោង និងការទម្លាក់គ្រាប់បែក មិនដាច់​ពីសំណាក់​កងទ័ព​របស់លោក អាសាធ និងកងទ័ព​អាកាស​រ៉ូស្ស៊ី។

ហើយលទ្ធផលចុងក្រោយ នៃ«មហាវិនាសកម្ម» ដោយសារសង្គ្រាមដ៏រន្ធត់ ត្រូវបានបង្ហាញ តាមរយៈ​រូបភាព​ខាង​ក្រោម​នេះ ដែលទើបនឹងថតបាន និងដាក់បង្ហោះនៅថ្ងៃទី ១២ ខែធ្នូនេះ ដោយក្រសួងការពារជាតិ នៃ​រដ្ឋាភិបាល​ស៊ីរី​ខ្លួន​ឯង។

» វីដេអូរបស់ក្រសួងការពារជាតិស៊ីរី បង្ហោះនៅថ្ងៃទី១២ ខែធ្នូ

ពីពេលមុនៗ គេធ្លាប់ឃើញតែរូបភាព នៃភាពខ្ទេចខ្ទាំនេះ ដែលថតពីលើអាកាស ដោយក្រុមអ្នកយកព័ត៌មាន នៅផ្ទាល់នឹងកន្លែងប៉ុណ្ណោះ។ ប៉ុន្តែនៅ​ពេល​ដែលរូបភាពទាំងនោះ ត្រូវបានបង្ហោះ​ចេញម្ដងៗ ជាពិសេស​នៅ​ក្នុង​​អំឡុង​​​ខែ​កញ្ញា តុលា និងខែវិច្ឆិកាកន្លងមកនោះ ពិភពលោកមួយចំហៀង បានបិទភ្នែក និងបាន​ចោទ​ប្រកាន់​​ថា រូបភាព​ទាំង​នោះ ជាការ​ឃោសនា របស់​ប្រទេស​លោក​ខាង​លិច​ទៅវិញ។

» វីដេអូរបស់ក្រុមអ្នកយកព័ត៌មាន នៅនឹងកន្លែង បង្ហោះនៅថ្ងៃទី១០ ខែតុលា៖

សង្គ្រាមស៊ីវិល នៅក្នុងប្រទេសស៊ីរី មានរយៈពេលជិត៦ឆ្នាំហើយ រាប់មកទល់នឹងថ្ងៃនេះ ហើយវាបាន​សម្លាប់​ជីវិត​មនុស្ស អស់មិនតិច​ជាង៣សែន​នាក់ឡើយ។ នេះបើតាមរបាយការណ៍ផ្លូវការ របស់អង្គការ​សហ​ប្រជា​ជាតិ៕