ពាក្យសម្តីប្រឆាំងជាតិសាសន៍«ជ្វីហ្វ» កើតមានជាថ្មី លើទ្វីសធើរ
បណ្ដាញសង្គមទ្វីសធើរ បានផ្ទុកនៅចុងសប្ដាហ៍នេះ នូវសារជាច្រើន មានលក្ខណៈប្រឆាំងជាតិសាសន៍«ជ្វីហ្វ» ជាមួយនឹងពាក្យគន្លឹះ «#បើខ្ញុំជាណាហ្សី (#siJetaisNazi)»។ សហព័ន្ធនិស្សិតជ្វីហ្វ ក្នុងប្រទេសបារាំង បានលើកពីបញ្ហានេះឡើង ហើយបានចោទគេហទំព័របណ្ដាញសង្គម ថាមិនបានយកចិត្តទុកដាក់ ប្រឆាំងនឹងភាពជ្រុលនិយមទាំងនេះ។
រូបចាប តំណាងអោយប្រព័ន្ធ បណ្ដាញសង្គមទ្វីសធើរ។
ប្រធានសហព័ន្ធនិស្សិតជ្វីហ្វ (UEJF) លោក ចណាតាន ហៃយន (Jonathan Hayoun) បាននិយាយក្នុងសេចក្ដីប្រកាសយ៉ាងដូច្នេះថា «ដោយបានបដិសេធ ក្នុងការដាក់អោយដំណើរការ នូវតម្រងផ្ដល់សញ្ញា ពីសារអស់ទាំងនេះ បណ្ដាញសង្គមសម្រាប់សារខ្លីមួយនេះ ដូចជាបានផ្ដល់ផ្លូវដើរ អោយទៅពួកអ្នកប្រកាន់ពូជសាសន៍ និងប្រឆាំងជាតិសាសន៍ជ្វីហ្វ»។ បើតាមលោក «ការឃ្លាំចាំមើល ប្រឆាំងនឹងការស្អប់ខ្ពើមនានា ដូចជាបានរលប់បាត់ទៅហើយ» ហើយ «ក្រុមអ្នកដែលនៅតែបន្តរឿងហេតុ មានអារម្មណ៍ថា គ្មានទណ្ឌកម្មអ្វីសោះ» នៅលើបណ្ដាញសង្គម។
កាលពីខែវិច្ឆិកាកន្លងទៅ សហព័ន្ធនិស្សិតនេះ បានប្ដឹងទ្វីសធើរទៅតុលាការ ពីបទដែលបណ្ដាញសង្គមនេះ ប្រកែកមិនអោយដឹង ពីអត្តសញ្ញាណរបស់ម្ចាស់សារ ដែលសរសេរមានលក្ខណៈប្រឆាំងជ្វីហ្វ។ ភាគីទាំងសងខាង នឹងត្រូវជួបគ្នា នៅមុខតុលាការនៃទីក្រុងប៉ារីស ថ្ងៃអង្គារខាងមុខនេះ។
ដោយឡែក ការិយាល័យរដ្ឋអាជ្ញានៃទីក្រុងប៉ារីស ក៏បានបើកការស៊ើបអង្កេតមួយផងដែរ នៅបន្ទាប់ពីការទទួលពាក្យបណ្ដឹងមួយ របស់ការិយាល័យជាតិ នៃសន្តិសុខ ប្រឆាំងនឹងការប្រកាន់ជាតិសាសន៍ ធ្វើទៅលើជនជាតិជ្វីហ្វ ដែលមានអក្សរកាត់ថា BNVCA។ ការស៊ើបអង្កេតនោះ នឹងតាមរកមើលជាពិសេស ជនតែម្នាក់ ឬជនជាច្រើន ដែលបានដាក់នៅលើគេហទំព័រនេះ នូវពាក្យគន្លឺ «#ជ្វីហ្វល្អម្នាក់ (#unbonjuif)» និងសារមួយឃ្លា មានន័យថា «ជ្វីហ្វល្អម្នាក់ ជាជ្វីហ្វដែលស្លាប់»។
រដ្ឋមន្ត្រីក្រសួងកិច្ចការ និងសិទ្ធិនារីរបស់បារាំង លោកស្រី ណាចាត វ៉ាឡូដ ប៊េលកាសេម (Najat Vallaud-Belkacem) ដែលធ្លាប់បាននិយាយកាលពីខែធ្នូមុន ពីការជួបជជែកជាមួយសមាគមនានា និងម្ចាស់បណ្ដាញសង្គមទ្វីសធើរនោះ នឹងត្រូវជជែកតាមទូរស័ព្ទនៅថ្ងៃពុធខាងមុខ ជាមួយនឹងលោក ខូលីន ក្រូវែល (Colin Crowell) ជាអ្នកទទួលបន្ទុកនយោបាយសាធារណ និងជានាយករង នៃក្រុមហ៊ុនអាមេរិកាំងមួយនេះ៕
--------------------------------------------------
ដោយ៖ ឈូករ័ត្ន - ប៉ារីស ថ្ងៃទី ០៦ ខែមករា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ