បង្ហោះកាលពីចុងសប្ដាហ៍មុន នៅលើបណ្ដាសង្គមអាមេរិកមួយឈ្មោះ «Reddit» រូបភាពនេះ បានបង្ហាញ​ពី​ឪពុក​មួយរូប ដែលមានខោអាវទទឹកជោក មើលធ្លុះដល់សាច់ តែបែរជាបានកាន់ឆ័ត្រ បាំងភ្លៀងកុំឲ្យកូន​​ទទឹក​ទៅ​វិញ។ អ្នកថតរូបមួយនេះ លោក «Eumine Choi» អាយុ២៥ឆ្នាំ បានអះអាងថា លោកបានចាប់​​យក​​រូបភាព នៅក្នុងសង្កាត់ «Queens» នៃទីក្រុងញ៉ូយក នៅពេលដែលលោក បានចាកចេញពីការងារ។

លោក «Choi» បានថ្លែងឡើង ប្រាប់ទូរទស្សន៍ NBC ថា៖ «ខ្ញុំសង្ឃឹមថា កូនប្រុសមួយនេះ នឹងធំពេញរូប​ពេញ​រាងឡើង ហើយនឹងដឹងខ្លួន ពីភ័ពសំណាងដ៏អស្ចារ្យមួយ ដែលលោកឪពុក បានផ្ដល់ឲ្យ»។

យុវជនអាយុ២៥ឆ្នាំ បានថ្លែងទៀតថា៖ «ឪពុកមួយរូប ដែលមិនខ្វល់ពីកាបូប​ធ្វើពីស្បែក និងពីខោអាវរបស់​ខ្លួន តែបែរជាខ្វល់ខ្វាយយ៉ាងខ្លាំង ពីកូនប្រុសរបស់ខ្លួន (...)។ រឿងនេះធ្វើឲ្យខ្ញុំនឹកឃើញ ដល់ឪពុករបស់ខ្ញុំ ដែល​ជានិច្ច​ជាកាល តែយកចិត្តទុកដាក់លើខ្លួនខ្ញុំ មុនខ្លួនគាត់។»។

រូបថតនេះ ក៏ត្រូវបានយកមកបង្ហោះ នៅលើបណ្ដាញសង្គមហ្វេសប៊ុកដែរ ជាពិសេសនៅលើទំព័រ​របស់​សាលា «Kon Wah Day» ដែលកុមារក្នុងរូបថត បានសិក្សា និងបានស្ពាយកាបូប ដែលមានដាក់ឈ្មោះ​សាលា នៅ​ជាប់​ជាមួយ។ អ្នកបង្ហោះរូបថត លើហ្វេសប៊ុក បានសរសេរថាពន្យល់ថា៖ «ខ្ញុំសង្ឃឹមថា រូបថត​មួយ​សន្លឹ​កនេះ នឹងរកឃើញផ្លូវដើររបស់វា រហូតដល់គ្រួសារ ដែលស្ថិតក្នុងរូបថត»៕

------------